2 इतिहास 7

भवने मां परमेशरेरी महिमा

1 ज़ैखन सुलैमान राज़े ई प्राथना की, तैखन सुर्गे मरां अग एइतां होमबलि ते अन्नबलि भस्म की, ते यहोवारी महिमा भवने मां भेरोई जेई। 2 याजक यहोवारे भवने मां गेइ न सखे, किजोकि यहोवारी महिमा भवने मां भेरोई जेवरी थी। 3 ते ज़ैखन अग उतरी ते यहोवारी महिमा भवने पुड़ अई, तैखन सारे इस्राएली हेरते राए, ते तल्‍ले मां लिकतां अपनु-अपनु तुत्तर ज़मीनी पुड़ झुकेइतां प्रणाम कियूं, ते एन ज़ोइतां यहोवारू शुक्र कियूं, "तै भलोए, तैसेरी दया हमेशारी आहे।"

बलिदान च़ाढ़ना

4 तैखन सारे इस्राएली लोकन समेत राज़े यहोवा कां बलिदान च़ाढ़ी। 5 सुलैमान राज़े 22000 दांत ते 120000 भैड्डां-छ़ेल्‍ली बलि च़ैढ़ी। एन्च़रे सेइं सारे लोकन समेत राज़े यहोवारे भवनेरी प्रतिष्ठा की। 6 याजक सेवा केरनेरे लेई खड़े राए, ते लेवी भी यहोवारां गीतां ज़ोनेरे लेई साज़ बाज़ ट्लेइतां खड़े थिये, ज़ैना दाऊद राज़े यहोवारी हमेशारी दयारी वजाई सेइं तैसेरू शुक्र केरनेरे लेई बनेइतां तैन केरे ज़िरिये तारीफ़ करेवरी थी। ते इन केरे सामने याजक नरशिंगे बज़ाते राए। ते सारे इस्राएली खड़े राए।

7 फिरी सुलैमान राज़े यहोवारे भवनेरे सामने अंगनेरे मझ़ाटे अक ठार पवित्र केरतां होमबलि ते मेलबलि केरि चर्भी च़ाढ़ी, किजोकि सुलैमानेरी बनेवरी पितलरी वेदी होमबलि ते अन्नबलि ते चेर्भरे लेई निकड़ी थी।

अर्पण केरनेरू तिहार

8 तैस्से मौके सुलैमान राज़े ते तैस सेइं साथी हमातेरी वैदी करां लेइतां मिस्रेरे नाले तगर सारे इस्राएली लोकेईं होरे सत दिहाड़न तगर झोफड़ी केरू तिहार मनाव। 9 ते अठोवं दिहाड़े तैनेईं महासभा की, किजोकि तैनेईं वेदरी प्रतिष्ठा सत दिहाड़न तगर की। ते तिहार भी सत दिहाड़े मनावं। 10 सत्तोवं महीनेरे तरेइयोवं दिहाड़े सुलैमाने लोक अपने-अपने डेरन जो भेज़े, ते तैना तैस भलैइयरे वजाई सेइं ज़ै यहोवा दाऊदे ते सुलैमाने ते अपने इस्राएली लोकन पुड़ कियोरी थी खुशी थिये।

यहोवारो वाधो ते खबरदारी

11 एन्च़रे सुलैमाने यहोवारो भवन ते मेहल बनाव, ते यहोवारे भवने मां ते अपने मेहले मां ज़ैन किछ तैनी बनानू चाऊ, तैस मां तै कामयाब भोव। 12 किछ वक्तेरां बाद एक्‍की राती यहोवा सुपने मां दर्शन देइतां तैस सेइं ज़ोवं, "मीं तेरी प्राथना शुनोरीए ते ई भवन च़ुनोरोए कि ज़ैड़ी मेरे लेई बलिदाना च़ाढ़ा गान। 13 अगर अवं अम्बरेरां झ़ड़ी बखनी बन्द केरि, या टिट्टां तुश्शे ऊडारां केरि फसल खान, या अपने लोकन मां मरी फैलेईं, 14 तैखन अगर मेरे लोक ज़ैन जो मेरे लोक ज़ोतन, मेरे दर्शनेरी तोपी मां रेइतां अपने बुरे चाली करां फिरन ते दीन भोइतां प्राथना केरन, त तैखन अवं सुर्गे मरां शुन्तां तैन केरो पाप माफ़ केरेलो ते तैन केरो मुल्ख ज़ेरो थियो तेरहो केरेलो। 15 हुनी ज़ै प्राथना इस भवने मां की गाली, तैस अवं शुनेलो। 16 किजोकि हुनी मीं ई भवन च़ुनोरोए ते पवित्र कियोरोए कि इस मां मेरी आराधना हमेशा की गाए। मेरी एछ़्छ़ी ते मेरो मन दूईये हमेशा इड़ी लगोरो राले। 17 अगर तू अपने बाजी दाऊदेरो ज़ेरो मेरे सामने च़लतो रालो ते मेरे सारे हुक्मां केरे मुताबिक केरतो रालो, ते मेरे विधन ते हुक्मन मन्तो रालो, 18 त अवं तेरो तखत कायम रेखेलो; ज़ेन्च़रे कि मीं तेरे बाजी दाऊदे सेइं करार कियोरो थियो, कि तेरे खानदाने मरां इस्राएले पुड़ राज़ो बन्नेरे लेई कमी न भोए। 19 पन अगर तुस लोक मीं करां दूर भोथ, ते मेरी विधि ते हुक्म ज़ैना मीं तुसन दित्तोरेन तैन करां दूर भोथ, ते गेइतां बखले देबतां केरि आराधना केरथ ते तैन कां झुकथ, 20 त अवं तैन अपने मुल्खे मरां कढेलो ज़ै मीं तैन दित्तोरोए। ते इस भवने ज़ै मीं अपने लेई पवित्र कियोरोए, अपने नज़री करां दूर केरेलो; ते एरू केरेलो कि मुल्खे-मुल्खेरे लोक तैसेरू ऊपाम देले ते तैसेरो मज़ाक बनाले। 21 ई भवन ज़ै एत्रो बड्डो आहे, तैस मेइं एजने गानेबाले हैरान रेइतां एक्‍की होरि पुछ़ेले, ‘यहोवा एस मुल्खे ते इस भवने सेइं एरू किजो कियूं?’ 22 तैखन लोक जुवाब देले, ‘तैन लोकेईं अपने पूर्वजां केरे परमेशर यहोवा ज़ैनी तैना मिस्र मुल्खे मरां केढतां आनोरे थिये, तैनेईं तै शैरतां बखले देबते कबूल किये, ते तैन केरि आराधना की ते तैन केरि सेवा की, इस वजाई सेइं तैने ई आफत तैन पुड़ छ़डी।’"