2 इतिहास 26

उज्जियाह राज़ेरू राज़

1 अमस्याह राज़ेरे मरनेरां पत्ती सारे यहूदी लोकेईं उज्जियाह ज़ेसेरी उमर 16 साल थी, तैसेरे बाजी अमस्याहेरे जगाई पुड़ राज़ो बनाव। 2 ज़ैखन अमस्याह राज़ो अपने दादे-पड़दादां केरो ज़ेरो मरो, तैखन उज्जियाहे एलोत नगर मज़बूत केरतां यहूदा प्रदेशे मां फिरी मिलेई छ़डू। 3 ज़ैखन उज्जियाह राज़ो बनो, तैखन तैसेरी उमर 16 साल थी। ते तैनी यरूशलेम नगरे मां 52 साल राज़ कियूं। तैसेरी अम्मरू नवं यकोल्याह थियूं, ज़ै यरूशलेम नगरेरी रानेबाली थी। 4 ज़ेन्च़रे तैसेरो बाजी अमस्याह केरतो थियो तेन्च़रे तैनी भी कियूं ज़ैन यहोवारी नज़री मां रोड़ू थियूं। 5 जकर्याह नेबेरे दिहाड़े मां ज़ै परमेशरेरे दर्शनेरे बारे मां समझ़ रखतो थियो, तै परमेशरेरी तलाशी मां लगोरो रहतो थियो। ते ज़ांतगर तै यहोवारी तलाशी मां लगोरो राव, तांतगर परमेशरे तैस कामयाबी दित्ती।

उज्जियाह राज़ेरां कम्मां

6 तैखन उज्जियाह राज़े गेइतां पलिश्ती सेना सेइं जंग की, ते गत, यब्ने ते अश्दोद नगरां केरि शहरपनाह बिछ़ोड़तां छ़डी, ते अश्दोदेरे आसे-पासे ते पलिश्ती लोकां केरे मझ़ाटे नगर बसाए। 7 परमेशरे पलिश्ती ते गूर्बाल नगरेरे रानेबाले, अरबी ते मूनी केरे खलाफ तैसेरी मद्दत की। 8 अम्मोनी उज्जियाह जो लगान देने लगे, बल्के तैसेरी मुशूरी मिस्रे तगर फैली जेई, किजोकि तै बड़ो ताकतबर भोइ जेवरो थियो। 9 फिरी उज्जियाह यरूशलेमे मां कूनेरे फाटके ते वैदरे फाटक ते शहरपनाहरे मोड़े पुड़ गुम्मट बनेइतां मज़बूत किये। 10 तैस कां बड़े जानबर थिये एल्हेरेलेइ तैनी सुनसान ठैरी मां ते बुनियों मुल्खे ते चौरस जगाई मां गुम्मट बनावाए ते बड़ां कुण्डां भी बनावा, ते पहाड़न पुड़ ते कर्मेले मां तैसेरे ज़मीनदार ते दाछ़री बागां केरे माली थिये, किजोकि तैस ज़मीनदारी केरनी बड़ी पसंद थी। 11 फिरी उज्जियाहेरे शूरबीर बहादरां केरि अक सेना थी ज़ैन केरि गिनती यीएल मुन्शी ते मासेयाह प्रधान, हनन्याह नंव्वेरे राज़ेरे एक्‍की हाकिमेरे हुक्मे सेइं केरते थिये, ते तैसेरे मुताबिक तैना टोली बनेइतां लड़ने गाते थिये। 12 पूर्वजां केरे घराना केरे खास-खास ज़ैना शूरबीर थिये, तैन केरि पूरी गिनती 2600 थी। 13 तैन केरे अधिकारे मां 307500 सिपाही केरि अक बड़ी सेना थी, ज़ैना दुश्मना केरे खलाफ राज़ेरी मद्दतरे लेई बेड़ी ताकती सेइं जंग केरनेबाले थिये। 14 पूरी सेनारे लेई उज्जियाह राज़े, ढालां, भाले, टोप, झिलम, धनुष ते छ़िंगलोटेरे लेई घोड़ तियार केरतां रखोरे थिये। 15 फिरी तैनी यरूशलेम नगरे मां गुम्मटां ते कंगूरन पुड़ रखनेरे लेई च़लाक मैन्हु केरि बनेवरू कला भी बनेई ज़ैन केरे ज़िरिये तीर ते बड़े-बड़े घोड़ शारे जेवरे थिये। तैसेरी मुशूरी दूर-दूर तगर फैली जेई, किजोकि तैस बड़ी मद्दत इड़ी तगर मैल्होरी थी कि शेक्ति बालो भोइ जेव।

