1 Avi ndo visoweru vya Nehemia, mwana gwa Hakalia.

Paweriti mumji mkulu gwa Susa, mumwezi gwa Kislevu gwa shinja sha ishilini sha ukolamlima wa Atashasita 2 Hanani, yumu gwa walongu wangu, kiziti pamuhera na wamu wa wantu kulawa muisi ya Yuda. Niwakosiya kuusu Wayahudi wayetu yawaponikiti, weni yawawuyiti kulawa Babuloni viraa na mji gwa Yerusalemu. 3 Womberi wanankula, wayahudi yawaponekiti na kuuya muisi yawu, vinu wamuntabiku nkulu na wamsoni. "Shibambaza sha mji gwa Yerusalemu shibomuluwa na migomi mikulu yakuyi ilunguziwa." 4 Pampikaniriti aga nilivagiti pasi na kulira.

Ndayiti kwa mashaka tunga. Noyiti kuliya na kumluwa Mlungu gwa kumpindi, 5 shakapanu nonga, "Gwee Mtuwa Mlungu, Mlungu gwa kumpindi, gwee Mlungu yaguwera mkulu na kutiliziya, gulikola lipatanu lyaku na kulanguziya ufiru yawuwerandiri na upereru kwa wantu walii yawajimira lagiru zaku. 6 Gundoli na gupikinili maluwa gangu neni ntumintumi gwaku, panikuluwa pashiru na paluwala toziya ya wantumintumi waku, wantu awa Israeli. Gutulekiziyiti vidoda vyetu twenga wantu wa Israeli, vyatutenditi kulongolu kwaku. Neni pamuhera na wantu wa kaya ya tati gwangu tujimila kuwera tutenda vidoda. 7 Tutenda makontola ng'anji kulongolu kwaku, tuzikolandiri lagiru zaku na malagalira gaku gagutupananiti twenga kupitila ntumintumi gwaku Musa. 8 Shondi guliholi shilii shagumgambiliti ntumintumi gwaku Musa, pagulongiti, handa pamusigalandiri kuwera waminika kwaneni, haniwapalasiyi muwamu mwa maisi. 9 Kumbiti pamumbuyira neni na kuzikola lagiru zangu na kuzijimira, hangu wantu waku yawaweriti mukuhamisiwa kutali nentu muupeleru wa pasipanu, haniwajojoniri kulawa aku na kuwawuziya pahala palii panipasyaguliti paweri pahala pangu pa kunguwira,"

10 "Mtuwa awa ndo wantumintumi waku na wantu waku yaguwalopoliti kwa uwezu waku mkulu na kwa liwoku lyaku lyana makakala. 11 Gwee Mtuwa, gundoli na gupikinili maluwa ga ntumintumi gwaku na ga wantumintumi waku yawanemelera kukupanana ligoya. Nikuluwa guntendeli mirandu yangu igendi weri neni ntumintumi gwaku na monerwi lusungu na mfalumi."

Mumashaka aga neni weriti na lihengu lya kumjegera mfalumi shakulanda.