1 Sanibalati pakapikaniriti handa twenga wayahudi twanja lihengu lya kunyawa kayi shibambaza, kakalaliti nentu na kawera na utama, kuwajongera wayahudi, 2 kulongolu kwa waganja wakuyi na wamashonta wa Wasamalia, pakalonga, "Wayahudi awa wayongi wankutenda shishi? Hashi, hawashinyawi kayi shibambaza ashi? Hashi, hawalaviyi tambiku na kuweza kumalira kunyawa kwa lishaka limu? Hashi, hawawezi kugafukula mabuwi kulawa mulimatiru lya yavilunguziwitwi kwa motu su kunyawira?"

3 Tobia muntu gwa isi ya Amoni, yakaweliti kagolokera pakwegera na yomberi kakamaliti pakalonga, "Wankuyawa shishi? Shibweta pakapita pampindi pakuyi, hakabomoli shibambaza shawu sha mabuwi!"

4 Ndo nimluwa Mlungu panonga, gwee Mlungu gwetu, gupikanili ntambu yawatujongera, guwawuziliri jongera zawu weni na guwaleki wabatwi na kutolwa lopola muisi ya umanda. 5 Nakaka naguwalekiziya makontola gawu na vidoda vyawu, toziya wakukaliziya kulongolu kwa wanyawa.

6 Kumbiti twendereyiti na unyawa wa shibambaza mpaka shisoka nusu yakuyi kugenda kumpindi, toziya wantu waweriti wangutenda lihengu kwa moyu gwawu goseri.

7 Hangu Sanibalati na Tobia na wantu wa Arabu na Waamoni na Waashidodi pawapikaniriti kuwera lihengu lya kunyawa kayi shibambaza sha Yerusalemu liweriti wakwendereya weri na handa mwamubomokiti mushibambaza mwankudiwiwa, womberi wakalaliti nentu. 8 Woseri wajimiraniti pamuhera kwiza kulikomanga aku Yerusalemu na kutenda wantu walikomangi. 9 Hangu tumluwiti Mlungu gwetu na tutuliti walolela kwajili ya kugulolera mji, pashiru na palwala.

10 Wantu wa Yuda waweriti na lwimbu lwa kwimba hangu,

"Makakala ga watenda lihengu gapunguwa,

Na kwana limatiru livuwa lya kuwusiwa.

Na hatunyawi hashi shibambaza ashi."

11 Na wankondu wetu walonga, "Hapeni wavimani pota kuwona, mpaka twenga patuwasokera womberi na kuwalaga na kugolosiya lihengu lyawu." 12 Shakapanu Wayahudi yawalikala muwamu mwa wankondu wetu pawapikaniliti visoweru vyawu, watwizira mala kwa mala kutubeliziya, "Hawalawili kila uwega kutukomanga." 13 Hangu, ntula wantu pahala pa pasi pa shimbambaza na pahala pa kumbeli pa shimbambaza peni penimalilirwi kunyawiwa, ntula wantu waloleri kulinganira na nkolu pawawera na magumba gawu, migoha na pindi zawu.

14 Pamoniti kuwera wantu waweriti na lyoga niwagambira wakulu na walonguziya na wantu woseri, "Namuwatila. Mumholi Mtuwa Mlungu yakawera mkulu na gwa kutiliziya, mlikomangili toziya ya walongu wetu na wana wetu na wahinga wenu na wadala wenu na kaya zyenu." 15 Wankondu wetu pawapikaniriti handa tuvimana shilii shawafira kututendera na handa Mlungu kawavuluvutira, hangu twawoseri tuwuyiti na kila yumu kendereyiti na lihengu lyakuyi.

16 Kulawa lishaka ali na kwendeleya, nusu ya wantu wangu wawera wankwendereya na unyawa wa shibambaza, nusu imonga iwera wamuulolera pawawera na migowa yawu na pindi na kuvala nguwu za kulishinga shifuwa. Wakulu wetu waweriti wankuwatanga wantu wa Yuda, 17 Wantu yawaweriti wangunyawa shibambaza na wantu walii yawaweliti wangupapa vintu vya unyawa wendereyiti na lihengu lyawu agawu liwoku limu likola vintu vya unyawa na liwoku limonga likola shintu shakuyi sha kulikomangira. 18 Kila mnyawa kalitawa ligumba lyakuyi mushunu mwakuyi agawu pakendeleya na lihengu. Kumbiti muntu gwa kugomba lipenka kalikaliti pakwegera na neni. 19 Niwagambira wakulu na walonguziya na wantu woseri, "Lihengu ali ndo likulu na twenga kila muntu ka kutali na myaguyi pawatenda lihengu lya kunyawa shibambaza. 20 Paguwera pahala poseri pagutenda lihengu, katepu pagupikanira lipenka, Gutugili kwatuwera twenga. Mlungu gwetu hakatukomangiri." 21 Hangu, twendereyiti kutenda lihengu lyetu na nusu ya wantu pawakola vintu vya kulikomangira kwanjila mandawira mpaka pakwinaliti.

22 Shaka ashi niwagambiriti wantu, "Kila muntu na ntumintumi gwakuyi walikali ku Yerusalemu su pashiru waweri walolera wetu na paluwala waweri wankutenda lihengu." 23 Neni na walongu wangu na wantumintumi wangu na walolela yawaweriti pamuhera na neni tuvulandiri nguwu zyetu. Kila yumu kaweriti na vintu vyakuyi vya kulikomangira, ata pakagenditi kudidibula mashi.