भवन बनानेरी तियारी
1 सुलैमान राज़े यहोवारे लेई भवन ते अपनो मेहल बनानेरे बारे मां सोचू। 2 एल्हेरेलेइ सुलैमाने 70000 भारो छ़ूंने बाले ते 80000 पहाड़े पुड़ घोड़ कढने बाले ते बुट कटनेबाले, ते 3600 गेनतां मैन्हु तैन निगरान रख्खे। 3 तैखन सुलैमाने सोर नगरेरे राज़े हीरामे कांजो ई समाद भेज़ो, "ज़ेरो तीं मेरे बाजी दाऊदे सेइं बर्ताव कियो, मतलब तैसेरे लेई मेहल बनानेरे लेई गैइड़ेरी लकड़ी भेज़ोरी थी, ते हुनी मीं सेइं भी एरहो बर्ताव केर। 4 हेर, अवं अपने परमेशर यहोवारो भवन बनाने बालोईं, कि तैस तैसेरे लेई अर्पण केरीं ते तैसेरे सामने खुशबूदार गुग्गल बैली; ते हमेशा तैसेरे लेई च़ैढ़ोरी रोट्टी तैस मां रेखी, ते रोज़ झ़ेझ़ां ते ड्लवझ़ां, ते आरामेरे दिहाड़े ते नंव्वे चाँदेरे दिहाड़न मां ते इश्शे परमेशर यहोवारे सारे तिहारन मां होमबलि च़ाढ़ी गाए। इस्राएलेरे लेई ऐह हमेशा विधि आहे। 5 ज़ै भवन अवं बनाने बालोईं, तै बड़ो महान भोल्हो। किजोकि इश्शो परमेशर सारे देबतन करां बड्डो भोल्हो। 6 पन केस मां एत्री शक्ति आहे, कि तैसेरे लेई भवन बनाए, तै त सुर्गे मां बल्के सेभन करां उच्चे सुर्गे मां भी न लग्गे? अवं कौन आईं कि तैसेरे सामने गुग्गल बालनेरे अलावा कोन्ची तरीके सेइं तैसेरो भवन बनेइं? 7 एल्हेरेलेइ हुनी तू मीं कां अक एरहो कारीगिर भेज़, ज़ै सोन्नू, चाँदी, पितल, लोंह, ते बैंगनी, लाल ते नीले कपड़ेरी कारीगिरी मां पूरो ज़ानकार भोए ते घड़ाई भी केरनी ज़ानतो भोए, कि तै मेरे बाजी दाऊदेरे च़ुनोरे पूरे कारीगिरन सेइं साथी भोइतां ज़ैना मीं कां यहूदा प्रदेश ते यरूशलेम नगरे मां रहतन, कम केरे। 8 फिरी लबानोने मरां मीं कांजो गैइड़, सनोवर ते चन्दनेरी लकड़ी भेज़ां, किजोकि अवं ज़ानताईं कि तेरे दास लबानोने मां बुट कटने ज़ानतन, ते तेरे मज़दूरन सेइं साथी मेरे मज़दूर भी रेइतां, 9 मेरे लेई बड़ी जादे लकड़ी तियार केरेले, किजोकि ज़ै भवन अवं बनानो चाताईं, तै शानदार ते खूबसूरत भोल्हो। 10 तेरे मज़दूर ज़ैना लकड़ी कट्टेले, तैन अवं 20000 टन गेहुं, 20000 टन जौ, लगभग च़ेवर लख लीटर दाछ़रो रस ते च़ेवर लख लीटर तेल देइलो।"
11 तैखन सोर नगरेरे राज़े हीरामे ई चिट्ठी लिखतां सुलैमाने कांजो भेज़ी: "यहोवा अपने लोकन सेइं प्यार केरते, एल्हेरेलेइ तैनी तू तैन केरो राज़ो बनेवरोस।" 12 फिरी हीरामे इन भी लिखू, "इस्राएलेरो परमेशर यहोवारी तारीफ़ भोए, ज़ैनी अम्बर ते धरती बनेवरीए, तैनी दाऊद राज़े अक अक्लमन्द, हुशार ते समझ़दार मट्ठू दित्तोरूए, ताके तैन यहोवारे लेई अक भवन ते अपने लेई भी अक मेहल बनाए। 13 एल्हेरेलेइ हुनी अवं हूराम-अबी तीं कां भेज़ताईं, ज़ै माहिर कारीगिरे। 14 तैसेरी अम्मा दान गोट्ले मरांए, ते तैसारो बाजी सोर मुल्खेरे रानेबालो थियो। तै सोन्नू, चाँदी, पितल, लोंह, घोड़, लकड़ी, बैंगनी ते नीले ते लाल सनेरे कपड़ां केरू कम, ते हर किसमेरी घड़ाई ज़ानते ते सेभी किसमेरी कारीगिरी ज़ानते: एल्हेरेलेइ तेरे कारीगिरन सेइं साथी, ते मेरे मालिक तेरे बाजी दाऊदेरे कारीगिरन सेइं साथी, तैस भी कम दित्तू गाए। 15 मेरे मालिके गेहुं, जौ, तेल ते दाछ़रो रस भेज़नेरो वाधो कियोरोए, तैस अपने मज़दूरन कांजो भेज़ा। 16 ते अस लोक ज़ेत्री लकड़ी तीं लोड़ती भोए तेत्री लकड़ी असां लबानोने मां कटमेले, ते बेड़े बनावेइतां समुन्दरे मांमेइं केढतां याफा नगरे मां पुज़ामेले, ते तू तैस यरूशलेम नगरे जो नेइयां।"
सुलैमानेरे कम केरनेबाले
17 तैखन सुलैमाने इस्राएल मुल्खेरे सारे परदेशी लोकां केरि गिनती की, ऐह गिनती तैस गिनतरे बाद की ज़ै तैसेरे बाजी दाऊदे करेवरी थी। ते तैना 153600 थी। 18 तैन परदेशन मरां तैनी 70000 भारो छ़ूंने बाले, 80000 पहाड़े पुड़ घोड़ कढने बाले ते बुट कटनेबाले ते 3600 तैन लोकन करां कम करानेबाले निगरान च़ुनू।