1 Awa ndo wapalu yawaweriti pamuhera na Dawudi aku Sikilagi, pakaweriti kalififa toziya ya mfalumi Sauli mwana gwa Kishi, waweriti muwamu mwa wanjagila makambaku yawamtangiti kunkondu. 2 Awa waweriti wantu wa likabila lya Benjamini ntambu yakawera Sauli. Waweriti waguma upindi wagangamala na waguma mabuhi kwa luwembelu kwa kutendera mawoku goseri ga kumliwu na kumshigi. 3 Awa ndo Ahiezeri, yakatangitwi na Yowashi, woseri waweriti wana wa Shemaya kulawa Gibea, wamonga ndo Yezieli na Peleti, wana wa Azimaweti na Beraka na Yehu kulawa Anatoti, 4 Ishimaia kulawa Gibiyoni, muntu shikambaku muwamu mwa walii selasini na mkulu gwawu viraa pamuhera na Yeremiya na Yahazieli na Yohanani na Yozabadi kulawa Gedera, 5 Eluzai na Yerimoti na Bealia na Shemaria na Shefatiya na Mharufi, 6 Elikana na Ishia na Azareli na Yoezeri na Yashobeamu kulawa lukolu lwa Kora 7 na Yoela na Zebadia na wana wa Yerohamu, kulawa Gedori.

8 Kayi, wantu kulawa likabira lya Gadi waweriti pamuhera na Dawudi kuliboma kushiwala kulii. Awa waweriti wanjagila wana makakala wazowelera, wagangamala kwa nkondu na kutendera ngawu na migoha na wana vyeni vya kutiliziya handa simba na wayewuka handa swala kumigongu. 9 Mlonguziya gwawu mkulu kaweriti Ezeri na gwa pili Obadiya na gwa tatu Eliyabu, 10 gwa msheshi Mishimana na mhanu Yeremiya, 11 gwa sita Atai na gwa saba Elieli, 12 gwa nani Yohanani na gwa tisa Elizabadi, 13 gwa lilongu Yeremiya na gwa lilongu na yumu Makibanai. 14 Wagadi awa, waweriti wakulu wa mashonta. Kulinganira na ukulu wawu, mpusu kagolokeriti shipinga sha wamashonta miya na mkulu kagolokeriti shipinga sha wamashonta elufu yimu. 15 Awa ndo wantu yawalokiti lushemba Yoridani mumwezi gwa kwanja, lushemba paluweriti lumema ng'anji wega zoseri na kuwapalasiya wantu kwagulawa mshenji na kwaguzyeta mshenji mwa lushemba.

16 Wantu wamu kulawa likabira lya Benjamini na Yuda vilavilii wiziti kuliboma pakaweriti Dawudi. 17 Dawudi kalawa kunja kwiza kuwanka na kawagambira, "Handa mwiza kwa neni handa waganja su kuntanga niwanka kwa moyu goseri, Kumbiti handa mwiza kungalambuka kwa wankondu wangu na neni hanenitendi likontola lyoseri, Mlungu gwa watati wetu kaguwoni mlandu agu na kawatozi." 18 Shakapanu Rohu kamwiziriti Amasai, mkulu gwa wantu selasini awa na yomberi kalonga.

"Twenga twa wantu waku, gwee Dawudi,

twa uwega waku, gwee mwana gwa Yese!

Ponga, ponga iweri kwa gwenga,

na ponga iweri kwa yoseri yakakutanga!

Nakaka Mlungu gwaku ndo yanakakutangi."

Shakapanu Dawudi pakawankiti na kuwatenda wakulu mulishonta lyakuyi.

19 Mashonta wamonga wa likabila lya Manasi waweliti pamuhera na Dawudi, shaka Dawudi pakalikoliti na Wafilisti kugenda kulikomanga na Sauli. Kumbiti ata hangu, wawatangiti ndiri toziya wakolamlima waligambiziyaniti wamwingi kawuyi Sikilagi pawalonga, "Hatuliponzi toziya hakatutoloki kawuyi ukaya kwa mtuwa gwakuyi Sauli." 20 Shaka Dawudi pakaweriti Sikilagi, wantu awa wa likabira lya Manasi waweriti pamuhera nayu. Adina na Yozabadi na Yediaeli na Mikaeli na Yozabadi na Elihu na Siletai. Kila yumu gwawu kaweriti mlonguziya gwa shipinga sha wantu elufu yimu mulikabira lya Manasi. 21 Wamtangiti Dawudi kulikomanga na shipinga shawankondu wakuyi wawiziti kumkomangiti, toziya woseri waweriti wamashonta na wakulu wa makambaku kulishonta. 22 Lishaka ata lishaka, wantu waweriti pamuhera na Dawudi kumtanga, upeleru wakuyi kawera na lishonta likulu nentu, handa lishonta lya Mlungu.

