Corpo

19 कुन तुस न ज़ानथ, कि तुश्शी जान पवित्र आत्मारू मन्दरे; ज़ै तुसन मां आहे, ते तुसन परमेशरेरी तरफां मैल्होरोए? ते तुस अपने नईं पन तुस परमेशरेरे आथ; 20 किजोकि प्रभुए अपनि जानरी कीमत देइतां तुस घिनोरेथ, एल्हेरेलेइ अपने जानरे ज़िरिये सेइं परमेशरेरी आदर केरा।

27 पन अवं अपने जानरी खुवैइशन मारताईं, ते कैबू मां केरताईं; एरू न भोए कि होरन प्रचार केरि, ते मीं इनाम न मैल्हेले।

3 ते अगर अवं अपनि सारी जेइदात कंगालन देईं, या अपनो जिसम फुकनेरे लेई देईं, ते प्यार न रेखी, त इन मेरे कोन्ची कम्मेरू नईं।

13 किजोकि असेईं सेब्भेईं कुन यहूदी, कुन गैर कौमां, कुन गुलाम, कुन आज़ाद एक्‍की आत्मारे ज़िरिये अक जिसम भोनेरे लेई बपतिस्मो नेवरोए, ते असन सेब्भन अक्‍के आत्मा मैल्ही।

4 किजोकि ज़ेन्च़रे इश्शे एक्‍की जिसमे मां बड़े अंगन, ते सेब्भी अंगां केरू अक्‍कां ज़ेरू कम नईं। 5 तेन्च़रे अस ज़ैना मसीह पुड़ विश्वास केरतम, अस भी तैसेरे जिसमेरे ज़ेरे बने, ते अस तैसेरे अंग आम ते अस एक्‍की होरि सेइं ज़ुड़ोरेम।

8 किजोकि जिसमानी वर्जिशी सेइं जानी फैइदो त भोते, पन भक्ति सब गल्‍लां केरे लेई रोड़ी आहे, किजोकि इस वक्तेरी ते एजने बाले वक्तेरी ज़िन्दगरो फैइदो इस्से मांए ज़ेसेरो वाधो परमेशरे कियोरोए।

22 मनेरो आनन्द रोड़ी दूवाई आहे,

पन मनेरे ट्लुटने सेइं हेड्डी शुक्‍की गैतिन।

24 मन पसंद वचन मैछ़ी सेइं भेरतां कशेरे ज़ेरे प्राणन मिट्ठे लगतन,

ते हेड्डन हेरी-भेरि केरतन।

7 अपने नज़री मां अक्लमन्द नईं बन्नू;

यहोवारो डर मन्नो, ते बुरैई करां अलग रानू।

8 एरू केरने सेइं तेरी जान नीरोग,

ते तेरी हेड्डी तंदरुस्त रहेली।

13 किजोकि तीं मेरे एंत्रीं अंग बनेवरेन*;

तीं अवं अम्मरे पेटे मां बनाव।

14 अवं तेरू शुक्र केरेलो, एल्हेरेलेइ कि अवं भयानक ते अद्भुत तरीके सेइं बनाव जेवरोईं,

तेरां कम्मां त हैरान केरनेबालन,

ते अवं एन रोड़ेच़ारे ज़ानताईं।

26 मेरो दिल ते मन दूईये हारोरेन,

पन परमेशर सदारे लेई मेरो हिस्सो

ते मेरे दिलेरी चट्टान बनोरोए।

ट्लिशरो मन परमेशरे मां रज़्ज़ते

1 हे परमेशर, तू मेरो परमेशर आस,

अवं तीं दिले सेइं तोपेलो;

शुकोरी ते ट्लिशोरी ज़मीनी मां ज़ैड़ी पानी नईं,

मेरे मने तेरी ट्लिशे, मेरो जिसम तेरी बड़ी इच्छा केरते।

41 बींझ़े बिश्शा ते प्राथना केरते राथ ताके तुस अज़मैइशी मां न राथ, आत्मा त तियारे पन जान कमज़ोरे।

29 अगर तेरी देइनी अछ़ तीं पाप केरनेरे लेई ठोकर खुवाए, त तैस केढतां शार, किजोकि तेरी पूरी जान नरके मां छ़ड्डे गाने करां तेरे लेई एन्ने रोड़ूए कि तेरी जानी मरां अक अंग नाश भोए

25 एल्हेरेलेइ अवं तुसन सेइं ज़ोताईं, कि तुस अपने ज़िन्दगरी ज़रूरतां केरे लेई फिक्र न केरा, कि तुस कुन खाले या कुन पीले, ते न अपने जानरी कि कुन लामेले। कुन प्राण रोट्टी करां ते जान लिगड़े करां बेद्धतां नईं!"

