1 Mulishaka lya ishilini na msheshi lya mwezi gulagulii gwa saba, wantu wa israeli wajojonikiti pamuhera, agawu pawaleka kuliya na kuvala nguwu za mafafa na kuliswaga lidikudiku mumituwi mwawu kulanguziya hinginika yawu. 2 Mashaka aga wiwuka awu wa Israeli walituliti gweka na wantu wayawawerandiri Wayahudi. Wagoloka pahala pawu na kulonga waleka vidoda vyawu na vidoda vya watati wawu. 3 Wagoloka pahala pawaweriti agawu pawasoma shitabu sha Lagiru lya Mtuwa Mlungu, Mlungu gwawu kwa masaa matatu na masaa matatu gamonga waweriti wankulonga waleka vidoda na kumguwira Mtuwa Mlungu, Mlungu gwawu.

4 Walawi awa waweriti wagoloka kulukweneru, yawagolokiti waweriti Yeshua na Bani na Kadimieli na Shebania na Buni na Sherebia na Bani na Kenani. Awa wamluwiti Mtuwa Mlungu, Mlungu gwawu kwa liziwu likulu.

5 Na Walawi awa Yeshua na Kadimieli na Bani na Hashabinea na Sherebia na Hodia na Shebania na Petahia wawagambiriti wantu;

"Mgoloki na mumzyumi Mtuwa Mlungu, Mlungu gwenu,

mumkwisi yomberi mashaka goseri.

Wantu walikwisi litawu lyakuyi linanagala,

lyaliwera liheri kuliku shintu shoseri shilii."

6 Ezra kamluwa Mlungu pakalonga,

"Gwenga gwekayaku ndo Mtuwa Mlungu,

Gwenga ndo yagunyawa mpindi na vyoseri vyaviwera amu,

bahari na vyoseri yaviwera amu

gwenga ndo yaguvitula ukomu,

na yawawera kumpindi wankukuguwira gwenga.

7 Gwenga ndo Mtuwa Mlungu, yagumsyaguliti Abramu

na kumlaviya kulawa Uri ya Wakalidayu

na yagumpaniti litawu lya Abrahamu.

8 Gwenga gumwona kuwera mwaminika kwaku

na gwenga gutenda lipatanu na yomberi

na kuwapanana wazyukulu wakuyi isi ya Wakanaani

na Wahiti na Waamori

na Waperizi na Wayebusi na Wagirigashi.

Gutenda shagulongiti toziya gwenga gwaminika.

9 Guwoniti ntabiku ya wambuyi wetu yawalikaliti aku Misri,

gupikinira kulira kwawu kubahali ya Shamu.

10 Gutenditi lilangaliru na makangashu kwa Farao,

wantumintumi wakuyi woseri na wantu woseri wa isi yakuyi,

toziya guvimaniti kuwera ntambu yawawatibisiyiti wambuyi wetu.

Na kulitenda gwenga gamweni gumaniki mpaka leru.

11 Guyibagula bahari kulongolu kwawu,

na womberi wapita pakati pa bahari, pahala payuma.

Na walii yawawafatiti kuwadibisiyiti mumashi matali

handa libuwi lizotopa ntambu yalilidiba mmashi gavuwa.

12 Paluwala guwalongoziyiti kwa lupanda lwa liwundi

na pashiru guwalongoziyiti kwa lupanda lwa motu su kuwamilikira munjira yakupiyira.

13 Kulii kulugongu Sinai gusulukiti kulawa kumpindi na kuyowera nawa.

Guwapanana malagalira gaherepa na lagiru yazifiruwa na za nakaka.

14 Kupitira ntumintumi gwaku Musa,

gulitenda Lishaka lyaku lya Koyera limanikani na womberi na guwalagaliriti wagafati malagalira na lagiru zaguwagambiriti.

15 Pawaweriti na njala, guwapananiti shiboga kulawa kumpindi.

Pawayumiruwiti

guwapananiti mashi kulawa kulitalawu.

Guwagambiriti kuyitola isi yaguweriti guwapanani.

16 Kumbiti womberi na wambuyi wetu wawera na mtiti

na wawera wankesela walema kufata malagiru gaku.

17 Walema kupikanira

na walyaluwa goseri gagutenditi na mauzauza gagugatenditi muwamu mwawu.

Wawera wankesela

na kwa mtiti gwawu wamsyagula mlonguziya gwawu su wawuyi Misri isi ya umanda.

Kumbiti gwenga ndo Mlungu yagulekeziya na gwana manemu na lusungu lutangala,

gukalalandiri kalongola na ndo gwana ufiru utangala, na gwenga guwalekandiri.

18 Ata pawalinyawiriti shinyagu sha ng'ombi mdidini na kulonga,

ayu ndo Mlungu gwetu yakatulaviyiti kulawa isi ya Misri,

vinu wakwigiriti gwenga.

19 Toziya gwenga gwana

lusungu lutangala guwalekandiri kushiwala.

Lupanda lwa liwundu lulekandiri kuwalonguziya munjira yawu paluwala,

pota lupanda lwa motu lulekandiri kuwamulikira pashiru njira yawafiruwitwi kuyipitira.

