1 Ayi ndo walanga ya wakulu wa wiwuka wa Israeli yawaweriti wakulu wa kaya na wakulu wa mashonta wa maelufu na mamiya na wakulu wawu yawamtenderiti mfalumi Dawudi mumahengu ga kwingira na kulawa. Kila mwezi kila shinja, shipinga sha ntambu yingi sha wantu ishilini na msheshi elufu waweriti mukutenda mahengu.

2 Yeshobeamu mwana gwa Zabidieli kaweriti mlonguziya gwa shipinga sha kwanja mumwezi gwa kwanja, shipinga shakuyi shiweriti na wantu elufu ishilini na msheshi. 3 Yomberi kaweriti mwiwuka gwa Peresi na yomberi kawera mkulu gwa wamashonta woseri wa shonta mumwezi gwa kwanja. 4 Mgolokera gwa shipinga sha pili kaweriti Dodai, kulawa likabila lya Hohi na Shipinga shakuyi shiweriti na wantu elufu ishilini na msheshi. Yakamtangiti kaweriti Mikiloti. 5 Mkulu gwa lishonta lya shipinga sha tatu pashiwera na wamashonta elufu ishilini na msheshi kaweriti Benaya mwana gwa Yehoyada, yakaweriti mtambika mkulu. 6 Ayu ndo Benaya yakaweriti shikambaku mushipinga sha wantu selasini na mlonguziya gwa shipinga ashi. Na Amizabadi mwana gwakuyi, kaweriti mkulu gwa lishonta. 7 Asaheli, mlongu gwa Yoabu, kaweriti gwa msheshi pakawalonguziya shipinga sha msheshi shana wamashonta elufu ishilini na msheshi na pa yomberi kamfatiti Zebadia mwana gwakuyi. 8 Mu mwezi gwa mhanu. Kaweriti Shamhuti kulawa Izrahi, kaweriti na shipinga sha wamashonta elufu ishilini na msheshi. 9 Mu mwezi gwa sita. Ira, mwana gwa Ikeshi kulawa Tekoa, kaweriti na shipinga sha wamashonta elufu ishilini na msheshi. 10 Mu mwezi gwa saba. Helesi kulawa Peloni, gwa wana wa Efraimu, kaweriti na shipinga sha wamashonta elufu ishilini na msheshi. 11 Mwezi gwa nani. Sibekai kulawa Hushati, gwa Wazera, kaweriti na shipinga sha wamashonta elufu ishilini na msheshi. 12 Mwezi gwa tisa, kaweriti Abiyezeri kulawa Anatoti, gwa lukolu lwa Wabenjamini, kaweriti na shipinga sha wamashonta elufu ishilini na msheshi, 13 Mwezi gwa lilongu. Kaweriti Maharai kulawa Netofati gwa lukolu lwa Zera, kaweriti na shipinga sha wamashonta elufu ishilini na msheshi. 14 Mwezi gwa lilongu na gumu. Kaweriti Benaya kulawa Piratoni, gwa wana wa Efraimu na yomberi kaweriti na shipinga sha wamashonta elufu ishilini na msheshi. 15 Mumwezi gwa lilongu na mbili kaweriti Helidai kulawa Netofati, gwa Otinieli, viraa na yomberi kaweriti na shipinga sha wamashonta elufu ishilini na msheshi.

16 Wakulu yawaweriti wankulonguziya makabila ga Israeli waweriti. Kulawa kwa Warubeni. Eliezeri mwana gwa Zikiri, kulawa kwa Wasimiyoni, Shefatia mwana gwa Maaka, 17 Kulawa kwa Walawi na Hashabia mwana gwa Kemueli Kulawa kwa Aruni na Sadoki, 18 Kulawa kwa Yuda, Elihu, yumu gwa walongu wa mfalumi Dawudi, kulawa kwa Isakari, Omri mwana gwa Mikaeli, 19 Kulawa kwa Wazabuluni. Ishimaya mwana gwa Obadia, Kulawa kwa Nafutali, Yeremoti mwana gwa Azirieli, 20 Kulawa kwa Waefurahimu. Hoshea mwana gwa Azazia, kulawa nusu ya likabira lya Manasi, Yoeli mwana gwa Pedaya, 21 Kulawa nusu ya likabira lya Manasi mugileyadi, Ido mwana gwa Zekariya, kulawa kwa Wabenjamini, Yaasieli mwana gwa Abineri, 22 Kulawa kwa Dani, Azareli mwana gwa Yerohamu. Awa ndo wakulu wa makabila ga Israeli. 23 Kumbiti mfalumi Dawudi kawawalangiti ndiri wantu walii yawaweriti pasi pa vinja ishilini toziya Mtuwa Mlungu kawagambiriti hakawongeri Waisraeli waweri wavuwa handa ntondu za kumpindi. 24 Yoabu mwana gwa Seruya kanjiti kuwawalanga wantu kumbiti kawamalira ndiri, hangu maya ga Mlungu gawapatiti Waisraeli kwa shitendu ashi, su walanga ayi iyingiziwa ndiri mumaholu ga mfalumi Dawudi.

25 Yakagolokiliti hanja za mfalumi Dawudi kaweriti Azimaweti mwana gwa Adieli. Yonatani mwana gwa Uziya kagolokiriti hanja zimonga zyaziweriti kumalambu, kumjini, kuvijiji na kuliboma. 26 Yakagolokiliti malambu ga mfalumi kaweriti Eziri mwana gwa Kelubu. 27 Yakagolokiliti mahengu ga malambu ga mizabibu ga mfalumi kaweriti Shimei kulawa likabila lya Ramati. Yakagolokiliti kunyawa na kutula divayi kaweriti Zabudi kulawa likabila lya Shifimi. 28 Yakagolokiliti malambu ga mfalumi ga mizabibu na mikuyu mulalanda za vigongu vya kwaguzyeta mshenji, kaweriti Baali Hanani kulawa likabila lya Gederi. Yakagolokiliti hanja za lipaki lya mizeituni kaweriti Yowashi. 29 Yakagolokiliti vipinga vya ng'ombi wa mfalumi yawaweriti Sharoni kaweriti Shitirai, kulawa likabila lya Sharoni, yakagolokiliti vipinga vya wang'ombi wa mfalumi vyaviweriti kululalanda kaweriti Shafati mwana gwa Adilai. 30 Yakagolokiliti ngamiya wa mfalumi kaweriti Obili kulawa lukolu lwa Ishimaeli. Yakagolokiliti punda wa mfalumi kaweriti Yedeya kulawa lukolu lwa Meronoti. Yakagolokiliti vipinga vya wakondolu wa mfalumi kaweriti Yazizi kulawa lukolu lwa Hagiri. 31 Woseri awa waweriti walolera wa lunda za mfalumi Dawudi.

32 Yonatani, mjomba gwa mfalumi Dawudi, kaweriti mgambiziya na muntu yakana umani mkulu na mlemba. Yomberi na Yehieli mwana gwa Hakimoni waweriti wankuwafunda wana wa mfalumi. 33 Ahitofeli, kaweriti mgambiziya gwakuyi mfalumi, Hushai kulawa lukolu lwa Akiti kaweriti ganja gwa mfalumi. 34 Pakahowiti Ahitofeli, pahala pakuyi patolitwi na Yehoyada mwana gwa Benaya na Abiyatali. Yoabu kaweriti mkulu gwa lishonta lya mfalumi.