28 तुस तैन करां न डेरथ ज़ैना जानी त मारतन, पन आत्मा न मैरी बटन, परमेशरे करां डरा, ज़ै आत्माई ते जानी दूईने नरके मां नाश केरि बटते।

शास्त्री ते फरीसी लोकां केरे ज़ेरे न बने

1 एत्रे मां हज़ारेईं मैन्हु अकोट्ठे भोइ जे, ते एक्‍की होरि उन्ढे खिरकते थिये त यीशुए सेब्भन करां पेइले अपने चेलन खड़े भोइतां ज़ोवं, "फरीसी लोकां केरे पाखंड़रे खमीरे यानी तैन केरे रीति रूवाज़न करां हुशार रेइयथ। 2 कोई चीज़ ओड़कोरी नईं ज़ै बांदी न भोए, ते न कोई चीज़ छ़पोरीए ज़ै ज़ानी न गाए। 3 एल्हेरेलेइ ज़ैना गल्‍लां तुसेईं आंधरे मां ज़ोवरिन तैना गल्‍लां लौई मां शुनोनिन, ते ज़ैना गल्‍लां तुसेईं अन्तर ज़ोवरिन तैन केरू एलान लाए पुड़ भोनूए।

केस करां डरम

4 "दोस्तव अवं तुसन सेइं सच़ ज़ोताईं कि तैन करां न डेरथ ज़ैना जानी नुकसान पुज़ातन तैसेरे बाद तैना किछ न केरि बटन। 5 पन अवं तुसन सेइं सच़ ज़ोताईं कि केस करां डर्रू लोड़ते, ज़ैस जानी मारनेरे बाद तैसेरी आत्माई नरके मां छ़डनेरो अधिकारे, हाँ अवं तुसन सेइं सच़ ज़ोताईं कि तैस करां डरा। 6 कुन दूई पेंइसन मां पंच़ च़ुड़ोली न बिकन? पन परमेशर तैन मरां केन्ची भी न बिसरे। 7 बल्के तुश्शे दोग्गेरे सारे बाल गनोरेन डरा नन्ना तुस त काई च़ुड़ोलन करां भी जादे कीमती आथ।

यीशु कबूल केरनो ते न कबूल केरनो

8 "अवं तुसन ज़ोताईं कि ज़ै कोई मैन्हु केरे सामने मेरो इकरार केरेलो, त अवं मैन्हेरू मट्ठू भी परमेशरेरे स्वर्गदूतां केरे सामने इकरार केरेलो 9 पन ज़ै मैन्हु केरे सामने मेरो इन्कार केरेलो त तैसेरो इन्कार परमेशरेरे स्वर्गदूतां केरे सामने कियो गालो।

10 "ज़ैना लोक मैन्हेरे मट्ठेरे खलाफ किछ ज़ोले तै तैस माफ़ केरेलो पन ज़ै पवित्र आत्मारी तुहीन केरेलो तैस माफ़ न केरेलो।

11 "ज़ैखन तैना तुसन प्राथना घरन मां ते बड़े-बड़े ते अधिकैरन कां नेले त फिक्र न केरथ कि अस कुन ज़ोम ते केन्च़रे जुवाब देम। 12 किजोकि पवित्र आत्मा तुसन तैस वक्ते ज़ोलो कि तुसेईं कुन ज़ोनूए।"

