1 Su Ligomi lya wakondolu linyawitwi kayi na Eliyashibu, mtambika mkulu, pamuhera na walongu wakuyi yawaweriti watambika. Walituliti kulongolu kwa Mlungu na kutulwa migomi yakuyi na wendereyiti kunyawa mpaka shindwalingu sha miya yimu na viraavirii washilumikiti na kushinyawa kayi mpaka pashiweriti shindwalingu sha Hananeli.

2 Pahala yapafatiti panyawitwi na wantu wa Yeriku.

Pawapeleriti wantu wa Yeriku Zakuri mwana gwa Imri kanyawiti shimbambaza.

3 Ligomi lya Somba linyawitwi kayi na lukolu lwa Hasena, watula vizingiti vyakuyi, migomi, misumali mikulu na ngwiligiziwu za shuma.

4 Pawapeleriti awa kanyawiti Meremoti mwana gwa Uri na mzukulu gwa Hakosi.

Pakapeleriti Merimoti kanyawiti Meshulamu mwana gwa Berekiya, mzukulu gwa Meshezabeli,

Pakapeleriti Meshulamu, kanyawiti Zadoki, mwana gwa Baana.

5 Pakapeleriti Zadoki wanyawiti wantu kulawa mji gwa Tekowa. Kumbiti wakulu wawu walemiti kutenda lihengu lyawapananitwi na wakulu wawu.

6 Ligomi likulu lyalishemwa lya makashu linyawitwi kayi na Yoyada mwana gwa Paseya na Meshulamu mwana gwa Besodeya, watula vizingiti vyakuyi na migomi na misumali mikulu na ngwiligiziwu za shuma.

7 Pawapeleriti awa, wanyawiti kayi Melatia yakalawiriti mji gwa Gibeyoni na Yadoni yakalawiriti mji gwa Mmeronoti pamuhera na wantu wa mji gwa Gibeyoni na Mizipa mlongoziwa na mkulu yakaweriti kalikala kumwambu kulushemba Eufrati.

8 Pawapeleriti awa, kanyawiti Uziyeli mwana gwa Harihaya, yumu gwa mafundi wa zahabu.

Pakapeleriti Uziyeli, kanyawiti kayi Hanania yumu gwa wanyawa wa utuli. Wanyawiti Yerusalemu mpaka kusoka shibambaza shipana.

9 Refaya mwana gwa Huri ayu kaweriti mkulu gwa nusu ya mji gwa Yerusalemu. Kanyawiti kayi mji yagufata.

10 Yedaya mwana gwa Hurumafu kanyawiti shipandi shashiweriti pakwegera na numba yakuyi.

Pakapeleriti Yedaya, kanyawiti kayi Hatushi mwana gwa Hashabineya.

11 Pa Hatushi, kanyawiti kayi Malikiya mwana gwa Harimu na Hashubu mwana gwa Pahati Mowabu wanyawiti kayi pahala pamonga na shindwalingu sha litanuli lya koshiya mabumunda.

12 Pawapeleriti awa, kanyawiti kayi Shalumu mwana gwa Haloheshi, mkolamlima gwa nusu ya mji gwa Yerusalemu. Yomberi Kanyawiti kayi pamuhera na wahinga wakuyi.

13 Ligomi likulu lya kululalanda linyawitwi kayi na Hanuni pamuhera na wenikaya wa mji gwa Zanoa. Wayitula migomi na misumali mikulu na ngwiligiziwu za shuma. Washinyawitwi kayi shibambaza shana utali handa wa mita miya msheshi mpaka kwaliweriti ligomi likulu lya lifunkusi.

14 Ligomi likulu lya Lifunkusi linyawitwi kayi na Malikiya, mwana gwa Rekabu, mkolamlima gwa mji gwa Beti Hakeremu. Kanyawiti kayi na Kayitula migomi mikulu na misumali mikulu na ngwiligiziwu za shuma.

15 Ligomi lya mbwiru linyawitwi kayi na Shalumu mwana gwa Kolihoze na mkulu gwa mji gwa Mizipa. Kanyawiti na kutima pahala pakwingilira, kalitula ligomi na misumali mikulu na ngwiligiziwu za shuma. Na kanyawa shimbambaza sha litanda lya Shela lyaliwera pakwegera na shiwunga sha shifalumi mpaka nkweneru yaziseleriti kulawa mji gwa mfalumi Dawudi.

