1 Su wafiristi walikomanga na wantu wa Israeli. Waisraeli watugiti kulongolu kwa Wafilisti na kulaguwa kulugongu lwa Giliboa. 2 Kumbiti Wafiristi wawabatiti Sauli na wana wakuyi na wawalaga Yonatani na Abinadabu na Maliki Shua. 3 Makomangu gaweriti makulu pahala pakaweriti Sauli. Wagumiti misali na kutendwa nentu.

4 Sauli kamgambiriti muntu yakampapiliti vintu vya kulikomangira, "Gusomoli ligumba lyaku gunsomi nfuwi, su Wafiristi awa yawamguwira ndiri Mlungu nawiza kunzoniziya." Kumbiti mpapa vintu vyakulikomangira kajeriti ndiri, toziya katiriti nentu. Hangu, Sauli katoliti ligumba lyakuyi na kuliguwira. 5 Shakapanu mshonta ulii pakamwoniti Sauli kahowa na yomberi kasomeka ligumba lyakuyi kaliguwira, kahowa. 6 Hangu Sauli ndo ntambu yakahowiti, na wana wakuyi watatu na wiwuka wakuyi woseri. 7 Waisraeli woseri yawalikaliti kululalanda lwa Yezeleli pawawoniti wamashonta wawatira wankondu handa Sauli na wana wakuyi wahowa, wayihamiti miji watuga. Wafilisti wagenda na kulikala mumiji ayi.

8 Shirawu yakuyi Wafiristi pawagenditi kutola vintu vya yawalagitwi awa, wagawoniti mauti ga Sauli na wana wakuyi mulugongu Giliboa. 9 Wamvula nguwu za nkondu, wagutola mtuwi gwakuyi, pamuhera na vintu vyakuyi vya kulikomangira, shakapanu watumiti walagilagi muisi yoseri ya Wafiristi kubwera shisoweru ashi kwa vinyagu vyawu na wantu wawu. 10 Watuliti vintu vya kulikomangira vya Sauli munumba nkulu ya wamlungu wawu, Shakapanu kugutyeteziya mtuyi gwakuyi munumba nkulu ya mlungu gwawu Dagoni. 11 Wenikaya woseri wa Yabeshi Gileyadi pawapikiniriti goseri Wafiristi ntambu yawamtendiriti Sauli, 12 wamakambaku woseri wawukiti na kuyitola nshimba ya Sauli na nshimba za wana wakuyi watatu, wayijega mpaka Yabeshi. Wayifintira mihonju yawu pasi pa mtera yagushemwa mwaloni aku Yabeshi na walikaliti pota kuliya toziya ya kuwalirira kwa mashaka saba. 13 Sauli kahowiti toziya kaweriti ndiri mwaminika na kashijimiriti ndiri shisoweru sha Mtuwa Mlungu yomberi kagenditi kwa mtunga kuluwa shakutenda, 14 viraa kagenditi ndiri kwa Mtuwa Mlungu su kuluwa shakutenda. Toziya ayi Mtuwa Mlungu kamlagiti na ufalumi wakuyi kampanana Dawudi mwana gwa Yese.