एक्‍की दौलतमन्द बेवकूफेरी मिसाल

13 फिरी भीड़ी मरां केन्चे एक्‍के यीशु सेइं ज़ोवं, "हे गुरू जी मेरे ढ्लाए जो ज़ो, कि इश्शे बाजी केरि जाईदाती मरां मेरो हिस्सो मेरे हवाले केरे।" 14 यीशुए तैस जुवाब दित्तो, "अवं केनि तुश्शो हाकिम या बन्टने बालो बनेवरोइं?" 15 ते यीशुए तैन सेइं ज़ोवं, "हर किसमेरे लालच़े करां दूर भोइयथ ते न केन्चेरी जेइदात केन्चेरी जानी करां जादे भोए।" 16 तैखन यीशुए तैन अक मिसाल शुनाई, "केन्ची अमीरेरे ज़मीनी मां बड़ी फसल बनी। 17 तै अपने दिले मां सोचतां ज़ोने लगो, कि अवं कुन केरि, मीं कां ठारे नईं कि ज़ैड़ी अवं अन्न रेखी सेखी? 18 तैखन तैनी ज़ोवं कि, ‘अवं अक कम केरताईं, अपने पुराने कोठार पुटतां होरे बड्डे कोठार बनेइ ते अपनु सारू अन्न तैस मां रखेलो। 19 फिरी मीं अपने आपे सेइं ज़ोनूए कि, मीं कां त बड़े सालन तगर अन्न जम्हां भोवरूए, मेरी जान आरामे सेइं खा ते एश केर।’ 20 पन परमेशरे तैस मैन्हु जो ज़ोवं, ‘हे बेवकूफ अज़्ज़े राती तू मरेलो, ते ज़ैन किछ तीं अपने लेई जम्हां केरतां रखेरूए तैन केसेरू भोल्हु?’ 21 एल्हेरेलेइ ज़ै अपने लेई दौलत जम्हां केरते, पन परमेशरेरी नज़री मां तै अमीर न भोए एसेरो भी एरो हाल भोनोए।"

परमेशरे पुड़ भरोसो रखनो

22 तैखन यीशुए अपने चेलन सेइं ज़ोवं, एल्हेरेलेइ तुस न अपने ज़िन्दगरी ज़रूरतरे लेई फिक्र केरा, कि तुस कुन खाले, ते न अपने जानरी कि कुन लामेले। 23 किजोकि प्राण रोट्टी करां ते जान लिगड़े करां बेद्धतां भोते। 24 कंव्वां केरां तक्‍का, तैना न बेन ते न कट्टन ते न तैन कां गुदाम या कोठार भोन, तांभी परमेशर तैन खाने जो देते ते तुस त च़ुड़ोलन करां भी जादे कीमती आथ। 25 तुसन मां एरो कौन आहे, ज़ै फिक्र केरतां अपनि उमर अक घड़ी भी बधेईं सकते? 26 बस्सा, ज़ैखन तुस ऐह अक निकड़ी ज़ेरि गल भी न केरि बटथ, त बाकी बेड्डी चीज़ां केरि फिक्र किजो केरतथ? 27 सोसनेरे फूड़ू केरां तक्‍का कि तैना केन्च़रे बेडोतन? तैना न मेहनत केरन ते न कत्तन, फिरी भी अवं तुसन सेइं ज़ोताईं कि राज़ो सुलैमाने भी अपने सारे धन दौलतरे बावजूद भी तैन केरां ज़ेरां लिगड़ां न लां। 28 बस्सा ज़ैखन परमेशरे मैइदानेरो घास, ज़ै अज़ आहे ते कालां लौवंने मां फुकनोए, एरी खूबसूरती देते, त हे घट विश्वासे बाले लोकव, कुन तै तुसन लिगड़ न देलो? 29 ते एस फिक्रे मां न रेइयथ, कुन खामेले, या कुन पीमेले, या कुन लामेले, ते न शक केरथ। 30 किजोकि दुनियारी सैरी कौमां एस्से फिक्रे मां लेगोरी रेइचन, पन तुश्शो बाजी ज़ानते, कि तुसन कोनां-कोनां चीज़ां केरि ज़रूरते। 31 पेइले परमेशरेरे राज़्ज़ेरे तलाश केरा, फिरी तुसन एना सैरी चीज़ां मैल्ही गैली।

आसमानी दौलत

32 "तुस भैड्डां केरे निकड़े केन्नरे ज़ेरेथ, तुस कोन्ची गल्‍लरे लेई न डरा, किजोकि तुश्शे बाजेरी खुशी एस्से मां आहे, कि तै तुसन राज़ दे। 33 अपनु घरबार बेच़तां धर्मरथ देथ, ते एप्पू जो अक बेटवो बनाथ, ज़ै पुरानो न भोए, सुर्गे मां दौलत जम्हां केरा ज़ै कधे न मुक्‍के, ज़ैड़ी न च़ोर पुज़्ज़े ते न कीड़ो खाए। 34 किजोकि ज़ैड़ी तेरी दौलत भोल्ही, तैड़ी तेरो दिल भी लग्गेलो।

