1 Awu ndo wamu wa wiwuka wa Yuda waweriti Peresi na Hesironi na Karimi na Huri na Shobali. 2 Reaya mwana gwa Shobali, kamwiwula Yahati, yakaweriti tati gwakuyi Ahumayi na Lahadi, azi ndo nkolu za wantu wa Sorati. 3 Wana wapalu wa Etamu waweriti Yezireeli, Ishima na Idibashi, Waweriti na dada gwawu yumu wamshemiti Haseleliponi. 4 Penueli kaweriti mwanjisha gwa mji gwa Gedori, Ezeri kaweriti mwanjirishi gwa mji gwa Husha, Awa waweriti wiwuka wa Huri mwiwuka gwa kwanja gwa Efrata, Huri mwanjisha gwa mji gwa Betilehemu.

5 Ashuru, mwanjishi gwa mji gwa Tekowa, kaweriti na wadala wawili, awa ndo Hela na Naara. 6 Naara kawiwulira wana wapalu wamsheshi, Ahuzamu na Heferi na Temeni na Haahashitari. 7 Hela kamwiwulira wana wapalu watatu, Sereti na Ishari na Etinani. 8 Hakosi kamwiwula Anubi na Sobeba na ndo yakaweriti tati gwa nkolu za wiwuka wa Ahariheli, mwana mpalu gwa Harumu.

9 Kwaniti muntu yumu litawu lyakuyi Yabesi, yakapananitwi ligoya kuliku walongu wakuyi woseri. Mawu gwakuyi kamshemiti Yabesi pakalonga, "Nimwiwuliti kwa kutama." 10 Yabesi kamluwa Mlungu gwa Israeli pakalonga, "Gwee Mlungu nikuluwa guntekeleri na kunongelera mpaka zyangu. Liwoku lyaku liweri pamuhera na neni na gundoleli kulawirana mlandu goseri gudoda, nantenda" Na Mlungu kampanana galii ganduwiti.

11 Karebu mlongu gwa Shuha, kamwiwula Mehiri na Mehiri kamwiwula Eshitoni. 12 Eshitoni kaweriti na wana wapalu watatu. Beti Rafa na Pasea na Tehina. Tehina kaweriti tati gwa Iri Nahashi. Wiwuka wa wantu wa Reka.

13 Wana wapalu wa Kenazi waweriti Otinieli na Seraya viraa Otinieli kaweriti na wana wapalu wawili Hatati. 14 Meonotai kamwiwula Ofura. Seraya kamwiwula Yoabu, mwanjirishi gwa mji gwa Lulalanda lwa Mafundi. Kalipananiti litawu ali toziya wantu yawalikaliti amu waweriti mafundi yawavimana nentu.

15 Karebu mwana mpalu gwa Yefune kaweriti na wana wapalu watatu, Weni ndo Iru na Ela na Naamu, Na mwana gwa Ela kaweriti Kenazi.

16 Wana wapalu wa Yehaleleli waweriti wamsheshi, Zifu na Zifa na Tiria na Asareli.

17 Wana wapalu wa Ezira waweriti Yeteri, Meredi na Eferi na Yaloni. Meledi kamyugiti Bitia, mhinga gwa Farao na awa ndo wana wakamwiwuliliti Meredi, mhinga yumu litawu lyakuyi Miriamu na wantemba wawili Shamai na Ishiba na Ishiba mwanjishi gwa mji gwa Eshitemoa. 18 Meredi kaweriti na mdala yumonga Myahudi. Mweni kamwiwuliliti Yeredi, mwanjilishi gwa mji gwa Gedori, Heberi mwanjilishi gwa mji gwa Soko na Yekutieli kaweriti mwanjilishi gwa mji gwa Zanoa.

19 Hodia kamyugiti dada gwa Nahamu mweni wiwuka wakuyi ndo wanjishi wa likabila lya Garimi, lyalilikaliti mumji gwa Keila na lukolu lwa Maakati, lwalulikaliti kumji gwa Eshitemoa.

