2 इतिहास 9

शेबा मुल्खेरी रानी सुलैमान राज़े सेइं मिलने अई

1 ज़ैखन शेबा मुल्खेरी रैना सुलैमान राज़ेरे शान-ओ-शोकतरे बारे शुनू, तैखन तै मुश्किल-मुश्किल सवाल घिन्तां तैस अज़मानेरे लेई यरूशलेम नगरे मां अई। तै बड़े-बड़े अधिकारी ते मसाले ते बड़ू सोन्नू ते मेणि सेइं लद्दोरे ऊँट साथी एन्हतां एवरी थी, ते सुलैमाने कां पुज़तां तैन सैरी गल्‍लां केरे बारे मां ज़ैना तैसारे मने मां थी तैस सेइं गल्‍लां केरने लगी।✝9:1 1 राज़. 10:1-2. 2 सुलैमाने तैसारे सेभी सवालां केरो जुवाब दित्तो, कोई भी सवाल एरहो न थियो ज़ेसेरो जुवाब तै न देइ सको। 3 ज़ैखन शेबा मुल्खेरी रैनां सुलैमान राज़ेरी सारी अक्लमन्दी ते तैसेरो बनेवरो तै मेहल, 4 ते तैसेरे मेज़े पुड़ खानेरी चीज़ां हेरी, ते तैसेरे अधिकारी केन्च़रे खड़ेन ते तैनेईं केरहां-केरहां लिगड़ां लेवरन, ते तैसेरे पियाने बाले केरहे आन, ते केरू तै बलिदान यहोवारे भवने मां च़ाढ़ते, इन सब लेइतां तै हैरान भोइ।

5 तैखन तैसां सुलैमान राज़े सेइं ज़ोवं, "मीं तेरे कम्मां केरि ते अक्लरी ज़ै मुशूरी मीं अपने मुल्खे मां शुनोरी थी, तै सच़्च़े। 6 पन ज़ांतगर मीं एप्पु एइतां अपने एछ़्छ़ेईं न लाव, तांतगर मीं तैन गल्‍लन पुड़ विश्वास न कियो, पन मीं तेरी अक्लरी अध्धी बडीयाई भी न थी शुनोरी। तू त तैस करां भी बेद्धतां आस ज़ै मीं शुनोरी थी।✝9:6 1 राज़. 10:7. 7 धन आन तेरे लोक! धन आन इना तेरे अधिकारी! ज़ैना हर वक्त तीं कां खड़े रहतन, ते तेरी अक्लमन्द गल्‍लां शुन्तन। 8 तेरे परमेशर यहोवारी तारीफ़ भोए! ज़ै तीं पुड़ एत्रो खुश भोव, कि तू अपने तखते पुड़ एल्हेरेलेइ बिशालो कि तू अपने परमेशर यहोवारी तरफां राज़ केरस; तेरो परमेशर ज़ै इस्राएले सेइं प्यार केरते ते तैन हमेशारे लेई कायम केरनो चातो थियो, एल्हेरेलेइ तैनी तू न्याय केरनेबालो ते धार्मिकता केरनेरे लेई तैन केरो राज़ो बनेवरोस।" 9 तैसां राज़े लगभग 4000 किल्‍लो सोन्नू, ते बेड़ी खुशबूदार चीज़ां, ते मणि दित्ती; ज़ेत्री खुशबूदार चीज़ां शेबारे रैना सुलैमान राज़े दित्ती, तेत्री फिरी कधे न सुलैमान राज़े कोन्चे न दित्ती।

10 फिरी हीराम राज़ो ते सुलैमान राज़ो दूईयां केरां ज़िहाज़ां ज़ैना ओपीरे मरां सोन्नू आनतां थियां, तैना चन्दनेरी लकड़ी ते मणि भी आनतां थियां। 11 राज़े चन्दनेरी लेकड़ी सेइं यहोवारे भवन ते राज़ेरे मेहलेरे लेई चबूतरे ते गाने बज़ानेबालां केरे लेई सितार ते सैन्गी बनावेई। एरी चीज़ां तैस करां पेइले यहूदा प्रदेशे मां न थी लेइहोरी। 12 फिरी शेबारी रानी ज़ैन किछ चाती थी तैन सुलैमान राज़े तैस तैसारी इच्छयारे मुताबिक दित्तू; इन तैस करां जादे थियूं, ज़ैन तैसां राज़े कां आनोरू थियूं। तैखन तै अपने अधिकैरन समेत अपने मुल्खे जो वापस च़ली जेई।✝9:12 1 राज़. 10:13.