हमेशा तियार राथ

35 "सेवा केरनेरे लेई रोड़ेच़ारे कमर बेंद्धतां तियार भोथ, ते तुश्शे दीये सैरी राती बलते रान। 36 तुस मेरे एजनेरे लेई एन्च़रे तियार राथ, ज़ेन्च़रे मैन्हु केरे अपने मालिके, ज़ै ड्लाहेरे धामी मरां वापस एजने बलगतन, कि ज़ैखन तै एज्जे ते दार गुड़कान त अस दार खोल्‍लम। 37 तैना नौकर धन आन ज़ैना अपने मालिकेरे वापस एजने पुड़ बींझ़े मैलतन, अवं तुसन सेइं सच़ ज़ोताईं, कि तै एप्पू तैन रोड़ेच़ारे नौकरन लिगड़ां लेइतां तियार लाएलो, ते मालिक तैन सेइं खुश भोइतां एप्पू सेइं साथी रोट्टी खाने बिशालेलो ते तैन केरि सेवा केरेलो। 38 अगर मालिक एध्धी राती या झ़ेझ़ेरेपार एइतां अपने नौकरन बींझ़े लाहे त तैन नौकरां केरे लेई केत्री धने गल्‍ले। 39 पन याद रखा, अगर घरेरे मालिके, च़ोर एजनेरो पतो भोए त तै बींझ़ो राथो ते अपने घरे च़ोरी न देथो भोने। 40 बस्सा, तुस भी मेरे वापस एजनेरे लेई तियार राथ, मैन्हेरू मट्ठू यानी अवं तैस वक्ते एज्जेलो ज़ेइस तुसन खियाल भी न भोल्हो।"

ईमानदार या धोखो देनेबालो दास

41 पतरसे पुछ़ू, "हे प्रभु ज़ै मिसाल तीं शुनाई तै सिर्फ इश्शे लेइए या सेब्भी केरे लेइए?" 42 प्रभुए ज़ोवं, "कौने ईमानदार अक्लमन्द नौकर ज़ेसेरो मालिक तैस अपने नौकरन पुड़ मुन्शी रख्खे ताके तैन केरि खूराक ठीक मौके पुड़ रोड़ेच़ारे बन्टतो राए? 43 तै नौकर धने कि ज़ेसेरो मालिक एज्जे ते मालिक तैस रोड़ेच़ारे कम केरतू लाहे। 44 अवं तुसन सेइं सच़ ज़ोताईं कि तै अपने सारे घरबारेरी हेर गेशारे अधिकार तैसेरे सुपुर्द केरेलो। 45 पन अगर तै नौकर अपने दिले मां ज़ोए कि मेरे मालिके एजने हेजू बड़ू च़िरे ते होरि नौकरन ते नौकरेनन मार धाड़ केरनि शुरू केरे ते खेइ पीतां नशे मां मसत भोइ गाए। 46 ते तैस नौकरेरो मालिक केन्ची एरे दिहाड़े एज्जे ज़ेइस तैस नौकरे एजनेरो पतो न भोए ते तै मालिक एज्जी गाए त तैस नौकरेरे टुक्ड़े-टुक्ड़े केरतां ते तैसेरी हालत बेइमाना केरि ज़ेरि भोल्ही। 47 हर तै नौकर ज़ै ज़ानते कि तैसेरे मालिकेरी कुन मर्ज़ी आहे, कि तै कुन केरे, पन तै अपने आपे कम केरनेरे लेई तियार न केरे ते अपने मालिकेरी मर्ज़ी पूरी न केरे तैस पक्‍की मार बज़नीए। 48 पन अगर कोई नौकरे ज़ैस नईं पतो कि मेरे मालिकेरी कुन मर्ज़ी, कि अवं कुन केरि, ते तैन केरे ज़ैस सेइं तैस सज़ाह मैल्हे, त तैस घट सज़ाह मैल्हेली।"

यीशुएरे एजनेरे सबूत

49 यीशुए ज़ोवं, "अवं धेरती पुड़ अग लांने एवरोईं ते अगर अग लग्गोरी भोथी त रोड़ू थियूं। 50 पन मीं बड़े जल्दी दुख झ़ैल्‍लनोए, ते अवं बड़ो परेशान आईं ज़ांतगर दुख न झ़ेल्‍ली। 51 कुन तुस एन सोचतथ कि अवं धेरती पुड़ मेल कराने लेई एवरोईं? नईं! अवं तुसन सेइं ज़ोताईं, कि अलग केरने एवरोईं। 52 अज़्ज़ेरे बाद अगर एक्‍की घरे मां पंच़ मैन्हु भोल्हे त तैना एप्पू मांमेइं बेन्टोले, ट्लाई ज़ैना मीं पुड़ विश्वास न केरन तैना दूईयां केरे खलाफ भोल्हे, ते दूई, ट्लेइयां केरे खलाफ भोल्हे। 53 बाजी मट्ठेरे खलाफ भोल्हो ते मट्ठू बाजेरे खलाफ भोल्हु, हैई कुइयरे खलाफ ते कुई हैईयरे खलाफ ते शिख नुशरे ते नुश शिखरे खलाफ भोनीए।"