उज्जियाह घमण्ड केरते ते तैसेरी सज़ाह

16 पन ज़ैखन उज्जियाह राज़ो ताकतबर भोइ जेव, तैखन तै बड़ो घमण्डी भोव। ते एक्सां तैनी बिगड़तां अपने परमेशर यहोवा सेइं धोखो कियो, मतलब तै धूप बालनेरी वेदी पुड़ गुग्गल बालने यहोवारे भवने मां जेव। 17 पन अजर्याह याजक तैस करां पत्ती भवनेरे अन्तर जेव, ते तैस सेइं साथी यहोवारे 80 बहादर याजक भी जे। 18 तैनेईं उज्जियाह राज़ेरो मुकाबलो केरतां तैस सेइं ज़ोवं, "हे उज्जियाह यहोवारे लेई गुग्गल बालनो तेरू कम नईं, हारूनेरू खानदान मतलब तैन याजक केरू कम्मे, ज़ैना गुग्गल बालनेरे लेई पवित्र कियोरेन। तू पवित्र ठारी पुड़ेरां निस्सी गा। तीं धोखो कियोरोए, यहोवा परमेशरेरी तरफां ऐह तेरी महिमारी वजा न भोल्ही।"✝26:18 निर्ग. 30:1-10;गिन. 16:40;18:1-7;1 इति. 23:13. 19 तैखन उज्जियाह गुग्गल बालनेरे धूपदान हथ्थे मां ट्लेइतां सेरकोव। तै याजक लोकन जो सेरकोरो थियो, कि याजकां केरे हेरते-हेरते यहोवारे भवने मां धूपेरी वेदी कां तैसेरे कुपाए पुड़ कोढ़ भोइ जेवं। 20 अजर्याह महायाजके ते सारे याजकेईं हेरू कि तैसेरे कुपाए पुड़ कोढ़ निस्सोरू आहे! तैखन बाकी याजकेईं तै तैट्ठां लूशी केढी छ़डो, बल्के एन बुझ़तां कि यहोवाए अवं कोढ़ी कियोरोईं, तैनी एप्पु बेइर गांनेरे लेई लूश की। 21 उज्जियाह राज़ो मरनेरे दिहाड़न तगर कोढ़ी राव, ते कोढ़ेरे वजाई सेइं तै अलग एक्‍की घरे मां रहतो थियो, तै यहोवारे भवने मां न थियो गेइ सकतो। ते तैसेरू मट्ठू योताम राज़ेरे घरेरे कम्मे पुड़ च़ुनू जेवरू थियूं ते तै लोकां केरो न्याय केरतो थियो।

22 शुरू करां आखरी तगर उज्जियाहेरां बाकी कम्मां केरे बारे मां आमोसेरे मट्ठे यशायाह नेबे लिखेरूए। 23 आखरी मां उज्जियाह अपने दादे-पड़दादां केरो ज़ेरो मेरि जेव, ते तै ज़ैड़ी तैसेरे दादे-पड़दादे दब्बोरे थिये तैन केरे नेड़े राज़ां केरे कब्रसतानेरे उडारे मां दब्बो जेव, किजोकि तैनेईं ज़ोवं, "तै कोढ़ी आहे।" तैसेरू मट्ठू योताम तैसेरे ठैरी राज़ो बनू।