1 Shaka ashi wapalu na wadala wawu walira nentu kwajili ya walongu wawu Wayahudi. 2 Wamu walongiti, "Twenga na wana wetu wapalu na wahinga twawavuwa, su mtupanani shiboga, tulii na twendereyi kulikala."

3 Wamonga walongiti, "Tugatula poni malambu getu, malambu ga mizabibu na numba zyetu su tupati viboga shaka ashi sha njala nkulu."

4 Viravilii kuweriti na wamonga yawaweriti walonga, "Tutoliti uwanda su kulipa kodi kwa mfalumi toziya ya malambu getu na malambu ga mizabibu. 5 Kumbiti twenga twateratera na Wayahudi wamonga na wana wetu ndo wana wawu. Hangu, twankuwakakanika wana wetu waweri wamanda na wamu wa wahinga wetu wawera kala wamanda. Twahera uwezu wa kulewelera mlandu agu toziya malambu ga twenga na malambu getu ga mizabibu gapokwa kwa makakala na wantu wamonga."

6 Pampikaniliti kulira kwawu na malalamiku aga, nkalaliti nentu. 7 Nilihola mumahala gangu na kuwashema wakulu na walonguziya. Niwagambira, "Mwankuwatabisiya walongu wetu kwa kuwatola shilii shashongeleka!"

Shakapanu niwashema wantu woseri pamuhera su niwatakuli. 8 Niwatakula hangu, "Tutenda ntambu yatuweza na tuwakombola walongu wetu Wayahudi yawaweriti washuwuzwa kwa maisi gamonga. Kumbiti vinu mwankuwashuwuza kayi walongu wenu, su twenga twawahemeri!" Womberi wanyamaliti jii, toziya weniti ndiri na shoseri sha kutakula.

9 Su nendereya kuwagambira, "Shamushitenda ndo shidoda, hashi mfiruwandiri mwenga kumjimira Mlungu na kumtendera maheri, su natusekwa na wankondu wetu wantu yawawerandiri wayahudi. 10 Neni na walongu wangu na wantu wangu twankuwazimira wantu mpiya na viboga. Hangu tuleki kutola shashongereka. 11 Muwawuziliri kalongola malambu gawu na malambu gawu ga mizabibu na malambu gawu ga mizeyituni na numba zawu, viraa riba ya mia yamtola mumpya na viboga na divayi yasyayi na lipaki lya mizeyituni." 12 Womberi witikira na kulonga, "Hatuwawuziliri na hapeni tuwashongi shoseri. Hatutendi ntambu yagulongiti."

Shakapanu niwashema watambika wakulu woseri, walilapa kulongolu kwa wakulu na watambika kutenda ntambu yawalongiti. 13 Shakapanu mpunta lufunga lwaluweriti mushunu shangu na kulonga, "Mlungu kampunti ntambu iraa kila muntu na numba yakuyi na lihengu lyakuyi, yanakaleki kutenda shilii Shatujimiraniti. Hangu kampuntwi na kalikali kahera shintu nakamu."

Na lijojoniru lyoseri lijimira, "Yina." Kamzyuma Mtuwa Mlungu. Wantu watenda ntambu yawalongiti.

14 Kwanjira shaka ashi, Pasyagulitwi kuwera mkolamlima gwa isi ya Yuda kwa vinja lilongu na mbili kwanjira shinja sha selasini na mbili sha ukolamlima wa mfalumi Aritashasta, neni pamuhera na walongu wangu tuliyandiri shiboga sheni shakaliyiti mkolamlima. 15 Wakolamlima yawalongoleriti waweriti shisanka shizotopa kwa wantu wafiriti wantu wawapanani viboga na divayi, wawafiriti walaviyi vipandi alubaini vya madini ga feza. Ata wantumintumi wawu wawatabisiyiti wantu. Kumbiti neni ntendandiri hangu, toziya nimtiriti Mlungu. 16 Nililaviya mulihengu lya kunyawa kayi shibambaza ashi na nilipanana ndiri ata lirambu. Ata wantumintumi wangu woseri wajojonikiti toziya ya lihengu. 17 Nentu ya aga, neni ndiyiti pamuhera na Wayahudi miya yimu na hamsini na wakulu na walii yawatwiziliti kulawa maisi gapakwegera na twenga. 18 Kila lishaka, su kuwaliyiziya wantu awa, niwalikitula ng'ombi shipalu yumu na kondolu sita waherepa na nkuku. Pagapita mashaka lilongu ndaviyiti divayi ya kila ntambu. Kumbiti neni nemiti wantu wampanani shiboga sha mfalumi toziya nivimaniti wantu wakakanikitwi kulaviya vintu.

19 Vinu, gwee Mlungu gwangu, guliholi maheri gangu goseri ganiwatenderiti wantu awa.