1 Su Dawudi kalonga, "Panu ndo pahala numba ya Mtuwa Mlungu hayinyawiwi na viraa shitalawanda sheni wantu wa Israeli hawalaviliri tambiku ya kulunguziwa."

2 Hangu Dawudi kalagalira wahenga yawalikala muisi ya Israeli wajojoniki na yomberi kawatuliti mulihengu. Kawatuliti wasongola mbawu wasongoli weri mabuwi ga kunyawira numba ya Mlungu. 3 Dawudi kalaviyiti vyuma vivuwa vya kunyawira misumali na vitatiru vya kuwungira migomi ya numba na katulira shaba ivuwa yayiwalangika ndiri. 4 Viraa kalaviyiti magogu ya mielezi yayiwalangika ndiri, toziya Wasidoni na Watiru waweriti wamjegera Dawudi, walanga ivuwa ya mielezi. 5 Dawudi kalonga, "Numba yeni mwana gwangu Selemani yanakamnyawiri Mtuwa Mlungu hayiweri ya uherepa nentu na kuzyumika na wantu wa isi zoseri. Kumbiti toziya yomberi kankali mntemba na kazowelera ndiri, shondi nimtenderi matandiru." Hangu su, Duwudi katulira vintu vivuwa nentu vya kunyawira pamberi hakeni howi. 6 Shakapanu Dawudi kamshemiti Mwana gwakuyi Selemani na kamlagalira kamyawiri numba nkulu Mtuwa Mlungu, Mlungu gwa Israeli. 7 Dawudi kamgambira Selemani, "Mwana gwangu, mumoyu mwangu nfiriti kumnyawira numba nkulu Mtuwa Mlungu, Mlungu gwangu su nimguwiri. 8 Kumbiti Mtuwa Mlungu kang'ambiriti, gwenga gwita mwazi guvuwa na kulikomanga nkondu ivuwa. Toziya ya mwazi guvuwa gwagwititi, hapeni gunyawiri numba. 9 Ata hangu, hagupati mwana, mweni hakakolimlima kwa ponga toziya hanimtendi kalikali kwa ponga na wankondu wakuyi woseri wa wapakwegera, Litawu lyakuyi hakaweri Selemani, toziya mumashaka ga ukolamlima wakuyi, hakayijegeri Israeli ponga na kunyamalira. 10 Yomberi hakanyawiri numba toziya ya kunguwira. Hakaweri mwana gwangu neni haweri tati gwakuyi na wiwuka wakuyi hawayikolimlima Israeli mashaka goseri. 11 Vinu, mwana gwangu Mtuwa Mlungu, Mlungu gwaku na kaweri pamuhera na gwenga su guwezi kumnyawira numba ntambu yakalongiti. 12 Mtuwa Mlungu kakupanani luhala na umani shaka pakakupa ufalumi kuwalonguziya Israeli, gukoli malagiru ga Mtuwa Mlungu, Mlungu gwaku. 13 Pagulilolera weri na kuzijimira lagiru zyeni Mtuwa Mlungu yakamlagalira Musa kuwapanana Waisraeli, hagufanikiwi. Nagutwezuka, guweri mgangamala. Nagutira pota kwinginika. 14 Nkamalila nentu su kupata vintu toziya ya numba ya Mtuwa Mlungu, tani laki yimu za zahabu, tani milioni yimu za feza na walanga yayipimika ndiri ya shaba na shuma, zivuwa nentu. Ntanda kala mbawu na mabuwi. Kumbiti gufiruwa kongera. 15 Gwana watenda lihengu wavuwa. Kwa wasongola mabuhi, wasongola mbawu na mafundi wa kila ntambu yawavimana kutenda lihengu, 16 wa kuponda vintu zahabu na vintu vya feza na vintu vya shaba na vintu vya lyuma. Vinu gwanji mahengu! Na Mtuwa Mlungu na kaweri pamuhera na gwenga!"

17 Shakapanu Dawudi kawalagalira wakulu woseri wa Waisraeli wamtangi Selemani mwana gwakuyi, pakalonga, 18 "Hashi, Mtuwa Mlungu, Mlungu gwenu kapamuhera na mwenga ndiri? Hashi, hakeni wapanani ponga muwega zoseri? Yomberi kantenda niwakanki wantu woseri yawalikala isi ayi na vinu wakolamlimwa na mwenga pamtangwa na Mtuwa Mlungu. 19 Vinu, mmutenderi Mtuwa Mlungu, Mlungu gwenu, kwa nfiru na moyu goseri. Aya su! Mmunyawiri Mtuwa Mlungu pahala pananagala su lisandiku lya lipatanu lya Mtuwa Mlungu pamuhera na vyombu vyoseri vinanagala yavitenderwa mukuguwira, vituluwi mngati mwa vyumba vyamnyawiti toziya ya Mtuwa Mlungu."