1 Su Dawudi kalinyawiriti numba zivuwa kumji gwa Dawudi. Kanyawiliti pahala toziya ya Lisandiku lya Mlungu na kagolosiyiti lilingu. 2 Shakapanu kalonga, "Kwahera muntu gwingi yoseri gwakulipapa Lisanduku lya Mlungu ila Walawi, toziya Mtuwa Mlungu kawasyaguliti womberi kulipapa na kumtendera lihengu mashaka goseri." 3 Hangu, kawajojonira Waisraeli woseri wizi Yerusalemu, su kulijega Lisandiku lya Mtuwa Mlungu, pahala pakalitandiriti kala. 4 Shakapanu Dawudi kawashemiti wiwuka wa Aruni na Walawi. 5 Kulawa mlukolu lwa Kohati pa ulongoziwa na Urieli, pamuhera na walongu wakuyi miya yimu ishilini pasi pa ugolokera wakuyi, 6 Kulawa mulukolu lwa Merari pa ulongoziwa na Asaya pamuhera na walongu wakuyi miya mbili ishilini pasi pa ugolokera wakuyi. 7 Kulawa mulukolu lwa Gerishomu, pa ulongoziwa na Yoeli pamuhera na walongu wakuyi miya yimu selasini pasi pa ugolokera wakuyi, 8 Kulawa mulukolu lwa Elisafani, pa ulongoziwa na Shemaya pamuhera na walongu wakuyi miya mbili pasi pa ugolokera wakuyi. 9 Kulawa mulukolu lwa Hebroni, pa ulongoziwa na Elieli pamuhera na walongu wakuyi semanini pasi pa ugolokera wakuyi. 10 Kulawa mulukolu lwa Uzieli, pa ulongoziwa na Aminadabu pamuhera na walongu wakuyi miya yimu lilongu na mbili pasi pa ugolokera wakuyi.

11 Shakapanu Dawudi kawashema watambika wawili. Sadoki na Abiatari na Walawi sita. Urieli na Asaya na Yoeli na Shemaya na Elieli na Aminadabu, 12 kawagambira, "Mwenga ndo wakulu wa nkolu za Walawi. Mlitakasiyi pamuhera na walongu wenu Walawi, su mwakalijegi lisanduku lya Mtuwa Mlungu, Mlungu gwa Israeli, mpaka pahala peni panilitandiliti. 13 Toziya mlipapiti ndiri mwanja gwa kwanja, Mtuwa Mlungu, Mlungu gwetu, katukomangiti toziya tulishera ndiri ntambu yakalagaliriti." 14 Su, watambika na Walawi walitakasiya su wapati kulijega lisandiku lya Mtuwa Mlungu, Mlungu gwa Israeli. 15 Walawi walipapiti mumawega mwawu pawatendera mihanya yakuyi handa Musa ntambu yakalongiti, kulinganira na shisoweru sha Mtuwa Mlungu. 16 Dawudi viraa kawagambiriti wakulu wa Walawi wawasyaguli wamu wa walongu wawu waweri pawimba na kugomba vyombu vya muziki kwa lusekeru. Vinanda na vinubi na matowazi kwa likakala, su kulaviya maziwu kwa nemeru. 17 Hangu wasyagula wantu kulawa munkolu za wimbaji. Hemani mwana gwa Yoeli, Asafu mlongu gwakuyi yakaweriti mwana gwa Berekia na wana wa Merari, walongu wawu na Etani mwana gwa Kushaya. 18 Shakapanu wasyagula Walawi waweri watanga wawu kwa kuwera nafasi ya pili. Zekaria na Yaasieli na Shemiramoti na Yehieli na Uni na Eliyabu na Benaya na Maaseya na Matitia na Elifelehu na Mikineya na walolera wa ligomi likulu waweriti Obedi Edomu na Yeieli. 19 Wayimba waweriti, Hemani na Asafu na Etani wasyagulitwi kugomba matowazi ga shaba. 20 Zekaria na Aziyeli na Shemiramoti na Yehieli na Uni na Eliyabu na Maaseyu na Benaya waweriti wagomba vinubi kwa mtindu yagushemwa Alamoti. 21 Kumbiti Matitia na Elifelehu na Mikineya na Obedi Edomu na Yeieli na Azazia walonguziya pawawera na vinubi vya liziwu lya Sheminiti. 22 Kenania toziya ya umani wa muziki wakaweriti nawu, katulitwi kaweri mkulu gwa walawi yawaweriti wankwimba. 23 Berekia na Elikana waweriti walolera wa Lisanduku lya lipatanu. 24 Shebania na Yoshafati na Netaneli na Amasai na Zekaria na Benaya na Eliezeri yawaweriti watambika, watulitwi kugomba lipenka kulongolu kusandiku lya Mlungu. Obedi Edomu na Yehiya watulitwi kuwera walolera wa Lisandiku.

25 Mfalumi Dawudi pakapikiniriti kuwera Mtuwa Mlungu kawatekelera walongu wa Obedi Edomu na vintu vyoseri vyakaweriti navi toziya ya lisandiku la Mtuwa Mlungu, kagenda kulitola lisandiku lya patanu kulawa ukaya kwa Obedi Edomu na kujega kulushi lwa Dawudi kwa sheleku nkulu. 26 Wamlavilira tambiku Mlungu. Wang'ombi washipalu saba na kondolu shipalu saba toziya kawatangiti Walawi walii yawapapiti lisandiku lya lipatanu lya Mtuwa Mlungu. 27 Dawudi kaweriti kavala nguwu nfufu, ntambu iraa na Walawi woseri yawapapiti lisandiku, wimba na Kenania mlonguziya gwa yawimba. Pamuhera na lihabiti ali, Dawudi viraa kaweriti kavala shizibawu sha nguwu nfufu. 28 Hangu, Waisraeli woseri waweriti pamuhera kwa sheleku kulitola lisanduku lya lipatanu lya Mtuwa Mlungu mpaka Yerusalemu. Walisindikiziti kwa mliru gwa balagumu na mapenka na matowazi na maziwu makulu ga vinanda na vinubi.

29 Lisanduku lya lipatanu lya Mtuwa Mlungu paliweriti lyakwingira kumji gwa Dawudi, Mikali, mhinga gwa Sauli, kasunguliriti kulawa palidilisha lyakuyi, kamwona mfalumi Dawudi pakavina na kunemelera, su kamzarawiti mumoyu mwakuyi.