20 Guwapanana Rohu gwaku muheri su kuwafunda,

guwapanana mana kuwera shiboga shawu na mashi ga kulanda su kunyamaziya nyumiruwa zawu.

21 Kwa vinja alubaini guwalolera kushiwala,

guwapananiti kila shintu,

nguwu zawu zisakalandiri

magulu gawu pota kuvimba.

22 Guwatenditi wakanki na kuwapanana falumi na isi zimonga zazipakaniti nawa,

paguwabagulira mpaka isi zaziweriti kutali nentu.

Wayitola isi yakakolitimlima Sihoni mfalumi gwa Heshiboni

na isi ya kakolitimlima Bashani mfalumi gwa Ogu.

23 Guwatenda waweri wavuwa

handa ntondu za kumpindi,

guwalonguziya muisi yaguwagambilaga wambuyi wawu haguwapanani.

24 Hangu, wiwuka awu wiza na kuyitola isi ya Kanani,

na wawakankiti Wakanaani yawaweriti wenikaya wa isi ayi,

Wakanaani wawatula mumawoku mwawu,

pamuhera na wafalumi wawu na

wantu wawu na isi yawu su wantu wa Israeli wawatendi ntambu yawafira.

25 Walopoliti maboma na

litapaka lyana mbotu,

numba zyana vintu vivuwa viherepa

na manegu yagabawitwi,

malambu ga mizabibu na mizeyituni

pamuhera na mitera yana mabwajubwaju gavuwa. Hangu waliya na

kwikuta na kunenepera

na kunemelera vintu vyoseri vyaguwapananiti.

26 Kumbiti wakupikanirandiri na wakulema

na walekiti lagiru zaku.

Wawalaga wambuyi waku,

yawawaberiziyiti su wakuwuyiri gwenga,

na wakwigiriti gwenga nentu.

27 Hangu guwaleka wakomangwi na wankondu wawu, yawawatabisiyiti ng'anji.

Pawaweriti wankutabika wakulilira gwenga

na gwenga gupikanira kulira kwa womberi kulawa kumpindi.

Na guwawoneriti lusungu nentu, guwajegela wantu wa kuwalopola kulawa kwa wankondu wawu,

28 Kumbiti pawaweriti na ponga,

wakutenderiti kayi makontola agawu gwenga paguwona.

Na gwenga guwalekiti mumawoku mwa wankondu wawu

su wawakolimlima.

Pawakuliliti kayi, gwenga gupikaniriti kulawa kumpindi.

Na kwa lusungu lwaku guwalopola mala zitangala.

29 Guwakalapira su wajimiri lagiru zaku.

Kumbiti kwa mtiti gwawu, walekiti kujimira malagaliru gaku.

Tembera geni gamtenda muntu kaweri na makaliru maheri,

Womberi waweriti na mtiti na walemiti kukupikanira.

30 Guwahepelera kwa vinja vivuwa,

na kuwabeziya kwa njira ya rohu kupitira wambuyi waku,

kumbiti walishelandiri.

Hangu guwaleka wabatwi na wantu wa isi za pakwegera.

31 Kumbiti kwa lusungu lwaku lukulu,

guwalekandiri watenduwi nakamu ama kwaswa,

toziya gwenga ndo Mlungu gwana manemu na lusungu.

32 Vinu gwee, Mlungu gwetu, Mlungu mkulu,

yagwana makakala na yagutiliziya,

gwenga gulikola lipatanu lyaku lya ufiru uvuwa.

Nagulyaluwa ntabiku zyazitupatiti twenga na wafalumi wetu na wakulu wetu na watambika wetu na wambuyi wetu na

wazewi wetu na wantu waku woseri

kwanjira shaka sha wafalumi wa Ashuru mpaka leru.

33 Kumbiti ntabiku zoseri zyazitupatiti, guwera gwana nfiru,

gwee gwa mwaminika, agawu twenga tutenda vidoda.

34 Wafalumi wetu, wakulu wetu, watambika wetu na wazewi wetu

wakolandiri lagiru zaku,

watendandiri lagiru zaku pota makalapiru yaguwapananiti.

35 Wakutenderandiri muufalumi wawu, pota pawaganemeleriti maheri gaku gaguwapananiti kwa uvuwa,

muisi nkulu na litapaka lyana mbotu yaguwapananiti

kumbiti walemiti kukutendera na kuleka makontola.

36 Vinu guloli, leru twenga ndo wamanda, wamanda muisi yaguwapananiti wazewi wetu.

Isi yana mbotu.

37 Toziya ya vidoda vyatutenditi,

mabenangu gakuyi gavuwa gagenda kwa wafalumi yaguwatuliti watukolimlima.

Vilavilii wakolamlima mifugu yetu ntambu yawafira.

Twamuntabiku nkulu!"

38 "Kwa goseri aga, yagatulawiriti twenga wantu wa Israeli tutuliti lipatanu ligangamala lya malembu pamuhera na wakulu wetu na Walawi wetu na watambika wetu pawatula vimaniziya vyawu."