1 Mulishaka ali lya msambu shitabu sha lagiru lya Musa shibetulitwi kwa liziwu likulu agawu wantu woseri pawapikanira. Amu iwonekaniti ilembwa handa kwahera wantu wa Amoni pota wantu wa Mowabu yakafiruwitindiri kwingira mulijojoniru lya wantu wa Mlungu, 2 toziya wantu wa Israeli pawaweriti mumwanja kulawa Misri, Waamoni na wamoabu wawapananitindiri mashi na shiboga kumbiti womberi wamshemiti Balaamu kuwapangira Waisraeli, kumbiti Mlungu gwetu kagalambula pangira ayi kuwera ntekelera. 3 Wantu wa Israeli pawapikaniriti lagiru ali, wawabaguliti wahenga.

4 Pamberi pa lishaka lya msambu, mtambika Eliashibu kaweriti katulwa kuwera mgolokera gwa vyumba vya kutulira vintu vya Numba nkulu ya Mlungu gwetu, toziya Eliashibu kaweriti ganja gwa pakwegera na Tobiya, 5 Eliashabu kaweriti kampanana Tobiya shumba shikulu sheni pakwanja shiweriti shitenderwa kutulira tambiku za viboga, ubani na vyombu vya numba nkulu ya Mlungu, pamuhera na lifungu lya lilongu lya viboga, divayi ya syasyi na lipaki. Vintu vyoseri avi walagaliritwi Waisraeli kwajili ya Walawi, yawimba na walolera wa Numba Nkulu ya Mlungu, pamuhera na malaviwu toziya ya watambika. 6 Kumbiti goseri aga pagaweriti gankutendeka, neni weritindiri Yerusalemu, toziya mushinja sha selesini na mbili sha kukolamlima wa Arishasasta mfalumi gwa Babeli weriti mbuya kwa mfalumi kumgambira gagalawiriti. Shakapanu nimluwiti mfalumi mbuyi kayi Yerusalemu. 7 Pambuyiti Yerusalemu, moniti mlandu mkontola gwakalitenditi Eliashibu kumpanana Tobiya shumba muvyumba vya Numba nkulu ya Mlungu. 8 Nkalaliti nentu nividankira kunja vyombu vyoseri vya Tobiya. 9 Shakapanu ntagaliriti wantu wavitakasiyi vyumba, shakapanu niviwuziyiti amu vintu vya Numba ya Mlungu, pamuhera na tambiku za viboga na utuli.

10 Viraavirii nyambuliti kuwera Walawi wapananitwindiri mafungu gawu, hangu Walawi woseri na yawimba yawaweriti muutenderu wawuya mumalambu gawu. 11 Niwakalipiliti wakulu na kuwakosiya, "Ntambu gaa Numba Nkulu ya Mlungu ilekwa?" Su niwashemiti woseri na nimtula kila muntu mulihengu lyakuyi. 12 Shakapanu, wantu woseri wa Israeli, wanjiti kayi kujega mafungu gawu ga lilongu ga ubumu na divayi na lipaki lya mizeyituni kushumba sha kutulira vintu. 13 Niwasyagula wantu awa waweri walolera wa vyumba vya kutulira vintu, mtambika Shelemiya na muntu yakamana Lagiru, Sadoki na Pedaya muntu gwa likabila lya Lawi kuwera mgolokera gwa shumba sha kutulira shintu na kumtula Hanani mwana gwa Zakuri, mwana gwa Mataniya, yomberi kaweri kankuwatanga, toziya wantu awa wawoneka kuwera waminika na lihengu lyawu liweriti kuwabagulira vintu walongu wawu.

14 Gwee, Mlungu gwangu, guholi kwa goseri aga, nagulyaluwa goseri galii gantenditi toziya ya Numba Nkulu ya Mlungu na toziya ya tendera yakuyi.

