1 Shakapanu mfalumi Hiramu gwa Tiro kawalagalira walagilagi kwa Dawudi na viraa kamjegiriti miyelezi na wanyawa yawanyawa kwa mabuwi na wasongola mtera, su wamnyawiri liboma yomberi. 2 Hangu, Dawudi kavimaniti handa Mtuwa Mlungu kamgangamaziya yomberi kaweri mfalumi gwa Israeli na kuwera ufalumi wakuyi utekelerwa nentu toziya ya wantu wa Israeli. 3 Aku Yerusalemu, Dawudi kayugiti wadala wamonga nentu, yomberi kawiwula wana wavuwa wapalu na wahinga wamonga. 4 Aga ndo matawu ga wana yakawiwuliti aku Yerusalemu, Shamua na Shobabi na Natani na Selemani, 5 Ibihari na Elishua na Elipeleti, 6 Noga na Nefegi na Yafia, 7 Elishama na Beeliada na Elifeleti.

8 Wafiristi pawapikaniriti handa Dawudi kwitirwa lipaki kuwera mfalumi gwa isi yoseri ya Israeli, wamashonta wawu wawukiti kwa uvuwa kugenda kumsakula, kumbiti Dawudi kapatitikala visoweru, kawukiti kugenda kulikomanga nawa. 9 Wafiristi pawasokiti mululalanda lwa Refaimu wanja kuwapoka wantu vintu vyawu kwa makakala. 10 Hangu Dawudi ndo pakamkosiyiti Mlungu shakutenda. "Hashi, ng'endi kuwakomanga Wafiristi? Hashi, haguntendi niwakanki?" Na Mtuwa Mlungu kamgambira, "Gugendi, hanikupanani ukanka."

11 Hangu Dawudi na wantu wakuyi wakweniti mpaka Baali Perasimu, kawakanka aku. Shakapanu kalonga, "Mlungu kapita kwa makakala pakati pa wankondu wa neni kwa liwoku lyangu, handa malawa ga mashi yagagenda kalongola." Su pahala palii wapashemiti Baali Perasimu. 12 Wafilisti pawatiriti, walekiti vinyagu vya wamlumgu wawu aku na Dawudi kalagaliriti ilunguziwi motu.

13 Katepu Wafiristi wawapokiti mululalanda alu kawili kayi, 14 Hangu Dawudi kamkosiyiti kayi Mlungu, Mlungu kamgambira, "Naguwakomanga lishonta lya Wafiristi kulawira kulongolu kwawu, ila guwazyengeti na kuwakomanga kulawira kumbeli kwawu, kulongolu kumitera ya miforosadi. 15 Katepu pagupikanira mlindimiru gwa mashonta yawapita kumpeleru za mitera ya miforosadi ayi, su gulawi kalongola kuwakomanga. Haweri kala nikulongolera kulikomanga lishonta lya Wafiristi." 16 Dawudi katenditi ntambu yakalagaliritwi na Mlungu. Kalikomanga lishonta lya Wafiristi kwanjira Gibeoni mpaka Gezeri. 17 Hangu Dawudi kamanika kuisi yoseri na Mtuwa Mlungu kawatenda wantu wa isi zoseri zimtira yomberi.