20 Wana wapalu wamsheshi wa Shimoni waweriti Amunoni na Rina na Beni Hanani na Tiloni, Ishi kaweriti na wana wapalu wawili Zoheti na Beni Zoheti.

21 Shela kaweriti yumu gwa wana wa Yuda kaweriti na mwana wapalu, Eri kaweriti mwanjisha gwa Leka na Laada ni mwanjisha gwa Maresha weni nkolu zawu ziweriti zyawasona nguwu nfufu ziherepa na yawalikaliti Beti Ashibea, 22 Yokimu na wantu yawalikaliti kumji gwa Kozeba na Yoashi na Sarafi yawakolitimlima aku Mowabu na Lehemu.Visoweru avi vyamakashu nentu. 23 Awa ndo yawakuluga viwiga walikaliti aku Netaimu na Gedera pawamtendera mfalumi.

24 Simiyoni kaweriti na wana wapalu wamhanu, Nemueli na Yamini na Yaribu na Zera na Shauli. 25 Shauli kamwiwula Shalumu na Shalumu kamwiwula Mibisamu na Mibisamu kamwiwula Mishima. 26 Wiwuka wa Mishima uweriti Hamueli na Hamueli kamlera Zakuri na Zakuri kamlera Shimei. 27 Shimei kaweriti na wana wapalu kumi na sita. Na wahinga sita, kumbiti walongu wakuyi waheriti wana wavuwa hangu lukolu lwawu loseri lwaheriti wantu wavuwa handa likabila lya Yuda. 28 Miji yawalikaliti iweriti Beeri Sheba na Molada na Hazari Shuali, 29 Biliha na Ezemu na Toladi, 30 Betueli na Horima na Sikilagi, 31 Beti Marikaboti na Hazari Susimu na Beti Biri na Shaaraimu. Womberi walikaliti mu miji ayi mpaka shaka sha ukolitimlima mfalumi Dawudi. 32 Vijiji vyayiyizyengetiti viweriti Etamu na Aini na Rimoni na Tokeni na Ashani. 33 Pamuhera na vijiji vya kumbwega mwa mji gwa Baalati. Aga gaweriti makawu gawu na wagatuliti maholu ga nkolu zawu.

34 Wantu awa waweriti wakulu wa nkolu zawu: Meshobabu na Yamleki na Yosha kaweriti mwana mpalu gwa Amazia, 35 Yoweli na Yehu waweriti wana wa Yoshibiya na Yoshibiya kaweriti mwana gwa Seraya na Seraya kaweriti mwana gwa Asieli. 36 Vilaa Eliehonai na Yaakoba na Yeshohaya na Asaya na Adieli na Yesimieli na Benaya,

37 Ziza kaweriti mwana gwa Shifi na Shifi kaweri mwana gwa Aloni na Aloni kaweriti mwana gwa Yedaya na Yedaya kaweriti mwana gwa Shimri na Shimri kaweriti mwana gwa Shemaya 38 Walongu wawu wendereya kongereka nentu, 39 walipalasiya mpaka kuligomi lya mji gwa Gedori na uwega gwa gulawa mshenji gwa kululalanda, su kuwasakulila kondolu wawu maliwuziwu. 40 Aku wapatiti maliwuziwu gaherepa nentu na viraa isi yayiweriti na seemu nkulu na ponga na nyamaliru. Na Wahamu wamonga walikaliti aku makashu.

41 Mushaka sha Mfalumi Hezekia gwa Yuda, wantu awa yawakantitwi matawu gawu wagenditi Gedori na kuhalibisiya malingu ga Wameuni yawaweriti walikara aku na kuwawinga nakamu mpaka leru. Watenditi makawu gwawu ga mashaka goseri aku toziya kuweriti na maliwuziwu gavuwa toziya ya wankondolu wawu. 42 Wantu wamonga wa likabila la Simiyoni waweriti miya mhanu, wagenditi mpaka kulugongu Seiri. Pawalonguziwa na wana wa Ishi weni ndo Pelatia na Nearia na Refaya na Uzieli. 43 Wantu wa Simiyoni wawalagiti wantu wa Maleki yawasigaliti pa kuponeka na womberi walikala aku mpaka leru.