1 यहूदा प्रदेशेरो राज़ो यहोशापात यरूशलेम नगरे मां अपने मेहले मां सुखे सेइं वापस च़लो जेव। 2 तैखन हनानी नेबेरू मट्ठू येहू नबी यहोशापात राज़े सेइं मिलनेरे लेई निस्सू ते तै तैस सेइं ज़ोने लगो, "कुन बुरे लोकां केरि मद्दत केरनी ते यहोवारे दुश्मन्न सेइं प्यार कियोरो लोड़े? एल्हेरेलेइ तीं पुड़ यहोवारी तरफां क्रोध भड़कोरोए। 3 फिरी भी तीं मां किछ रोड़ी गल्‍लां मैल्होरिन। तीं त मुल्खे मरां अशेरा देबरी मूरती त नाश की ते अपनो मन परमेशरेरी तलाशी मां लेवरोए।"

4 यहोशापात राज़ो यरूशलेम नगरे मां रहतो थियो, ते तैनी बेर्शेबा नगरे करां लेइतां एप्रैमेरे पहाड़ी प्रदेशे तगर अपने लोकन मां फिरी दौरो केरतां, तैना तैन केरे पूर्वजां केरे परमेशर यहोवारे पासे फेरी दित्ते। 5 फिरी तैनी यहूदारे हर एक्‍की क़िले बाले नगरन मां न्यायी रख्खे। 6 ते यहोशापाते न्यायी लोकन सलाह दित्ती, "सोचा कि कुन केरा न्याय केरतथ, किजोकि तुस ज़ै न्याय केरेले, तै मैन्हु केरे लेई नईं, बल्के यहोवारे लेई केरेले। ते तै यहोवा न्याय केरते बार तुसन सेइं साथी रालो। 7 हुनी यहोवारो डर तुश्शे मने मां राए। एहतियाती सेइं कम केरा, किजोकि इश्शे परमेशर यहोवा मां किछ बुराई नईं, ते न तै केन्चेरी तरफदारी केरे ते न रिश्पत नेते।"✝

8 यरूशलेमे मां भी यहोशापाते लेवी ते याजक ते इस्राएली पूर्वजां घरानेरे केरे किछ प्रधान यहोवारी तरफां न्याय केरनेरे लेई ते मुकदमो जांचनेरे लेई च़ुने। तैन केरो आदालत त यरूशलेम नगरे मां थियो। 9 राज़े तैन हुक्म दित्तो, "यहोवारो डर मेनतां, सच़्च़ाई ते साफ दिले सेइं न्याय केरा। 10 तुश्शे भियाल ज़ैना अपने-अपने नगरन मां रहतन, तैन मरां ज़ेसेरो कोई मुकदमो तुश्शे सामने एज्जे, चाहे तै कत्ल केरनेरे बारे मां भोए, चाहे कानूनेरो, या कोन्ची हुक्मेरे या विधि या नियमेरे बारे मां भोए, तुस तैन सेइं ज़ोइयथ कि यहोवारे खलाफ पाप न केरन। एरू न भोए कि तैसेरो क्रोध तुसन पुड़ ते तुश्शे भियालन पुड़ भड़के। अगर एन्च़रे केरेले त तुस दोषी न भोल्हे। 11 ते हेरा, यहोवारे बारे मां सारे मुकदमन मां त अमर्याह महायाजक, ते राज़ेरे बारे मां सारे मुकदमन मां यहूदारे घरानेरो प्रधान इश्माएलेरू मट्ठू जबद्याह तुसन पुड़ अधिकारी भोल्हो। ते लेवी तुश्शे सामने अधिकारी भोल्हे। एल्हेरेलेइ हिम्मत रेखतां कम केरा ते भले मैन्हु सेइं साथी यहोवा रालो।"