1 यहोशापात राज़ो बड़ो अमीर ते बड़ो इज़्ज़तदार भोइ जेव। ते तैनी अहाब इस्राएलेरे राज़ेरे घराने सेइं ड्लाह बनानेरो करार कियो। 2 किछ सालां केरे बाद यहोशापात सामरिया नगरे मां अहाबे कां जेव, तैखन अहाबे तैसेरे लेई ते तैसेरे सैथी केरे लेई बेड़ी भैड्डां-छ़ेल्‍ली ते बेछ़ी दांत केटतां, तै गिलाद प्रदेशेरे रामोत नगरे हमलो केरनेरे लेई उकसव। 3 इस्राएलेरे राज़े अहाबे यहूदारे राज़े यहोशापात सेइं ज़ोवं, "कुन तू मीं सेइं साथी गिलादेरे रामोत नगरे पुड़ हमलो केरेलो?" तैनी तैस जुवाब दित्तो, "ज़ेरो तू तेरहो अवं भी आईं, ते ज़ेरि तेरी सेना, तेरही मेरी सेना आहे। अस जंगी मां तेरू साथ देमेले।"

4 पन यहोशापात राज़े इस्राएलेरे राज़े सेइं ज़ोवं, "एई, पेइले यहोवारी मर्ज़ी पुछ़म।" 5 तैखन इस्राएलेरे राज़े 400 नबी अकोट्ठे केरतां तैन पुछ़ू, "कुन अस गिलाद प्रदेशेरे रामोत नगरे पुड़ जंग केरनेरे लेई हमलो केरम या नईं?" तैनेईं जुवाब दित्तो, "हमलो केरा, किजोकि परमेशरे तैन राज़ेरे हथ्थे मां केरेलो।" 6 पन यहोशापाते पुछ़ू, "कुन इड़ी यहोवारो होरो भी कोई नबीए ज़ैस अस पुछ़म?" 7 इस्राएलेरे राज़े अहाबे यहोशापात राज़े सेइं ज़ोवं, "हाँ, अक होरो भी आहे, ज़ेसेरे ज़िरिये अस यहोवा पुछ़ी सखतम; पन अवं तैस सेइं नफरत केरताईं; किजोकि तै मेरे बारे मां कधे फैइदेरी नईं, बल्के हमेशा नुक्सानेरी नबूवत केरते। तैन यिम्लारू मट्ठू मीकायाहे।" यहोशापाते ज़ोवं, "राज़े एरू न लोड़े ज़ोवरू।" 8 तैखन इस्राएलेरे राज़े अक अधिकारी कुजेइतां तैस हुक्म दित्तो, "यिम्लारू मट्ठू मीकायाह जल्दी मीं कां आन।" 9 इस्राएलेरो राज़ो अहाब ते यहूदारो राज़ो यहोशापात अपने-अपने राज़ेरो लबास लेइतां, अपने-अपने तखते पुड़ बिश्शोरे थिये। तैना सामरिया नगरेरे फाटके मां खुल्‍ली जगाई मां बिश्शोरे थिये ते सारे नबी तैन केरे सामने नबूवत केरि राहोरे थिये। 10 तैखन कनानारू मट्ठू सिदकिय्याह नेबे लोंहेरां शिंगां बनावेइतां ज़ोवं, "यहोवा इन ज़ोते, कि इन सेइं तू अरामी लोक मारतो-मारतो तैन केरो नाश केरेलो।" 11 सारे नेबेईं एस्से उमीदी सेइं नबूवत केरतां ज़ोवं, "गिलाद प्रदेशेरे रामोत नगरे पुड़ हमलो केर ते तू ज़ींतेलो। किजोकि यहोवा तैस राज़े तेरे हथ्थे मां केरेलो।"

