1 Ayi ndo walanga ya watambika na Walawi yawawuyiti kulawa kuuhamisiwu pamuhera na Zerubaberi mwana gwa Shealitieli na Yeshua,

Seraya na Yeremia na Ezra,

2 Amaria na Maluki na Hatushi, 3 Shekania na Rehumu na Meremoti, 4 Ido na Ginetoni na Abiya, 5 Miyamini na Moadiya na Biliga, 6 Shemaya na Yoyaribu na Yedaya, 7 Salu na Amoki na Hilikia na Yedaya.

Awa waweriti wakulu wa watambika na walongu wawu shaka sha Yeshua. 8 Awa ndo Walawi:

Yeshua na Binui na Kadimieli na Sherebia na Yuda, viraa Mataniya mweni kaweriti mgolokera gwa nyimbu za kulonga mayagashi pakatagwa na walongu wakuyi.

9 Bakibukia na Uno na walawi wayawu, wagoloka pakwegera nawa pawawimba na kwitikira.

10 Yeshua kamwiwuliti Yoyakimu na Yoyakimu kamwiwuliti Eliashibu na Eliyashibu kamwiwuliti Yoyada, 11 Yoyada kamwiwuliti Yonatani na Yonatani kamwiwuliti Yadua.

12 Yoyakimu pakaweriti mtambika mkulu, watambika waweriti wakulu wa nkolu zawu. Lukolu lwa Seraya kaweriti Meraya na lukolu lwa Yeremia kaweriti Hanania 13 Meshulamu kulawa lukolu lwa Ezra na Yehohanani kulawa lukolu lwa Amaria, 14 Yonatani kulawa lukolu lwa Maluki na Yosefu kulawa lukolu lwa Shekania kaweriti, 15 Adina kulawa lukolu lwa Harimu na Helikai kulawa lukolu lwa Merayoti, 16 Zekaria kulawa lukolu lwa Ido na Geshulamu kulawa lukolu lwa Ginetoni 17 Zikiri kulawa lukolu lwa Abiya na lukolu lwa Miniamini kuweritindiri na litawu lya muntu na lukolu lwa Maazia kaweriti Pilitai, 18 Shamua kulawa lukolu lwa Biliga na Yehonatani kulawa lukolu lwa Shemaya, 19 Matenai kulawa lukolu lwa Yoyaribu na Uzi kulawa lukolu lwa Yedaya 20 Kalai kulawa lukolu lwa Salu na Eberi kulawa lukolu lwa Amoki 21 Heshabai kulawa lukolu lwa Hilikia na Netaneli kulawa lukolu lwa Yedaya.

22 Shaka sha Eliyashibu, Yoyada, Yohanani na Yadua, wakulu wa nkolu za Walawi matawu gawu galembitwi mushitabu, viraavirii shaka sha ukolamlima wa mfalumi Dariu na wakulu wa watambika matawu gawu galembitwi mushitabu.

23 Wakulu wa kaya ya Lawi walembitwi mu shitabu sha maholu mpaka shaka sha Yohanani mzukulu gwa Eliyashibu.

24 Wakulu wa Walawi waweriti. Hashabia na Sherebia, Yeshua mwana gwa Kadimieli na wamonga wayaweriti walibagulana muvipinga viwili, Vipinga viwili avi vigoloka pavilolana na wayawu, agawu pawimba kwa kwankana nyimbu za kumzyuma Mtuwa Mlungu na kulonga maya gashi ntambu yakalagaliriti Dawudi muntu gwa Mlungu.

25 Walolera yawaweriti wankulolera numba za kutulira vintu palii Paligomi ndo: Matani na Bakibukia na Obadia na Meshulamu na Talmoni na Akubu.

26 Wantu awa watenditi lihengu shaka sha Yoyakimu mwana gwa Yeshua na mzukulu gwa Yosadaki na mumashaka ga Nehemia yakaweriti mkolamlima gwa isi na shaka sha Ezra mtambika na muntu yakamana Lagiru.

27 Shaka sha kushipunga shibambaza sha Yerusalemu, Walawi wasakulitwi kila pahala pawalikaliti su kwiza kunemelera kwa sheleku kushipunga shibambaza, pamuhera na kulonga mayagashii na nyimbu, pawatendera matowazi na vinubi na zeze. 28 Viraavirii yawimba walijojonira pamuhera kulawa pahala gagazyengeta Yerusalemu na vijiji vya Wanetofati, 29 viraa kulawa Beti Giligali na kulawa pahala la Geba na Azimaweti toziya yawimba waweriti walinyawira vijiji kuzyengeta Yerusalemu. 30 Watambika na Walawi pawalitakasiyiti kala toziya ya kumguwila Mlungu viraavirii wawatakasiya wantu na migomi mikulu na vibambaza.

