2 इतिहास 31

मूरती पूज़ा बन्द केरनी

1 फ़सह तियार बीतनेरे बाद, ज़ेत्रे इस्राएली लोक हाज़र थिये, तैन सेभेइं यहूदारे नगरन मां गेइतां, सारे यहूदा ते बिन्यामीन ते एप्रैम ते मनश्शे मां मूरती ट्लोड़ी, अशेरा देबरी मूरती केट्टी छ़ेडी, ते उच्‍चां ठारां ते तैन केरि वेदी बिछ़ोड़ी। ते तैनेईं तैन सेभी केरो अन्त कियो। तैखन सब इस्राएली अपने-अपने नगरे जो वापस गेइतां, अपने-अपने ज़मीनी मां पुज़्ज़े।

लेवी केरे लेई भेंट

2 हिजकिय्याह राज़े याजकन ते लेवन तैन केरे टोली केरे मुताबिक कम सौंफू, हर एक्‍की टोलरे मुताबिक हर एक्‍की मैन्हु तैसेरे सेवारे मुताबिक एल्हेरेलेइ ठहराव, कि तैना यहोवारे डेरां केरे दारां केरे अन्तर होमबलि, मेलबलि, सेवा, शुक्र ते तारीफ़ केरन। 3 फिरी तैनी अपनि जाईदाती मरां राज़भाग होमबलि केरनेरे लेई ठहरावं; मतलब झ़ेझ़ां ते ड्लवझ़री होमबलि ते आरामेरे दिहाड़े ते नंव्वे चाँदेरे दिहाड़न ते ठहरावरे वक्तां केरे मुताबिक होमबलि देनेरे लेई ज़ेन्च़रे यहोवारे कानूने मां लिखेरूए। 4 तैनी यरूशलेमे मां रानेबाले याजक ते लेवी लोकन तैन केरो हिस्सो देनेरो हुक्म दित्तो, ताके तैना यहोवारे कानूनेरू कम मन लेइतां केरते रान। 5 ऐह हुक्म शुन्तां इस्राएली लोक अन्न, नंव्वो दाछ़रो रस, ज़ैतूनेरो तेल, माछ़ी एपनी ज़मीनरी पैदावारी मरां पेइली फसल बड़ी जादे देने लगे, ते ज़ैन किछ ज़मीनी मां पैदा भोतू थियूं तैसेरो दशोवं हिस्सो भी खुशी सेइं देने लगे। 6 ज़ैना इस्राएली ते यहूदी, यहूदारे नगरन मां रहते थिये, तैना भी दांतां केरो ते गब्बां केरो दशोवं हिस्सो, ते तैन पवित्र चीज़ां केरो दशोवं हिस्सो, ज़ैना तैन केरे परमेशर यहोवारे लेई पवित्र कियोरी थी, एन्हतां ढेर लेइतां रखने लगे। 7 एन्च़रां सेइं ढेर लेइतां तैनेईं ट्लेइयोवं महीने मां शुरू केरतां सत्तोवं महीने मां पूरू कियूं। 8 ज़ैखन हिजकिय्याह राज़े ते हाकिमेईं एइतां तैना ढेर लाहे, तैखन यहोवा ते तैसेरे इस्राएली लोकां केरि तारीफ़ की। 9 तैखन हिजकिय्याहे याजक ते लेवी लोकन तैन ढेरां केरे बारे मां पुछ़ू। 10 अजर्याह महायाजके ज़ै सादोकेरे घराने मरां थियो, तैस सेइं ज़ोवं, "ज़ेइसेरे देंते एना लोक यहोवारे भवने मां छ़ुइतां ऐह च़ढ़तल आन्ने लगोरेन, तेइसेरे देंते असां लोक पेट भेरतां खाने लगोरेम, बल्के फिर भी बड़ू बच़ते। किजोकि यहोवा अपने लोकन बरकत दित्तोरिए, ते ज़ैन बाकी रेई जेवरूए, तैसारो ई बड़ो ढेरे।"