15 Mashaka aga mona wantu wa Yuda pawakama zabibu Mulishaka lya Koyera. Viraavirii wamonga waweriti wankuwapapiziya wapunda wawu ubumu, divayi, zabibu, tini na vintu vimonga vivuwa vyawajegiti Yerusalemu. Panu niwaberiziyiti nawashuhuza shintu Lishaka lya Koyera. 16 Wantu kulawa Tiro yawaweriti wankulikala Yerusalemu wajegiti wasomba na vintu vivuwa Yerusalemu na kuwashuwuzira wantu wa Yuda Lishaka lya Koyera. 17 Niwakalipiliti wakulu na wantu wa Yuda na kuwakosiya, "Ndo ukontola gaa awu yamuutenda kuligira Lishaka lya Koyera? 18 Hashi watati wenu watenditindiri mirandu ya ntambu ayi ata kumtenda Mlungu gwetu kujega ntabiku zoseri azi kwa twenga muisi ayi? Vinu mwankali mwankujega maya gakuyi kwa wantu wa Israeli kwa kuligiranga Lishaka lya Koyera."

19 Hangu niwalagaliriti migomi mikulu ya Yerusalemu itatwi pashimii Shaka sha Koyera, palii luwindu palwingira na migomi ayi ivugulwi mpaka lishaka lya Koyera palipera. Shakapanu ntula wantu wangu kumigomi mikulu su nashingiziwa shintu shoseri mulishaka lya Koyera. 20 Mala yimu ama mbili washuwuzi na wawuza vintu vya ntambu zoseri wagonjiti kunja kumji gwa Yerusalemu. 21 Kumbiti niwaberiziyiti na kuwagambira, "Ntambu gaa mwankugonja pakwegera na shibambaza? Handa pamtenda hangu kayi, haniwakomangi." Kwanjira shaka shilii wizitindiri kayi Lishaka lya Koyera. 22 Niwalagalira Walawi walipungi na wizi kuyilolera migomi mikulu su lishaka lya Koyera liweri Linanagala.

Gwee Mlungu gwangu, gunholi toziya ya ali viraa na gwenga gunanguziyi ufiru waku mkulu.

23 Viraavirii mshaka ashi moniti Wayahudi yawayugiti wadala wa Ashidodi na Amoni na Mowabu, 24 na nusu ya wana wawu wayoweriti Kiashidodi na wasinditi kuyowera Shiyahudi kumbiti wayoweriti za wantu wamonga. 25 Niwakalipira na kuwapangira. Niwakomiti wamu wa wantu na kunika viri zawu. "Niwakakanika walirapi kwa litawu lwa Mlungu na kulonga, namuwayugiziya wahinga wenu kwa wana wawu, pota wahinga wawu nawayugwa na wantemba wenu pota maweni mwenga. 26 Hashi, mfalumi Selemani katendandiri vidoda kwa kuyuga wadala wa awa? Muisi zivuwa paweritindiri mfalumi handa yomberi. Na Mlungu kamfiriti nentu na kamsyaguliti kuwera mfalumi kwa Israeli yoseri, kumbiti wadala wa maisi gamonga wamtenditi katendi vidoda. 27 Hashi, tuwafati mwenga yamumtenderiti vidoda Mlungu, Mlungu gwetu kwa kuyuga wadala wa shihenga?"

28 Yumu gwa wana wa Yoyada, mwana gwa Eliashibu mtambika mkulu kamyugiti mhinga gwa Sanibalati yakalawiti Botihoroni, toziya ayi nimwingiti Yoyada kawuki Yerusalemu.

29 Gwee Mlungu gwangu, guwaholi toziya watula uhumba utambika na lipatanu lya watambika na lya Walawi.

30 Hangu niwapungiti watambika na Walawi kulawirana na shoseri yashiweriti sha shihenga, shakapanu ntantiti malonguziya na niwapanana Watambika na Walawi su kila yumu katendi mahengu gakuyi. 31 Shakapanu ndagaliriti wantu wajegi mbawu mushaka shashifiruwa na malaviwu ga ubumu wa kwanja na mabwajubwaju ga kwanja mushaka shakuyi.

Gwee Mlungu, Mlungu gwangu guliholi goseri aga su guntenderi maheri.