सुलैमानेरी धन-दौलत ते शक्ति

13 ज़ैन सोन्नू हर साल सुलैमाने कां पुज़तू थियूं, तैसेरो वज़न लगभग 23000 किल्‍लो थियो। 14 इन तैस करां जादे थियूं ज़ैन सौदागर ते बुपारी आनते थिये; ते अरब मुल्खेरे सारे राज़े ते मुल्खेरे अधिकारी भी सुलैमाने कां सोन्नू-चाँदी आनते थिये। 15 सुलैमान राज़े सोन्नेरी 200 बेड्डी-बेड्डी ढालां बनावेई; हर एक्‍की ढाली मां लगभग 7-7 किल्‍लो सोन्नू लेवरू थियूं। 16 फिरी तैनी सोन्नेरी 300 निक्‍की ढालां बनावेई; तैन मरां हर एक्‍केरी ढाली मां लगभग दूई किल्‍लो सोन्नू लग्गू, ते राज़े तैना लबानोनेरे बन नंव्वेरे मेहले मां रेखी दित्ती। 17 राज़े हाथी दांतां केरो अक बड्डो तखत बनाव ते तै खालिस सोन्ने सेइं मढ़ाव। 18 तैस तखते मां शा पेवड़ी ते सोन्नेरो अक पावदान थियो। एना सब तखते सेइं ज़ुड़ोरे थिये, ते बिशनेरे ठारी दूईये पासन टेकां लेगोरी थी ते दूईये टेकन कां अक-अक शेर खड़ो बनेवरो थियो। 19 शेइए पेवड़ी केरे दूईये पासन अक-अक शेर खड़ो बनोरो थियो, तैना सारे 12 थिये। कोन्ची हुकूमती मां एरू कधे नईं बनोरू। 20 सुलैमान राज़े कां पीनेरां सारां भांडां सोन्नेरां थियां, ते लबानोनेरे बन नंव्वेरे मेहले मां सारां भांडां खालिस सोन्नेरां थियां। ज़ैस वक्त सुलैमान राज़ केरतो थियो तैस वक्त चैंदरी कोई कीमत न थी। 21 किजोकि हीराम राज़ेरे ज़िहाज़न च़लानेबालन सेइं साथी सुलैमान राज़ेरां ज़िहाज़ां तर्शीश गातां थियां, ते ट्लाई-ट्लाई सालां केरे बाद तर्शीशेरां इना ज़िहाज़ां सोन्नू, चाँदी, हाथी दांत, बांदरां ते मोर आनते थियां।

22 सुलैमान राज़ो धन-दौलती मां ते अक्ली मां दुनियारे सारे राज़न करां बेद्धतां थियो। 23 धेरतरे सारे राज़े सुलैमानेरी तैना अक्लरी गल्‍लां शुन्नेरे लेई ज़ैना परमेशरे तैसेरे दिले मां पैदा कियोरी थी तैस सेइं मुलाकात केरनी चाते थिये। 24 तैना हर साल चाँदी ते सोन्नेरां भांडां, लिगड़ां, हथियार, खुशबूदार चीज़ां, घोड़े ते खचरां तोफे आनते थिये। 25 अपने घोड़े ते रथां केरे लेई सुलैमानेरे 4000 घुड़साल ते 12000 घोड़ सुवार भी थिये, ज़ैना तैनी रथां केरे नगरन मां ते यरूशलेम नगरे मां राज़े कां रखोरे थिये। 26 तै फरात दरियाए करां लेइतां पलिश्ती केरे मुल्खे ते मिस्र मुल्खेरे सरहद्दी तगर सारे राज़न पुड़ हुकूमत केरतो थियो। 27 राज़े एरू कियूं कि चाँदी जादे भोनेरे वजाई सेइं यरूशलेम नगरे मां चैंदरी कीमत घोड़ां केरि ज़ेरि ते गैइड़ेरी लेकड़री कीमत मुल्खेरे बुनीयें गूलरेरे बुट्टेरे लेकड़री ज़ेरि भोइ जेई। 28 मिस्र मुल्खे मरां ते होरी भी सेभी मुल्खन मरां सुलैमानेरे लेई घोड़े आने गाते थिये।

सुलैमान राज़ेरी मौत

29 शुरू करां आखरी तगर सुलैमान राज़ेरे ते तैसेरां सारां कम्मां नातान नेबेरी किताब मां, ते शीलो नगरेरे रानेबाले अहिय्याह नेबेरे नाबूतरी किताबी मां, ते नबातेरे मट्ठे यारोबामेरे बारे मां इद्दो नेबेरे किताबी मां लिखेरूए। 30 सुलैमाने यरूशलेम नगरे मरां सारे इस्राएले पुड़ 40 साल राज़ कियूं। 31 फिरी सुलैमान अपने दादे पड़दादां केरो ज़ेरो मेरि जेव ते तै तैसेरे बाजी दाऊदेरे नगरे मां दब्बो जेव। ते तैसेरू मट्ठू रहबाम तैसेरे जगाई पुड़ राज़ो बनो।