1 Pagusokiti mwezi gwa saba wantu woseri wa Israeli waweriti walikala kala mukaya mwawu. Shakapanu wantu woseri, wajojonika pamuhera kumji gwa Yerusalemu pakwegera na Ligomi likulu lya Mashi. Wamgambira Ezra yakamana lagiru kajegi shitabu sha lagiru lya Musa, Mtuwa Mlungu shakawalagaliriti Waisraeli. 2 Hangu mtambika Ezra, kagenda na kushijega shitabu sha lagiru, kashijegiti kulongolu kulijojonika lyoseri, wapalu kwa wadala, kila yumu yakaweriti na uwezu wa kupikaniliti lagiru ali. 3 Ezra kawasomeri lagiru lya Musa kulongolu kuluwaga lwaluwera kulongolu kuligomi likulu lwa mashi kulawa mandawira mpaka paluwala. Wantu woseri waweriti kala kupikinira shitabu sha lagiru.

4 Mlemba Ezra kagoloka panani pa shintambi sha mitera yashinyawitwi kwa toziya ayi. Pakwegera na yomberi uwega wa kumliwu kagolokiti Matitiya na Shema na Anaya na Uria na Hilikia na Maaseya. Uwega wakuyi wa kumshigi kagolokiti Pedaya na Mishaeli na Milikia na Hashumu na Hashibadani na Zekariya na Meshulamu.

5 Ezra kagolokiti panani pa shintambi sha mtera na wantu woseri pawamlola, pakashivuguliti shitabu shilii sha lagiru, wantu woseri wagoloka. 6 Ezra kalonga, "Gukwiswi Mtuwa Mlungu, Mlungu Mkulu."

Wantu woseri wanyasula mawoku gawu na kwitikira "Yina! Yina!" Shakapanu wamguwira Mtuwa Mlungu agawu wasuntamala pasi.

7 Shakapanu wansuntamala na kugoloka pahala pawu, walawi awa wawatangiti wantu kuzimana weri lagiru. Walawi awa waweriti Yeshua na Bani na Sherebia na Yamini na Akubu na Shabetai na Hodia na Maaseya na Keliti na Azaria na Yozabadi na Hanani na Pelaya. 8 Wasomiti weri lagiru za Mlungu na wawagambiziyiti wantu kwa njira yeni wantu woseri mewawezi kushimana.

9 Wantu pawapikaniliti lagiru, ziwingiriti mumiyoyu yawu, wantu woseri wanjiti kulira. Hangu Nehemiya yakaweriti mkolamlima na Ezra mtambika na mlemba, pamuhera na Walawi wawafunditi wantu na wawagambiriti wantu woseri, "Lishaka ali ndo lishaka linanagala kwa Mtuwa Mlungu, Mlungu gwenu, namdaya na kulira. 10 Nehemia kalonga, Mgendi mwakaliyi shiboga shiherepa na mlandi yashiwera shinoga na mmupanani ulii yakahera shintu toziya leru ndo lishaka linanagala kwa Mtuwa Mlungu. Namhinginika, toziya nemeru yakakupananani Mtuwa Mlungu hayiwapanani makakala."

11 Hangu Walawi wawagendiriti na wawagambira wantu waleleki kulira, "Toziya lishaka lya leru ndo linanagala nawahinginika." 12 Shakapanu Wantu woseri wawuya ukaya kwawu kuliya na kulanda, agawu pawanemelera na kuwabagulira shiboga wamonga toziya wagamaniti goseri gawagambilitwi.

13 Shilawu yakuyi, wakulu wa nkolu pamuhera na Watambika na Walawi wajojonika kwa Ezra, su walifundi lagiru. 14 Wayambuliti handa, ilembwa mushitabu sha lagiru sheni Mtuwa Mlungu kampananiti Musa, handa wantu wa Israeli wafiruwa kulikala muvisasa vyawu mumsambu gwa mwezi ga saba. 15 Hangu wabwera mumji yawu yoseri na aku Yerusalemu, pawalonga, "Mgendi muvigongu na muwuyi na ntambi za mizeyituni na mizeyituni ya kuntundu na mihadasi na mitendi na vikwambikwambi na mitela yimonga ya kunyawira visasa, ntambu yayilembitwi."

16 Su, wantu wagenda kujega ntambi na walinyawira visasa kila yumu mushitwiku* shakuyi yashiweriti lalanda, na kuluwaga lwa numba yakuyi na kuluwaga lwa numba nkulu ya Mlungu na muluwaga lwa ligomi likulu lyalishemwa lya Mashi na kuluwaga lwa Ligomi Likulu lya Efraimu. 17 Wantu woseri yawawuyiti kulawa muhamisiwu wanyawa visasa vyawu walikaliti amu. Ayi iweriti mala ya kwanja wantu kulikala muvisasa kwanjira shaka sha Yeshua, mwana gwa Nuni pakaweriti kalikala. Wantu wanemeleliti nentu. 18 Kila lishaka, kwanjila lishaka lya kwanja mpaka lya upeleru, Ezra kawasomera wantu shitabu sha lagiru lya Mlungu. Watenditi msambu agu kwa shaka sha mashaka saba na lishaka lya nani kuweriti na lijojoniku likulu lya kutata msambu, ntambu yayilagalilitwi mushitabu sha lagiru.