मौकेरी पिशान

54 फिरी यीशुए बड़े मैन्हन मां ज़ोवं, "कि ज़ैखन तुस बिदलार डुबते पासेरां च़लती लातथ त तुस ज़ोतथ कि झ़ड़ी एजने बालीए ते तैन्ने भोते। 55 ते दक्षिणेरे पासेरां हवा च़ली त तुस ज़ोतथ गर्मी भोरीए ते तैन्ने भोते। 56 हे पाखंडी लोकव, तुस धरती ते अम्बरेरो हाल हेरतां मौसमेरो अंदाज़ो केरनो ज़ानतथ, पन इन न ज़ैनी बटथ कि, परमेशर कुन चाते?

अपने मुद्दई सेइं समझ़ोतो

57 "तुस एप्पू फैसलो केरा कि, तुश्शे लेई कुन रोड़ूए। 58 ज़ैखन तू लीडरे सेइं साथी हाकिमे कां गाथ त बत्ते मां तैस सेइं फैसलो की न केरस, एरू न भोए तै तीं हाकिमे कां ने ते हाकिम सिपाहीएरे हवाले केरे, ते तू कैद भोइ गास। 59 अवं तुसन सेइं ज़ोताईं कि ज़ांतगर तू पाई-पाई न देले त तांतगर तैट्ठां छुट्टी न सकेलो।"

10 बस गम अपने दिले मरां दूर केर, ते एपनी जानी करां दुख दूर केर, किजोकि लड़कपन ते जुवानी दूईये बेकारन।

4 अस सारे विश्वासी एक्‍की जानरे अंगां केरे ज़ेरे आम, ते असन सेब्भन अक्‍के पवित्र आत्माए मैल्होरोए; ते तुसन अक्‍के उमीद दित्ती, ज़ैखन तुस परमेशरेरे लोक भोनेरे लेई च़ुने जे।

मुन्श ते कुआन्शां

22 हे कुआन्शव, अपने-अपने मुन्शां केरे अधीन राथ, ज़ेन्च़रे प्रभुएरे। 23 किजोकि मुन्श त कुआन्शरी क्रोड़ीए ज़ेन्च़रे मसीह कलीसियारी क्रोड़ी, ते मसीह कलीसियारो मुक्ति देनेबालोए ज़ै तैसेरी जाने।

15 ते मसीहेरी शान्ति ज़ेसेरे लेई तुस अक जान भोनेरे लेई कुजेवरे भी आथ, तुश्शे दिलन मां राज़ केरे, ते तुस शुक्र केरते राथ।

22 ते यहोवा परमेशरे तै दल्‍लोड़ी ज़ै तैने आदमे मरां कढोरी थी, तैसारी अक कौन्श बनाई; ते तै आदमे कां आनी। 23 तैखन आदमे ज़ोवं, "हुनी ई मेरी हेड्डन मरां हड्डी ते मेरे मासे मरां मासे; एल्हेरेलेइ इसेरू नवं नारी भोल्हु, किजोकि ऐह नरे मरां निस्सोरीए।" 24 एल्हेरेलेइ मड़द अपने अम्मा-बाजी करां अलग भोइतां अपनि कौन्शी सेइं मिलोरो रालो ते तैना दूईये अक जान भोल्हां।

16 एल्हेरेलेइ अस दिलेरी न शारम; अगर इश्शी बेइरीं इन्सानयत नाश भी भोए, त फिरी भी इश्शी एंत्रीं इन्सानयत रोज़ नव्वीं भोती रहतीए।

24 ज़ैखन मसीह मरो, त तैसेरे जानी पुड़ इश्शे पापां केरे लेई तैस क्रूसे पुड़ सज़ाह दित्ती। तैने एन कियूं कि अस पाप केरनो बंद केरम ते धार्मिकतारी ज़िन्दगी ज़ींनी शुरू केरम। तैसेरे ज़खम ज़ैना तैनी झ़ैल्‍ले तैन केरे वजाई सेइं अस बेज़्झ़ोए।

2 अस बड़े बार गेलती केरतम, ज़ै ज़ोने मां गलती न केरे, तैए सिद्ध मैन्हुए, ते सारे जानी कैबू केरते।