1 Pakwanja pa shinja sha syayi shawu, shaka wafalumi kugenda kunkondu, Yoabu kalongoziyiti lishonta na kulopola isi ya Waamoni, viraa kagenda kuguzyengeta na kagukomangiti na kuguhalibisiya Raba. Kumbiti Dawudi kasigaliti aku Yerusalemu. 2 Yomberi Dawudi katoliti lijenjeri lya mlungu gwawu Milikomu pamtuwi pakuyi na lijenjeri ali liweriti na utopa wa kilu selasini na msheshi za zahabu na mngati mwakuyi muweriti na mabuwi ga beyi nkulu. Na Dawudi kalitoliti kaherepiziya lijenjeri lyakuyi. Viraa katoliti kwa makakala vintu vivuwa kulawa mumji agu. 3 Shakapanu kawatoliti wantu yawaweriti amu, watendi lihengu kwa misumenu, sululu za shuma na mawagu. Hangu ndo ntambu yakatenditi miji yoseri ya Waamoni. Shakapanu Dawudi na wantu woseri wawuya Yerusalemu.

4 Shakapanu kulawiriti nkondu na Wafiristi aku Gezeri. Sibekai kulawa Hushati kamlagiti Sipai, yakaweriti yumu gwa wiwuka wa Warefai yawaweriti makambaku na Wafiristi wasinditi.

5 Kulawiriti kayi nkondu imonga na Wafiristi, Elihanani mwana gwa Yairi kamlagiti Lahimi mlongu gwakuyi Goliyati kulawa Giti, mweni mhanya gwa mgowa gwakuyi, guweriti mkulu handa gwa mtera gwa kufumira.

6 Shakapanu kulawiriti nkondu yimonga kayi aku Gati kweni kuweriti na muntu yumu kaweriti na nshimba nkulu na vyala sita kila liwoku na vyala sita kila ligulu, walanga yakuyi ya vyala iweriti ishilini na msheshi. Yomberi viraa kaweriti mwiwuka gwa makambaku. 7 Yomberi pakawigiriti Waisraeli, Yonatani mwana gwa Shimea, mlongu gwa Dawudi, kamlagiti.

8 Makambaku awa watatu yawalagitwi na Dawudi na wamashonta wakuyi waweriti wiwuka wa makambaku aku Gati.