31 Niwalagaliriti wakulu wa Yuda wakweni pampindi pashibambaza. Vilavilii ndagaliriti vipinga viwili vikulu vyawimba wimbi nyimbu za kulonga mayagashi Mlungu.

Shipinga shimu shikweni uwega wa kumliwu kugendera Ligomi la Lifungusi. 32 Yawimba awa walilonguziyiti na Hoshaya pakawera pamuhera na nusu ya wakulu wa Yuda. 33 Yawafatiti kumbeli ndo Watambika yawagomba mapenka weni ndo: Azaria na Ezra na Meshulamu, 34 Yuda na Benjamini na Shemaya na Yeremia. 35 Zekaria mwana gwa Yonatani, na mzukulu gwa Shemaya na mwana gwa Matania na mwana gwa Mikaya, na mwana gwa Zakuri na mwana gwa Asafu. 36 Pawafuwatwa walongu wakuyi, Shemaya na Azareli na Milalai na Gilalai na Maai na Netaneli na Yuda na Hanani, pawawera na vyombu vya kwimbira vya Dawudi muntu gwa Mlungu. Walongulerwa na Ezra mlemba gwa Lagiru. 37 Mu Ligomi la bwiru wakweniti kugenda kumji gwa Dawudi, wapititi Kuliboma lya Dawudi na kugenda kuzyetu kwa shibambaza mpaka kuligomi lya Mashi kwakulawira mshenji mwa mji.

38 Shipinga shimonga shashimbiti nyimbu za kulonga mayagashii shigenditi uwega wa kumshigi pampindi pa shibambaza. Neni ng'enditi na shipinga ashi pamuhera na nusu ya wantu. Tupitiriti Shindwalingu sha Tanuri mpaka ku shibambaza shipana. 39 Na kulawila panu, tupitiliti Ligomi la Efraimu na Ligomi la Yeshana na Ligomi likulu lya Somba na Kushindwalingu sha Hananeli na Kushindwalingu sha Mia mpaka ku Ligomi likulu lya Kondolu. Pawasokiti pa Ligomi likulu lya walolera tugolokiti.

40 Shakapanu, vipinga vyoseri viwili vyaviweriti vyakwimba nyimbu za kulonga mayagashii vigolokiti munumba nkulu ya Mlungu,

pamuhera na neni na nusu ya wakulu. 41 Viraavirii Watambika yaweriti na mapenka waweriti: Eliyakimu na Maaseya na Miniamini na Mikaya na Eliyoenayi na Zekaria na Hanania, 42 Maaseya na Shemaya na Eleazari na Uzi na Yehohanani na Malikiya na Eramu na Ezeri. Awa yawimba wimbiti kwa kulonguziwa na Yezirahia.

43 Lishaka ali wantu walaviyiti tambiku zivuwa na wasekeleliti toziya Mlungu kawapananiti sheleku nkulu. Wadala na wana, wasekeleriti. Wantu wa kutali wapikiniliti wantu wa Yerusalemu pawanemelera.

44 Shaka ashi wantu wasagulitwi kuwera wagolokera wa vyumba vya kutulila vintu toziya ya mishangu na viboga vya kwanja na lifungu lilongu. Kulawa mumalambu galii yagazyengetiti miji wafiruwitwi wajegi muluhanja alu mafungu handa lagiru ntambu yayilagaliriti kwajili ya watambika na Walawi, toziya Yuda kafiriziwitwi na lihengu lya Watambika na Walawi. 45 Toziya wawatenderiti mirandu yakuwatenda wantu wajimirwi na kumguwira Mlungu, wimba na walolera wa ligomi likulu watenditi ntambu iraa, ntambu yakalagaliriti Dawudi na Selemani mwana gwakuyi. 46 Kwanjira shaka sha mfalumi Dawudi na yakimba Asafu, kuweriti na walonguziya wa wimba na kuweriti na nyimbu za kukwisa na kulonga mayagashii kwa Mlungu. 47 Waisraeli woseri, kwanjira shaka sha Zerubabeli na Nehemia, walaviyiti mafupu kila lishaka wawapananiti wimba na walolela wa migomi mikulu. Nentu ga aga wantu wa Israeli walaviyiti malaviwu toziya ya Walawi, na Walawi watula gweka lifungu lya lilongu lya vintu avi, na kuwapapana wiwuka wa Aruni.