1 इस्राएलेरे राज़े यारोबामेरे राज़े केरनेरे अठारोवं साले मां अबिय्याह यहूदा प्रदेशेरो राज़ो बनो। 2 तैनी ट्लाई साल यरूशलेम नगरे मां राज़ कियूं, ते तैसेरी अम्मरू नवं मीकायाह थियूं। ज़ै गिबा नगरेरे रानेबाले ऊरीएलेरी कुई थी।

किछ वक्तेरां बाद अबिय्याह ते यारोबामेरे दरमियाने मां लड़ाई भोइ। 3 अबिय्याह राज़ो च़ुनोरे 400000 बहादर सिपाही घिन्तां जंग लड़नेरे लेई तियार भोव, ते यारोबाम राज़ो 800000 च़ुनोरे बहादर सिपाही घिन्तां तैसेरे खलाफ जंग लड़नेरे लेई तियार भोव। 4 तैखन अबिय्याह समारैम नंव्वेरे पहाड़े पुड़, ज़ैन एप्रैमेरे पहाड़ी प्रदेशे मांए, खड़ो भोइतां ज़ोने लगो, "हे यारोबाम, ते हे सारे इस्राएली लोकव, मेरी गल शुना। 5 कुन तुसेईं न लोड़े समझ़ोरू, कि इस्राएलेरे परमेशर यहोवा लूनेरो करार* केरतां दाऊदे ते तैसेरे खानदाने इस्राएलेरू राज़ हमेशारे लेई दित्तोरूए। 6 फिरी भी नबातेरू मट्ठू यारोबाम ज़ै दाऊदेरे मट्ठे सुलैमानेरो अधिकारी थियो, तै अपने मालिक सुलैमानेरे खलाफ खड़ो भोव। 7 तैस कां किछ निकम्मे ते नीच़ लोक अकोट्ठे भेवरेन ते ज़ैखन सुलैमानेरू मट्ठू रहबाम हेजू निकड़ू थियूं ते तैस अनुभव न थियो ते तैन केरो सामनो न थियो केरि सकतो, तैखन तैना तैसेरे खलाफ शक्तिशाली भोइ जे। 8 हुनी तुस सोचतथ कि अस यहोवारे हुकूमतरो मुकाबलो केरमेले, ज़ै दाऊदेरे खानदानेरे हथ्थे मांए। किजोकि तुस सारे मिलतां बड़े लोक भोइ जेवरेथ ते तुसन कां तैना सोन्नेरां बछ़ड़ां केरि मूरती भी आन ज़ैना यारोबामे तुश्शे देबते भोनेरे लेई बनेवरेन। 9 कुन तुसेईं यहोवारे याजक, मतलब हारूनेरे खानदानेरे लोक ते लेवी केढतां मुल्खे-मुल्खेरे लोकां केरे सामने याजक च़ुनोरे नईं? ज़ै कोई अक बछ़ड़ू ते सत हुड़ अपनो आप अर्पण केरनेरे लेई आनते, तै तैन केरो याजक भोइ गाते ज़ैना ईश्वर नईं।✝ 10 पन इश्शो परमेशर यहोवा आहे ते तै असेईं नईं शारोरो, ते असन कां यहोवारी सेवा केरनेबाले याजक, हारूनेरे खानदानेरे लोक ते अपने-अपने कम्मे मां लगोरे लेवी आन। 11 तैना रोज़ झ़ेझ़ां ते ड्लवझ़ां यहोवारे लेई होमबलि ते खुशबूदार गुग्गल बालतन, ते पवित्र मेज़े पुड़ च़ढ़तलरी रोट्टी सज़ातन ते सोन्नेरू दीवट ते तैसेरे दीये रोज़ ड्लवझ़ां बालतन। असां यहूदारे लोक त अपने परमेशर यहोवारे हुक्म मन्ते राहोरेन, पन तुस इस्राएलेरे लोक तैस करां दूर भोवरेथ। 12 हेरा, असन सेइं साथी इश्शो प्रधान परमेशरे, ते तैसेरे याजक तुश्शे खलाफ शाह बन्द केरतां नरशिंगे बज़ानेरे लेई तियार असन सेइं साथी आन। हे इस्राएली लोकव अपने दादे-पड़दादां केरे परमेशर यहोवा सेइं न लड़ा, किजोकि तुस कामयाब न भोल्हे।"

13 पन यारोबामे अपने किछ सिपाही तैन पत्ती भेज़े, तैना त यहूदा प्रदेशेरे सामने थिये, ते हमलो केरनेबाले तैन पुतोरां थिये। 14 ज़ैखन यहूदा प्रदेशेरे सेना पत्रोवं तक्‍कू, त कुन हेरतन कि तैन अग्गर ते पतर दूईये पासन लड़ाई भोनेबालीए। तैखन तैनेईं यहोवा कां प्राथना की, ते याजक नरशिंगो बज़ाने लगे। 15 तैखन यहूदारी सेना जयजयकार कियूं, ते ज़ैखन यहूदारी सेना जयजयकार कियूं, तैखन परमेशरे अबिय्याह ते यहूदारे सेनारे सामने, यारोबाम ते तैसेरे सारे इस्राएली सिपाही हाराए। 16 तैखन इस्राएली सेना यहूदारे सेनारे सामनेरां नश्शी, ते परमेशरे इस्राएली तैन केरे हथ्थे मां किये। 17 अबिय्याह ते तैसेरी सेना इस्राएली सेना बड़े बुरे तरीके सेइं हाराए, इड़ी तगर कि इस्राएली सेना मरां 500000 सिपाही मारे जे। 18 तैस मौके त इस्राएली हैरी जे, ते यहूदारे सिपाही एस वजाई सेइं ताकतबर भोए कि तैनेईं अपने दादे-पड़दादां केरे परमेशर यहोवा पुड़ भरोसो रखोरो थियो। 19 तैखन अबिय्याहे यारोबामेरे सेनारो पीछो केरतां बेतेल, यशाना ते एप्रोन नगरां ते तैन केरां ड्लाव्वन पुड़ भी कब्ज़ो कियो। 20 अबिय्याहेरे ज़िन्दगी भर यारोबाम फिरी शक्तिशाली न भोव। ते यहोवाए तै एन्च़रे मारो कि तै मेरि जेव। 21 पन अबिय्याह होरो भी शक्तिशाली भोइ जेव ते तैनी च़ेवधे कौन्शन सेइं ड्लाह बनाव ज़ैन सेइं 22 मट्ठां ते 16 कुइयां भोइ। 22 अबिय्याहेरां कम्मां ते तैसेरो चाल चलन, ते तैसेरी गल्‍लां, इद्दो नेबेरी किताबी मां लिखोरिन।