2 इतिहास 11

रहबामेरू राज़

1 ज़ैखन रहबाम यरूशलेम नगरे मां पुज़्ज़ो, तैखन तैनी यहूदा ते बिन्यामीनेरे घरानेरे ज़ैना कुल मिलेइतां 180000 जंग लड़नेबाले सिपाही थिये, तैना अकोट्ठे किये, कि इस्राएली लोकन सेइं जंग केरीं ज़ैस सेइं राज़ रहबामेरे वशे मां फिरी एज्जी गाए। 2 पन यहोवा शमायाह नेबी सेइं इन ज़ोवं, 3 "यहूदा प्रदेशेरे राज़े सुलैमानेरे मट्ठे रहबामे सेइं ते यहूदा ते बिन्यामीन गोट्लां केरे सारे इस्राएली लोकन सेइं ज़ो, 4 ‘यहोवा इन ज़ोते, कि अपने भियालन पुड़ हमलो केरतां जंग न केरां। तुस अपने-अपने घरे जो वापस गाथ, किजोकि ऐह गल मेरी तरफां भोवरी।’" यहोवारो ई हुक्म मेनतां, ते तैना यारोबामे पुड़ हमलो केरने बगैर वापस च़ले जेव।

रहबाम राज़ो नगरन मज़बूत केरते

5 रहबाम यरूशलेम नगरे मां राने लगो, ते यहूदा प्रदेशे मां बचावेरे लेई इना नगर मज़बूत कियां, 6 बैतलहम, एताम, तकोआ, 7 बेतसूर, सोको, अदुल्‍लाम, 8 गत, मारेशा, जीप, 9 अदोरैम, लाकीश, अजेका, 10 सोरा, अय्यालोन ते हेब्रोन, यहूदा ते बिन्यामीन प्रादेशन मां इनां नगरां थियां। 11 तैनी मज़बूत नगर होरां मज़बूत केरतां तैन मां प्रधान रख्खे, ते खानेरी चीज़ां ते तेल ते दाछ़रे रसेरे गुदाम रख्खाए। 12 फिरी हर एक्‍की नगरे मां तैनी ढालां ते भाले रेखतां तैना बड़ां मज़बूत कियां। यहूदा ते बिन्यामीन प्रदेश त रहबामेरे अधिकारे मां थिये।

याजक ते लेवी यहूदा प्रादेशे मां एइतन

13 सारे इस्राएलेरे याजक ते लेवी भी अपने सारे मुल्खे मरां निस्तां रहबामे कां जे। 14 एल्हेरेलेइ बड़े लेवी चरागान ते अपनि ज़मीन शैरतां, यहूदा प्रदेश ते यरूशलेम नगरे मां आहे, किजोकि यारोबाम ते तैसेरे मट्ठेईं तैना कढोरे थिये कि तैना यहोवारे लेई याजकेरू कम न केरन, 15 ते तैनी उच्‍ची ठारां ते थाव्वे देबतां केरि मूरती ते अपने बनेवरे बछ़ड़ां केरि मूरती, अपने तरफां याजक ठहराए। 16 लेवी लोकां केरे बाद इस्राएलेरे सारे गोट्लन मरां ज़ेत्रे मन लेइतां इस्राएलेरे परमेशर यहोवारे तोपी मां थिये तैना अपने दादे-पड़दादां केरे परमेशर यहोवारे लेई बलि च़ाढ़नेरे लेई यरूशलेम नगरे जो आए। 17 तैनेईं यहूदा प्रदेशेरू राज़ मज़बूत कियूं ते सुलैमानेरे मट्ठे रहबामेरी ट्लाई सालन तगर मद्दत की, किजोकि ट्लाई सालन तगर तै दाऊद राज़ो ते सुलैमानेरो ज़ेरो च़लतो राव।

रहबाम राज़ेरू टब्बर

18 रहबामे महलती सेइं ड्लाह बनाव ज़ैसारो बाजी दाऊदेरू मट्ठू यरीमोत ते अम्मा यिशैरे मट्ठे एलीआबेरी कुई अबीहैल थी। 19 तैसेरां मट्ठां यूश, शेमर्याह ते जाहम थियां। 20 तैसेरां बाद रहबामे अबशालोमेरी कुई माका सेइं ड्लाह बनाव, ते तैसारां मट्ठां अबिय्याह, अत्तै, जीजा, ते शलोमीत थियां। 21 रहबामेरी 18 रैनी ते 60 रखैलां थी, ते तैसेरां 28 मट्ठां ते 60 कुइयां थी। अबशालोमेरी कुई माका सेइं तै एपनी सैरी रैनन ते रखैलन करां जादे प्यार केरतो थियो। 22 रहबामे माकारू मट्ठू अबिय्याह सेभन मां खास ते सारे ढ्लान मां प्रधान एल्हेरेलेइ बनाव, कि तैस राज़ो बनाए। 23 तैनी ज़ैनी-बुझ़तां एन कम कियूं, ते तैनी अपना सारां मट्ठां अलग-अलग केरतां यहूदा ते बिन्यामीन प्रदेशां केरे सारे क़िले बाले नगरन मां रखां। ते तैन खानेरी बेड़ी चीज़ां दित्ती, ते तैन सेभी केरो ड्लाह बनाव।