12 ज़ै दूत मीकायाह नबी कुजाने जेवरो थियो, तैनी तैस सेइं ज़ोवं, "शुन, सारे नबी एक्‍के गल ज़ोई राहोरेन कि राज़े ज़ींत मैल्हेली; एल्हेरेलेइ तू भी तैन केरि ज़ेरि रोड़ी गल्‍लां ज़ोइयां।" 13 पन मीकायाह नेबे ज़ोवं, "यहोवारी कसम, ज़ैन किछ यहोवा ज़ोलो अवं भी तैन्ने ज़ोइलो।" 14 ज़ैखन मीकायाह अहाब राज़े कां अव, तैखन राज़े तैस पुछ़ू, "हे मीकायाह, कुन अस गिलादेरे रामोते पुड़ हमलो केरम या नईं?" तैनी ज़ोवं, "हाँ, तुस हमलो केरा, ते ज़ींतां, ते तैना तुश्शे हथ्थे मां किये गाले।" 15 राज़े तैस सेइं ज़ोवं, "मीं केत्रे बार तीं कसम देइतां खबरदार केरनू पेनूए, कि तू यहोवा याद केरतां मीं सेइं सच़ ज़ो।" 16 मीकायाह ज़ोवं, "मीं सारी इस्राएली सेना बगैर पुहालेरे भैड्डां-छ़ेल्‍ली केरे ज़ेरे पहाड़न पुड़ तितर-बितर लाहे, ते यहोवा ज़ोवं कि तैना अनाथ आन, एल्हेरेलेइ हर कोई अपने-अपने घरे जो सुखे सेइं च़ले गान।"✝ 17 तैखन इस्राएलेरे राज़े यहोशापात राज़े सेइं ज़ोवं, "कुन मीं तीं सेइं न थियूं ज़ोवरू, कि तै मेरे बारे मां फैइदेरी नईं, बल्के नुक्सानेरी नबूवत केरेलो?" 18 मीकायाह ज़ोवं, "एल्हेरेलेइ तुस यहोवारू एन वचन शुना, मीं तखते पुड़ बिशोरो यहोवा ते तैसेरे देइने-बांए खड़ी सारी सुर्गेरी सेना लाही।✝ 19 तैखन यहोवा पुछ़ू, ‘इस्राएलेरे राज़े अहाबे कौन एन्च़रे भड़कालो, कि तै गिलादेरे रामोत नगरे पुड़ हमलो केरे।’ तैखन स्वर्गदूतां केरि सेना केन्चे किछ ते केन्चे किछ ज़ोवं। 20 आखरी मां अक आत्मा एइतां यहोवारे सामने खड़ी भोइतां ज़ोने लगी, ‘अवं तैस भड़काली।’ 21 यहोवा तैस पुछ़ू, ‘कौस तरीके सेइं?’ तैसां आत्मा जुवाब दित्तो, ‘अवं गेइतां तैसेरे सारे नेबन मां बेसतां तैन करां झूठी नबूत कराली।’ यहोवा ज़ोवं, ‘तू तैन भड़काने मां कामयाब भोल्ही, गेइतां एन्च़रे केर।’ 22 एल्हेरेलेइ शुन, हुनी यहोवा एन नेबी केरे ऐशी मां अक झूठ ज़ोनेबाली आत्मा छ़डोरीए, ते यहोवा तेरे बारे मां नुक्सानेरी गल ज़ोवरीए।"

23 तैखन कनानारे मट्ठे सिदकिय्याह नेबे नेड़े गेइतां, मीकायाहेरे तुत्तरे पुड़ थप्पड़ बैइतां पुछ़ू, "यहोवारी आत्मा मीं छ़ेडतां तीं सेइं गल्‍लां केरने कोरहां जेई।" 24 तैनी ज़ोवं, "ज़ैस दिहाड़े तू छ़पनेरे लेई एक्‍की कमरे मरां होरी कमरे मांजो नश्शेलो, तैखन तीं पतो च़लेलो।" 25 तैखन इस्राएलेरे राज़े ज़ोवं, "मीकायाह नगरेरे हाकिम आमोन ते राज़ेरे मट्ठे योआशे कां वापस गेइतां, 26 तैन सेइं ज़ोथ, ‘राज़ो इन ज़ोते, कि एस कैदखाने मां छ़डा, ते ज़ांतगर अवं जंगी मरां सुखे सेइं वापस न एज्जी, तांतगर एस थोड़ी-थोड़ी रोट्टी पानी देते राथ।’"✝ 27 तैखन मीकायाह लोकन सेइं ज़ोने लगो, "अगर तू सच़्च़े सुखे सेइं वापस एजस, त समझ़ यहोवा मेरे ज़िरिये नईं ज़ोवरू।" फिरी तैनी ज़ोवं, "हे सब लोकव, तुस भी शुना।"

28 तैखन इस्राएलेरे राज़े अहाबे ते यहूदारे राज़े यहोशापाते दूइयेईं गिलाद प्रदेशेरे रामोत नगरे पुड़ हमलो कियो। 29 इस्राएलेरे राज़े अहाबे यहोशापात राज़े सेइं ज़ोवं, "अवं त रूप बेदलतां जंगी मां गालो, पन तू अपना लिगड़ां लेइतां रेखां।" इस्राएलेरे राज़े रूप बदलू ते तैना दूईये जंगी मां जे। 30 अरामेरे राज़े त अपने रथां केरे सेनापतिन हुक्म दित्तोरो थियो, "इस्राएलेरे राज़ेरे अलावा कोन्ची पुड़ हमलो न केरथ।" 31 एल्हेरेलेइ ज़ैखन रथां केरे सेनापेतेईं यहोशापात लाव, तैखन ज़ोवं, "इस्राएलेरो राज़ो तैए," ते तैना तैस्से सेइं लड़नेरे लेई मुड़े। तैखन यहोशापाते मद्दतरे लेई प्राथना की, तैखन यहोवाए तैसेरी मद्दत की। परमेशरे तैना तैस करां दूर गाने दित्ते। 32 एन हेरतां कि तै इस्राएलेरो राज़ो नईं, रथां केरे सेनापति तैसेरो पीछो छ़ेडतां वापस जे। 33 तैखन केन्चे एन्च़रे अक तीर च़लाव, ते तै इस्राएलेरे राज़ेरी झिलमी ते कमरबन्धेरे मझ़ाटे लग्गो। तैखन तैनी अपने रथ च़लानेबाले सेइं ज़ोवं, "अवं ज़खमी भोवरोईं, एल्हेरेलेइ लगाम मोड़तां मीं सेनाई मरां बेइर ने।" 34 ते तैस दिहाड़े जंग बद्धती जेई ते इस्राएलेरो राज़ो अपने रथे मां अरामी केरे सामने ड्लवझ़ां तगर खड़ो राव, ते दिहाड़ो डुबते-डुबते तै मेरि जेव।