1 Mumwezi yagushemwa Nisani na shinja sha ishilini sha ukolamlima wa mfalumi Aritashasita, shaka divayi payiweliti kulongolu kwakuyi, ntoliti divayi ilii nimpanana, mfalumi kamonitindiri kuwera nana hinginika handa shaka ali. 2 Hangu Mfalumi Aritashasita kankosiya, "Ntambu gaa sheni shaku shiwoneka shana hinginika, gwenga gulwala ndiri? Mona gwinginika nentu mumoyu mwaku!"

Ndo pantiriti nentu. 3 Nimwankula, "Gwee mfalumi, gulikali mashaka goseri! Sheni shangu hashileki hashi kuwera na hinginika, shaka aku kumji gwa Yerusalemu yagawela masembi ga wambuyi wangu, mahami na migomi mikulu yakuyi ilunguziwa kwa motu?"

4 Mfalumi Aritashasita kang'ambira, "Vinu gufira nikutenderi shishi?"

Palapalii nduwa mumoyu mwangu kwa Mlungu gwa kumpindi. 5 Shakapanu nimgambira mfalumi, "Gwee mfalumi, payiwera gufiliziwa na neni na handa panjimiruwa kulongolu kwaku, nikuluwa guntumi ng'endi Yuda kumji gwa masembi ga wambuyi wangu su nigunyawi kayi."

6 Nayomberi mfalumi kankosiya agawu mdala gwakuyi pakawera pakwegera na yomberi, "Haguweri aku kwa shaka gaa na haguwuyi panu ndii?" Hangu mfalumi kandeka mbuki na neni nimgambira hambuyi ndii.

7 Viravilii, "Nimgambira mfalumi handa ikuherepera, nduwa mpananwi hamba su nizijegi kwa wakolamlima wa kumwambu mwa lushemba Eufurate su wanjimili mpiti mpaka muisi ya Yuda. 8 Viravilii nikuluwa gumlemberi luhamba Asafu mlolera gwa lidowi lya shifalumi su kampanani mbawu za kunyawira shizingiti mbawu zakunyawira migomi ya liboma lya numba nkulu ya Mlungu na mbawu za kunyawira shibambaza sha mji na numba yangu yanfilakulikala." Mfalumi kajimira luwa yangu toziya Mlungu kaweliti pamuhera na neni.

9 Mfalumi kaweriti kantuma pamuhera na wakulu wa mashonta na wakwena farasi. Su ng'enditi kwa wakulu wa isi za kumwambu kulushemba Eufrati, niwapananiti hamba za mfalumi. 10 Kumbiti Sanibalati yakalawa mji gwa Horoni na Tobia mlonguziya gwa wantu wa Waamoni na ntumintumi gwakuyi, pawapikiniliti kuwera niza su kutenda mlandu muheri kwa wantu wa Israeli, wanemeleritindiri mirandu ayi.

11 Hangu nsokiti Yerusalemu, nilikaliti aku kwa mashaka matatu, 12 su mbukiti pashiru, Neni pamuhela na wantu wadidini, nimgambirandiri muntu yoseri galii geni Mlungu kaweriti kagatula mumoyu mwa neni toziya ya mji gwa Yerusalemu. Nimtola ndiri shigongolu yoseri ila punda hera yanimkweniti namweni. 13 Ndawiti kunja pashiru kupitira ligomi likulu lya kululalanda nfata njira yayigenda kulinegu lyalishemwa lya Njoka na Ligomi likulu lya kulifunkusi, nivikaguliti vibambaza vya Yerusalemu vyavibomolitwi na magomi gakuyi geni yagaweriti galunguziwa kwa motu. 14 Shakapanu mpita kuligomi likulu lya mbwiru na kulitanda lya mfalumi. Punda kasinditi kupita toziya ya limatiru. 15 Pashiru palii, mpitiriti kululalanda na kulolera shibambaza sha mji. Mbuyiriti kayi kupitira Ligomi likulu lwa lulalanda.

16 Wakulu wavimanitindiri pahala pang'enditi pota shantenditi. Kayi weriti niwagambirandiri Wayahudi, watambika, walonguziya, wakulu pota wantu walii weni mewalitendi lihengu lwa kugunyawa kayi mji.

17 Shakapanu niwagambiriti, "Muwona ntambu yatutabika! Na mwona Yerusalemu ndo mahami na migomi mikulu yakuyi ilunguziwa kwa motu. Mwizi vinu tushinyawi kayi shibambaza sha Yerusalemu su natuwera kayi msoni." 18 Niwagambira Mlungu ntambu yakantendiriti maheri na shili mfalumi shakantendiriti.

Wanankula, "Aya! Na twanji kunyawa kayi." Hangu na womberi wanja lihengu ali liheri.

19 Kumbiti Sanibalati na Horoni na Tobiya gwa likabila lya Amoni na Geshemu muntu gwa likabila lya Arabu, pawapikaniriti, watusekiti na watujongera na kutubolera pawalonga, "Ndo shintu gaa ashi shamshitenda? Hashi, mumugalambuki mfalumi?"

20 Niwankula, "Mlungu gwa kumpindi hakatutangi tuwezi kutenda lihengu ali na twenga yatuwera wantumintumi wakuyi hatwanji kunyawa kayi. Kumbiti mwenga mwahela shenu pota shamfiruwa kupananwa mu Yerusalemu pota shintu sha kuholwa."