23 Ayi ndo walanga ya vipinga vya wamashonta wana vintu vya kulikomangira yawaweriti pamuhera na Dawudi aku Hebroni su kumpanana ufalumi kulawa kwa Sauli, kulinganira na shisoweru sha Mtuwa Mlungu. 24 Wantu wa likabira lya Yuda yawaweriti na migowa na ngawu, waweriti elufu sita miya nani. Woseri waweriti kala kwa nkondu. 25 Wamashonta kulawa likabila lya Simioni, wantu elufu saba miya yimu vikambaku yawavimana nentu nkondu. 26 Wamashonta kulawa likabila lya Lawi. Waweriti elufu msheshi miya sita 27 Pamuhera na Yehoyada gwa wiwuka wa Aruni na wayaguyi. Waweriti elufu tatu miya saba. 28 Pamuhera na Sadoki, mntemba shikambaku kunkondu, yomberi pamuhera na wakulu wa mashonta ishilini na wawili kulawa mukaya yakuyi. 29 Mashonta kulawa likabila lya Benjamini, lyeni vilaa likabila lya Sauli. Wantu elufu tatu. Wavuwa wawu wasigaliti waminika kwa kaya ya Sauli mpaka panu pawamgenderiti Dawudi, 30 Mashonta kulawa likabila lya Efraimu. Wantu ishilini elufu miya nani, wantu vikambaku nentu kayi wamanika munkolu zawu, 31 Mashonta kulawa nusu ya likabila lya Manasi yawaweriti kwaguzyetera mshenji. Wantu lilongu na nani elufu, yawakantitwi matawu su wizi kumlumika Dawudi kaweri mfalumi. 32 Mashonta kulawa likabila lya Isakari, wakulu miya mbili pamuhera na walongu wawu yawaweriti wawalonguziya. Wakulu awa waweriti na mahala ga kumana mirandu ya shaka na wamaniti shawafiluwitwi Waisraeli kutenda. 33 Mashonta kulawa likabila lya Zabuloni. Wantu elufu hamusini, waminika na wazowelera wa nkondu. Walitanditi na vintu vya kulikomangira nkondu za kila ntambu, nfiru yawu iweriti ndo kumtanga hera Dawudi. 34 Mashonta kulawa likabila lya Nafutali. Wakulu wa mashonta elufu yimu na wantu selasini na saba elufu yawaweriti na ngawu na migoha. 35 Mashonta kulawa likabila lya Dani. Wantu elufu ishilini na nani miya sita yawaweriti na vintu vya kulikomangira wawera kala kwa nkondu. 36 Mashonta kulawa likabila lya Asheri. Wantu elufu alubayini yawaweriti kala kwa nkondu. 37 Mashonta kulawa likabila lya Warubeni, Wagadi na nusu ya likabila lya Manasi kulawa kumwambu kulushemba Yoridani. Wantu laki yimu ishilini elufu wana kila ntambu ya vintu vya kulikomangira vya nkondu.

38 Wamashonta woseri awa, yawalitanditi kala kwa nkondu, wagenditi Hebroni na nfiru yawu nkulu iweriti kumlumika Dawudi kaweri mfalumi gwa Israeli yoseri. Na wantu woseri wa Israeli, viraa waweriti pamuhera na nfiru yimu ya kumlumika Dawudi kaweri mfalumi.

39 Su walikaliti na Dawudi kwa shaka sha mashaka matatu, pawaliya na kulanda toziya walongu wawu waweriti wawatandira kala viboga. 40 Nentu ya aga, wapakwegera wawu na ata wa kutali handa aku Isakari na Zebuluni na Nafutali, wawajegeriti viboga vyawapapiti kwa mupunda na ngamiya na pundafarasi na ng'ombi. Wawajegeriti ubumu, mabumunda ga tini na visana ya zabibu iyuma na divayi na lipaki na ng'ombi na kondolu wavuwa. Vilavilii kuweriti na viboga vivuwa, toziya kwaniti nemeleru Muisraeli.