11 तैखन हिजकिय्याह यहोवारे भवने मां कमरे तियार केरनेरो हुक्म दित्तो, ते तैना कमरे तियार किये। 12 तैखन लोकेईं सल्‍लोरी च़ढ़तल, दशोवं हिस्सो ते पवित्र कियोरी चीज़ां, सच़्च़ैई सेइं पुज़ेई। ते तैन केरो खास लेवी अधिकारी थियो ज़ेसेरू नवं कोनन्याह थियूं ते दूइयोवं तैसेरो ढ्ला शिमी थियो। 13 ते कोनन्याह ते तैसेरो ढ्ला शिमी करां बाद, हिजकिय्याह राज़ो ते परमेशरे भवनेरो प्रधान अजर्याह दूईयां केरे हुक्मे सेइं यहीएल, अजज्याह, नहत, असाहेल, यरीमोत, योजाबाद, एलीएल, यिस्मक्याह, महत ते बनायाह अधिकारी थिये। 14 परमेशरेरे लेई अपने मेर्ज़ी सेइं देनेरे बेलि केरो अधिकारी यिम्ना लेवेरू मट्ठू कोरे थियूं। ज़ै भवनेरे पूर्वेरे फाटकेरो पहरदार थियो, कि तै यहोवा जो सल्‍लोरी च़ढ़तलां, ते परमपवित्र चीज़ां बंटन। 15 तैसेरे अधिकारे मां एदेन, मिन्यामीन, येशुअ, शमायाह, अमर्याह ते शकन्याह याजकां केरे नगरन मां रहते थिये, कि तैना कुन बड्डे, कुन निकड़े, अपने ढ्लान तैन केरे टोली केरे मुताबिक सच़्च़ैई सेइं देंते रान, 16 ते तैन केरे अलावा तैन भी देन, ज़ै मड़दां केरि वंशावेलरे मुताबिक गिनती भोवरी थी, गेइतां ट्लाई सालां*31:16 ट्लाई सालां इसेरो मतलब 30 साल भी भोइ सकते। केरे या तैस करां जादे उमरारे थिये, ते अपने-अपने टोली केरे मुताबिक अपनि-अपनि सेवा केरनेरे लेई हर दिहाड़ेरे मुताबिक यहोवारे भवने मां गाते रहते थिये। 17 तैन याजकन भी देन, ज़ैन केरि वंशावली तैन केरे पूर्वजां केरे घरानेरे मुताबिक गिनती कियोरी थी, ते तैन लेवी लोकन भी ज़ैना 20 सालन करां उबरे थिये ज़ैना अपने-अपने टोली केरे मुताबिक, अपनु-अपनु कम केरते थिये। 18 सैरी सभाई मां तैन केरे बाल-बच्‍चन, कौन्शन, मट्ठन ते कुइयन भी देन, ज़ैन केरि वंशावली थी, किजोकि तैना सच़्च़ैई सेइं अपने आपे शुद्ध केरते थिये। 19 फिरी हारूनेरे खानदानेरे याजकन भी ज़ैना अपने-अपने नगरां केरे चरागान बाले मैइदाने मां रहते थिये, देनेरे लेई तैना मड़द च़ुने जेवरे थिये ज़ैन केरां नंव्वां बह लिखोरां थियां कि तैना याजकां केरे सब मड़दन ते तैन केरे सब लेवन भी तैन केरो हिस्सो देन ज़ैन केरि वंशावली थी।

20 सारे यहूदा प्रदेशे मां भी हिजकिय्याहे एरहो इंतज़ाम कियो। ते ज़ैन किछ तैसेरे परमेशर यहोवारी नज़री मां रोड़ू ते भलू ते सच़्च़ेरू थियूं, तैस तै केरतो थियो। 21 ज़ैना-ज़ैना कम्मां तैनी परमेशरेरे भवनेरी उपासना ते कानून ते हुक्मेरे बारे मां अपने परमेशरेरे तलाशी मां कियां, ते तैन तैनी अपनो सारो मन लेइतां कियूं ते तैस मां कामयाब भी भोव।