1 Shakapanu Sanibalati na Tobiya na Geshemu muntu gwa Arabu na wankondu watwenga wamonga, pawapikaniriti kuwera malira kushinyawa kayi shibambaza na kwahera pahala patupalekiti tembera mashaka aga nenetuli migomi pahala pa kwingilira. 2 Sanibalati na Geshemu wanjegeriti ulagilagi awu, "Mwizi tuliwoni mushijiji shashiwera mululalanda lwa Ono. Kumbiti wafiliti kuntenda." 3 Neni niwatumiti walagilagi kwa womberi nakuwagambira, "Lihengu lyanilitenda ndo lya mana nentu hapeni nizi. Hashi ndeki lihengu ligoloki nizi kwa mwenga?"

4 Wendereyiti kunjegera ulagilagi ulaulii mala msheshi, kumbiti neni niwapananiti lyankulu lilalilii.

5 Vilavilii Sanibalati kamlagaliriti ntumintumi gwakuyi kwa neni mala ya mhanu agawu kanjegera luhamba lwa lupala hera lwaluweza kubetulwa na muntu yoseri, 6 na lweni lulembitwi hangu,

"Kwana visoweru vyavyendeleya kulipalasiya muisi ya pakwegera na Geshumu kavijimira visoweru avi, kuwera gwenga pamuhera na Wayahudi wayagu mfira kutugalambuka. Hangu mwankunyawa kayi shibambaza su gwenga gufira guweri mfalumi gwawu. 7 Gwenga gutura watambika Yerusalemu su wabweri visoweru vyaku kuwera kwana mfalumi muisi ya Yuda. Shisoweru ashi hakagambirwi mfalumi Aritashasta. Hangu gwizi tuliwoni na kuyowelera mirandu ayi."

8 Na neni nimjegeriti ulagilagi nimwankula hangu, "Kwahera mlandu handa agu yagulonga gwankutendeka, gugulaviya hera gamweni."

9 Watenditi hangu su kututiriziya pawalihola, hapeni wendereyi na lihengu, hangu, kwahera lyalitendeka. Nimluwiti Mlungu gwangu panonga, "Kumbiti vinu, Gwee Mlungu, nikuluwa gumpanani makakala."

10 Pang'enditi ukaya kwa Shemaya, mwana gwa Delaya na mzukulu gwa Mehetabeli, yakatatilitwi ukaya kwakuyi na yakafiriwitwindiri kalawi. Kang'ambira, "Tugendi twakalififi Munumba ya Mlungu na tulitatili toziya leru pashiru wankwiza kukulaga."

11 Kumbiti neni nilikosiya mumoyu, "Hashi, muntu handa neni, nana toziya ya kutuga? Hashi muntu handa neni kafira kwingira Munumba Nkulu ya Mlungu su mpati kuliponiziya? Nakaka hapeni ningiri Munumba nkulu ya Mlungu."

12 Nivimaniti handa Mlungu kamlagalirandiri, ila kapananwa swinda na Tobia na Sanibalati kanyoweleri vidoda 13 Kaweriti kapananwa swinda su kantiliziya ntendi vidoda. Kwa kutenda hangu mewalihabisiyi litawu lyangu na wantu wambeziyi.

14 "Gwee, Mlungu gwangu, guwaholi Tobia na Sanibalati toziya ya galii gawatenditi, viraa gumholi Noadia mtambika mdala na watamika wamonga woseri yawafiriti wantendi neni ntiri."

15 Su, shibambaza shimalilikiti kunyawa mulishaka lya ishilini na mhanu lya mwezi yagushemwa Eluli. Na lihengu ali limalirikiti mulishaka lya hamsini na mbili. 16 Wankondu wa maisi ga pakwegera, pawapikaniriti kuwera lihengu tulimalira, watiliti na kuwona soni nentu, toziya wavimaniti nakaka kuwera lihengu ali limalilika kwa kutangwa na Mlungu gwetu.

17 Shaka shoseri ashi, wakulu wa Wayahudi waweriti wankulemberana hamba na Tobia. 18 Toziya wantu wavuwa wa muisi ya Yuda waweriti pamuhera na yomberi, toziya mbili yimu Tobia kaweriti mganafu gwa Shekaniya na mwana gwa Ara. Na ya pili Yehohanani mwana gwakuyi, kaweriti kamyuga mhinga gwa Meshulamu, mwana gwa Berekia. 19 Viraa wang'ambira maheri gakatenditi Tobia na womberi wamgambiriti kila shintu shantakuliti. Na Tobiya kaweriti kankunjegera hamba zankuntiliziya.