1 Mfalumi Dawudi kawashemiti aku Yerusalemu wakulu woseri wa Israeli. Wakulu wa makabila, wakulu wa mashonta na makambaku wa vipinga vyawamtenderiti mfalumi, wakulu wa mashonta maelufu, wakulu wa mashonta mamiya, wagolokera wa lunda zoseri na ng'ombi woseri wa mfalumi na wana wakuyi pamuhera na wakulu wa liboma, makambaku na wanjagira woseri wagangamala.

2 Shakapanu mfalumi Dawudi kagoloka na kulonga. "Mpikaniri walongu waneni na wantu wangu. Nfiriti mmoyu mwangu kunyawa numba ya kulitula lisandiku lya lipatanu lya Mtuwa Mlungu su tugendi kumguwira Mtuwa Mlungu gwetu aku na neni ntanda kala vintu vyoseri vya kulinyawa. 3 Kumbiti Mlungu kandeweleriti, toziya neni ndo muntu gwa nkondu na kulaga wantu wavuwa. 4 Kumbiti Mtuwa Mlungu, Mlungu gwa Israeli kasyaguliti neni muwamu mwa kaya ya tati gwangu kuwera mfalumi gwa Israeli mashaka goseri mpaka mpeleru. Kalisyaguliti likabira lya Yuda kulonguziya na kulawirana na likabila ali, kayisyaguliti kaya ya tati gwangu na muwamu mwa wana wa tati gwangu, kafiliziwa na neni na kuntula weri mfalumi gwa Israeli yoseri. 5 Mtuwa Mlungu kampanana wana wavuwa na muwamu mwawu woseri awa, kamsyagula Selemani mwana gwangu kalikali pashiti sha ukulu sha ufalumi wakuyi Mtuwa Mlungu, kayikolimlima Israeli."

6 "Mtuwa Mlungu kang'ambiriti, mwana gwaku Selemani ndo hakanyawili numba yangu na vimbambaza, toziya numsyagula yomberi kaweri mwana gwangu na neni haweri tati gwakuyi. 7 Haniugangamaziyi ufalumi wakuyi mashaka goseri payiwera hakendereyi kukola nakaka lagiru zyangu ntambu yakatenda leru."

8 "Vinu su, niwalagalira kulongolu kulijojoniku ali lya Waisraeli woseri shipinga sha wantu wa Mtuwa Mlungu na kulongolu kwa Mlungu gwetu, mzibati lagiru zoseri za Mtuwa Mlungu, Mlungu gwenu, su isi ayi iherepa yendeleyi kuwera yenu na kuwahalaziya wiwuka wenu pa mwenga mashaka goseri."

9 "Nagwenga Selemani mwana gwangu, gummani Mlungu gwa tati gwaku na gumtenderi kwa moyu gwaku goseri na kwa mahala gaku, toziya yomberi Mtuwa Mlungu kalolalola miyoyu na kuvimana galii gakafira kugatenda muntu. Pagumsakula yomberi, hagumuwoni, kumbiti pagumleka, hakakwasili kutali mashaka goseri. 10 Su, gulikali weri na kulihola handa, Mtuwa Mlungu kakusyagula gwenga su gumnyawiri numba ya kuguwira. Guweri mgangamala gukatendi hangu."

11 Su Dawudi kampanana Selemani mwana gwakuyi mfanu gwa majengu goseri ga numba nkulu ya Mlungu, numba zakuyi, hanja zakuyi, golofa zakuyi, vyumba vyakuyi vya mngati na pahala pananagala nentu. 12 Kampananiti mfanu gwa numba ya Mlungu ntambu hayiweri handa rohu ntambu yakamlangaziyiti, kuusu ligeleri lya numba ya Mtuwa Mlungu na vyumba vya Mlungu na hanja za kutulira vintu vyavilumikitwi. 13 Viraa kampananiti mfanu gwa ntambu ya kutenda toziya ya mibagulanu ya utenderu wa watambika na Walawi kutendera munumba ya Mtuwa Mlungu na kuvitula weri vyombu vyoseri vya numba ya Mtuwa Mlungu. 14 Kampananiti zahabu yayifiruwitwi toziya ya kunyawira vyombu vyoseri vya zahabu vya untumintumi wa kila ntambu na kampananiti madini goseri ga feza gagafiruwitwi kwa utendera wa kila ntambu. 15 Utopa wa vintu vya kutulira vimiliku vya zahabu na vimiliku vyakuyi, utopa wa zahabu ya kila shintu shakutulira vimiliku na taa zakuyi na utopa wa madini ga feza ga kunyawira vintu na taa zakuyi kulinganira na matendera ga kila shintambi. 16 Zahabu ya kunyawira meza ya zahabu yayitulilitwi mabumunda yagalaviwitwi kwa Mlungu na feza ya kunyawira meza za madini ga feza, 17 viraa kalagaliriti zahabu ivuwa iherepa yayifiliwitwi kunyawira misomeru ya minofu, mabakuli na vikombi vikulu, viraa zahabu ivuwa na feza yayifiluwitwi kunyawira mabakuli ga zahabu na ga feza, 18 na zahabu iherepa ya kunyawira shitalawanda sha kutumiziya ubani. Viraa kampananiti mfanu gwa shigubikiru sha zahabu ya viwumbi vyana mpapatiru yawaziyalikiti na kuligibikira lisandiku lya lipatanu lya Mtuwa Mlungu. 19 "Mfalumi Dawudi kagatuliti lupalahera kwa malembu goseri aga gakapananitwi na Mtuwa Mlungu. Su mahengu goseri gatendeki kulinganira na mfanu agu."

20 Mfalumi Dawudi viraa kamgambira Selemani mwana gwakuyi, "Guweri mgangamala na moyu mkulu, Nagutira pota kuwera na lyoga. Mlungu, Mtuwa Mlungu mweni ndo Mlungu gwangu, ka pamuhera na gwenga. Hapeni kakuleki ila hakaweri na gwenga mpaka paliperaku lihengu lyoseri lyalifiruwa kutenderwa numba ya Mtuwa Mlungu. 21 Watambika na Walawi watulwa kala mumahengu gawafira kutenda munumba ya Mlungu. Kila muntu yakafira mweni na yakana umani wa kila ntambu hakaweri kala nakamu kukutanga na wantu woseri pamuhera na wakulu wawu hawaweri pasi pa lagalira yaku."