16 Pahala papafatiti kapanyawiti kayi Nehemia mwana gwa Azibuki, mkolamlima gwa nusu ya mji gwa Beti Zuri na kanyawiti kayi kusoka pakwegera na masembi ga Dawudi, mpaka kulitanda lyalinyawitwi na kusoka numba ya wamashonta.

17 Pakapeleriti Nehemia, wiziti Walawi kunyawa kayi shimbambaza.

Rehumu mwana gwa Bani. Ndo Yakafatiti

Hashabiya mkolamlima gwa nusu ya mji gwa Keila, yomberi kanyawiti kayi shimbambaza toziya ya wantu wakuyi.

18 Pakapelela Hashabia, unyawa utenditwi na walongu wawu pawalongoziwa na Binui, mwana gwa Henadadi, mkulu gwa nusu ya mji gwa Keila.

19 Shakapanu Ezeri mwana gwa Yeshua, mkulu gwa Mizipa, kanyawiti kayi pahala pamonga, pashidunda shashilolana na numba ya kutulira vintu vya kulikomangira kunkondu, mpaka pashisoku sha shibambaza.

20 Baruki mwana gwa Zabai kanyawiti kayi pahala pamonga kwanjira kushisoku sha shimbambaza shilii mpaka kuligomi lya numba ya Eliashibu mtambika mkulu.

21 Meremoti mwana gwa Uriya na mzukulu gwa Hakosi, kanyawiti kayi pahala pamonga, kulawa kuligomi lya numba ya Eliyashibu mpaka upeleru wakuyi.

22 Pakapeleriti Melemoti, wanyawiti kayi Watambika yawakaliti pahala pakwegera na mji gwa Yerusalemu.

23 Pawapeleriti womberi, Benjamini na Hashubu wanyawiti kayi pahala papalolana na numba yawu.

Pawapeleriti awa Azariya mwana gwa Manaseya na mzukulu gwa Ananiya, kanyawiti kayi pahala yapalilolana na numba yawu.

24 Pakapeleriti Azaria, Binui mwana gwa Henadadi kanyawiti kayi pahala pamonga, kanjira kunumba ya Azariya mpaka kushisoku sha shibambaza,

25 yapafatiti panyawitwi na Palali mwana gwa Uziya kanyawiti kayi pahala yapasigaliti pakwegera na shisoku sha shibambaza mpaka kushindwalingu panumba ya pampindi ya mfalumi pakwegera na luwaga lya walolera. Pahala pamonga kanyawiti kayi;

Pedaya mwana gwa Paroshi, 26 kwa kutangwa na wantumintumi wa Numba Nkulu ya Mlungu yawalikala pashigongu sha Ofeli, wanyawiti kayi pahala papalolana na ligomi la mashi, lyaliwera kwagulawa mshenji na pahala pa shindwalingu shashilawira pampindi.

27 Pawapeleriti awa, Wantu wa Tekoa wapanyawiti kayi pahala papili, papalolana na shindwalingu shikulu shitali mpaka pashiweriti shibambaza sha Ofeli.

28 Watambika watenditi manyawa ga ligomi lya Farasi, kila yumu kanyawiti pahala yapalolana na numba yakuyi.

29 Pa womberi, Sadoki mwana gwa Imeri kanyawiti kayi pahala papalolana na numba yakuyi. Na Pakapeleriti yomberi kanyawiti kayi,

Shemaya mwana gwa Shekaniya, mlolela gwa ligomi likulu lya kwagulawa mshenji.

30 Pakapeleriti Shemaya, Hanania mwana gwa Shelemia na Hanuni mwana gwa sita gwa Zalafu, wanyawiti kayi pahala papili.

Shakapanu Meshulamu mwana gwa Berekia, kanyawiti kayi pahala yapaweriti palolana na numba yakuyi.

31 Pakapeleriti Meshulamu Malikia, yumu gwa wanyawa zahabu, kanyawiti kayi pahala mpaka kunumba za wantumintumi wa Mlungu na ya washuwuzi yayilolana na Ligomi lya ukagula, mpaka kushumba yashiwera pampindi pashisoku.

32 Wanyawa zahabu na washuwuzi wanyawiti kulawa kushumba shashiweriti kushisoku mpaka ku Ligomi likulu lya Kondolu.