1 Avi ndo vipinga vya Walawi yawatenditi mahengu ga ulolera magomi. Kulawa mulukolu lwa Kora, kaweriti Meshelemia mwana gwa Kore gwa kaya ya Asafu. 2 Meshelemia kaweriti na wana saba. Zekariya kaweriti mwiwuka gwakuyi gwa kwanja, Yediaeli gwa pili na Zebadia gwa tatu na Yatiniyeli gwa msheshi, 3 Eramu gwa mhanu, Yohanani gwa sita na Eliehoenia gwa saba.

4 Viraa kuweriti na Obedi Edomu, mweni Mlungu kamtekeliriti kwa kumpanana wana wanani. Shemaya mwiwuka gwakuyi gwa kwanja, Yehozabadi gwa pili, Yowa gwa tatu, Sakari gwa msheshi, Netaneli gwa mhanu, 5 Amieli gwa sita, Isakari gwa saba na Peuletai gwa nani. 6 Mwana gwakuyi shemaya kapatiti wana wapalu yawaweriti na ukulu mukaya ya tati gwawu, toziya waweriti wapalu wayapananitwi ligoya. 7 Wana wa Shemaya waweriti sita. Otini na Refaeli na Obedi na Elizabadi na Elihu na Semakia. Walongu wakuyi waweriti makambaku. 8 Woseri awa waweriti wana wa Obedi Edomu, pamuhera na wana wawu na walongu wawu, waweriti wantu wagangamala yawaweza kutenda lihengu. Wiwuka woseri wa Obedi Edomu waweriti sitini na wawili. 9 Meshelemia kaweriti na wana na walongu wakuyi, wantu wana uwezu wa lihengu ali lilongu na wanani. 10 Hosa yumu gwawu gwa wana wa Merari kaweriti na wana wamsheshi. Shimiri yakatenditwi mlonguziya na tati gwakuyi tembera kawera ndiri shipanta njira, 11 Hilikiya gwa pili, Tebaliya gwa tatu na Zekariya gwa msheshi. Wana wapalu woseri wa Hosa pamuhera na walongu wakuyi waweriti lilongu na tatu.

12 Walolera awa walibagula muvipinga kulinganira na walonguziya wawu na womberi viraa wapangiwitwi lihengu munumba ya Mtuwa Mlungu handa Walawi wamonga. 13 Kila kaya pota kulola uvuwa wawu, wagalambuliti simbi kwa kusyagula ligomi lyoshi hawaliloleri. 14 Simbi ya kusyagula kulolera ligomi likulu lya kwagulawira mshenji imtulukira Shelemia. Shakapanu imonga imtulukira Zekaria mwana gwakuyi, yakaweriti mgambiziya kana luhala, su kulolera ligomi likulu lya kushana. 15 Obedi Edomu katulukilitwi na simbi ya kulolera ligomi likulu lya Kusika na wana wakuyi mumahanja. 16 Shupimu na Hosa watulukilitwi na simbi ya kulolera ligomi likulu lya kwaguzyeta mshenji kuligomi likulu lya Shaleketi munjira yayiweriti uwega wa panani. Ulolera utenditwi kwa kugalambuziyana. 17 Kila lishaka uwega wa kwagulawa mshenji kuweriti na walolera sita, kwaguzyeta mshenji walolera wamsheshi na kusika walolera wamsheshi, viraa kumahanja kutulitwi walolera wawiliwawili. 18 Mudamu guherepa guweriti uwega wa kwaguzyeta mshenji, kuweriti na walolera wamsheshi mnjira na walolera wawili kumdamu kweni. 19 Avi ndo vipinga vya walolera muwamu mwa lukolu lwa kora na Merari.

20 Muwamu mwa Walawi, Ahiya kaweriti na ulolera wa luhanja lwa numba ya Mlungu na luhanja lwa vintu vyavilumikitwi. 21 Kulawa kaya ya Ladani, lukolu lwa Gerishoni, Yehieli kaweriti mlonguziya gwawu.

22 Wana wa Yehieli, Zetamu na Yoeli, waweriti wagolokera wa luhanja lwa numba ya Mtuwa Mlungu. 23 Viravilii mahengu ga numba nkulu gabagulwa kwa wantu wa nkolu za Amramu na Waishari na Waheburoni na Wauzieli.

24 Shebueli, mwiwuka gwa Gerishoni na mwana gwa Musa kaweriti mlolera mkulu gwa hanja azi. 25 Na mlongu gwakuyi, kaweriti Eliezeri yakaweriti tati gwakuyi Rehabia, mwana gwakuyi Yeshaya, mwana gwakuyi Yoramu mwana gwakuyi Zikiri mwana gwakuyi Shelomiti. 26 Shelomiti na walongu wakuyi, ndo yawaweriti walolera wa hanja zoseri za vintu vyavilumikitwi na mfalumi Dawudi na wakulu wa kaya na walonguziya wa maelufu na mamiya na wakulu wa mashonta. 27 Walumikiti seemu ya lopola zawalopoliti kunkondu kwajili ya manyawa ga numba nkulu ya Mtuwa Mlungu. 28 Viraa, vintu vyoseri vyavilumikitwi na Samueli mlola na vintu vyoseri vyavilukitwi na Sauli mwana gwa Kishi na vintu vyoseri vyavilumikitwi na Abineri mwana gwa Neri na vintu vyoseri vyavilumikitwi na Yoabu mwana gwa Seruya, viweriti pasi pa ulolera wa Shelomiti na walongu wakuyi.

29 Muwamu mwa Waishari, Kenania na wana wakuyi wapananitwi mahengu ga ukolamlima, kuwera walonguziya wa wantu toziya ya Waisraeli.

30 Muwamu mwa Wahebuloni, Hashabiya na walongu wakuyi elufu yimu miya saba, wantu woseri yawapananwa ligoya wapananitwi mahengu ga kugolokera pahala pa Israeli yapaweriti uwega wa kwaguzyetera mshenji mwa lushemba Yoridani. Wagolokiliti mahengu goseri ga Mtuwa Mlungu na mahengu ga mfalumi Dawudi. 31 Muwamu mwana Wehebuloni, Yeria kaweriti mkulu gwa nkolu na kaya yawu, na mushinja sha arubaini sha ukolamlima wa mfalumi Dawudi, ulolalola utenditwi na wantu wana uwezu mkulu wapatikaniti aku Yezeri mu Gileyadi. 32 Mfalumi Dawudi kamsyaguliti Yeriya na walongu wakuyi elufu mbili miya saba, yawapananitwi ligoya na wakulu wa nkolu, kugolokera mirandu yoseri yamweni Mlungu na mfalumi Dawudi pahala pa Warubeni, Wagadi na nusu ya likabila lya Manasi, yawaweriti kwagulawa mshenji mwa lushemba Yoridani.