योताम राज़ेरू राज़
1 ज़ैखन योताम यहूदा प्रदेशेरो राज़ो बनो तैखन तैसेरी उमर 25 साल थी, ते तैनी यरूशलेम नगरे मां 16 साल राज़ कियूं। ते तैसेरी अम्मरू नवं यरूशा थियूं, ज़ै सादोकेरी कुई थी। 2 तैनी तैन कियूं, ज़ैन यहोवारी नज़री मां भलू थियूं, ज़ेन्च़रे तैसेरे बाजे उज्जियाह कियोरू थियूं, ठीक तेन्च़रे तैनी भी कियूं फिरी भी तै यहोवारे भवने मां न जेव। पन यहूदा प्रदेशेरे लोक परमेशरेरे खलाफ पाप केरते थिये। 3 तैनी यहोवारे भवनेरे बेइयें फाटकेरी मरम्मत कराई, ते ओपेल पहाड़ेरे शहरपनाही पुड़ बड़ू किछ बनावं। 4 फिरी तैनी यहूदारे पहाड़ी प्रदेशे मां बड़े नगर बसाए, ते जंगलन मां क़िले ते गुम्मट बनाए। 5 तैनी अम्मोनी केरे राज़े सेइं जंग केरतां तैन पुड़ कब्ज़ो कियो। ते तैस्से साल अम्मोनी लोकेईं तैस लगभग 3400 किल्लो चाँदी, ते 1000-1000 हज़ार टन गेहुं ते जौ दित्ते। फिरी दूइयोवं ते ट्लेइयोवं साले मां भी तैनेईं तैस तेत्रू दित्तू। 6 एन्च़रे सेइं योताम ताकतबर भोइ जेव, किजोकि तै अपने परमेशर यहोवा सेइं साथी वफादैरी सेइं च़लतो राव। 7 योतामेरां बाकी सारां कम्मां ते तैसेरी जंग ते तैसेरो चाल चलन, इना सैरी गल्लां केरे बारे इस्राएलेरे ते यहूदारे राज़ां केरे इतिहासेरी किताबी मां लिखेरूए। 8 ज़ैखन योताम राज़ो बनो, तैखन तैसेरी उमर 25 साल थी। ते तैनी यरूशलेम नगरे मां 16 साल राज़ कियूं। 9 ज़ैखन योताम राज़ो अपने दादे-पड़दादां केरो ज़ेरो मेरि जेव, तैखन तै दाऊदपुरे मां दब्बो जेव। ते तैसेरू मट्ठू आहाज तैसेरे जगाई पुड़ राज़ो बनो।