1 तैखन यरूशलेमेरे रानेबालेईं यहोरामेरू निकड़ू मट्ठू अहज्याह तैसेरी जगाई पुड़ राज़ो बनाव। किजोकि ज़ै सेना अरबी लोकन सेइं साथी छेंवनी मां एवरी थी, तैनी तैसेरां सारां बड्डां मट्ठां मारोरां थियां, एन्च़रे सेइं यहूदारे राज़े यहोरामेरू मट्ठू अहज्याह राज़ो बनो। 2 अहज्याह 22 सालां केरि उमरी मां राज़ो बनो, ते तैनी यरूशलेम नगरे मां सिर्फ अक साल राज़ कियूं। तैसेरी अम्मरू नवं अतल्याह थियूं, ज़ै इस्राएलेरे राज़े ओम्री एरी पोट्लड़ी थी। 3 तै अहाबेरे घरानेरी ज़ेरि चाल च़लतो राव, किजोकि तैसेरी अम्मा तैस बुराई केरनेरी सलाह देती थी। 4 तै अहाबेरे घरानेरू ज़ेरू कम केरतो, राव ज़ैन यहोवारे नज़री मां बुरू थियूं, किजोकि तैसेरे बाजेरी मौतरे बाद तैना तैस एरी सलाह देते थिये, ज़ैस सेइं तैसेरो नाश भोव। 5 तै तैन केरि सलाहरे मुताबिक च़लतो थियो, ते इस्राएलेरो राज़ो अहाबेरू मट्ठू यहोरामे सेइं साथी गिलादेरे रामोत नगरे मां अरामेरे राज़े हजाएले सेइं लड़ने जेव, ते अरामी सेना यहोराम ज़खमी कियो। 6 यहोराम राज़ो एल्हेरेलेइ वापस जेव कि यिज्रेल नगरे मां तैन ज़खमां केरो आलाज़ कमाए ज़ैना तैस अरामी सेनारे हथेइं सेइं तैस मौके लगोरे थिये ज़ैखन तै हजाएले सेइं लेड़ी राहोरो थियो। किजोकि अहाबेरू मट्ठू यहोराम ज़ैन यिज्रेल नगरे मां बिमार थियूं, एस वजाई सेइं यहूदारे राज़े यहोरामेरू मट्ठू अजर्याह तैस हेरने जेवरू थियूं।

7 अहज्याहेरो नाश यहोवारी तरफां भोव, किजोकि तै यहोरामे कां जेवरो थियो। ज़ैखन तै तैड़ी पुज़्ज़ो, तैखन यहोरामे सेइं साथी निमशी एरू मट्ठू येहू नेबी सेइं लड़नेरे लेई निस्सो, तैसेरू अभिषेक यहोवा एल्हेरेलेइ कमेवरू थियूं कि तै अहाबेरे घरानेरो नाश केरे। 8 ज़ैखन येहू अहाबेरे घराने सज़ाह देइ राहोरो थियो, तैखन तैस यहूदारे हाकिम ते अहज्याहेरो भतरियो ज़ै अहज्याहेरे सेवा केरनेबाले थियो, मैल्हे, ते तैनी तैना मारे। 9 तैखन तैनी अहज्याह तोप्पो। तै सामरिया नगरे मां छ़पोरो थियो, एल्हेरेलेइ लोकेईं तै ट्लाव ते येहू कां पुज़ेइतां तै मारो। तैखन एन ज़ोइतां तै दब्बो जेव, "इन यहोशापातेरू पोट्लड़ूए, ज़ै अपने पूरे मने सेइं यहोवारी तलाश केरतो थियो।" ते अहज्याहेरे घराने मां राज़ केरनेरे काबल कोई न राव।

10 ज़ैखन अहज्याह राज़ेरी अम्मा अतल्याह हेरू कि तैसारू मट्ठू मेरि जेवं, तैखन तैसां उठतां यहूदारे घरानेरे सारे राज़ेरे वंशेरो नाश कियो। 11 पन यहोशावत ज़ै राज़ेरी कुई थी, तैसां अहज्याहेरू मट्ठू योआश मारे गानेबाले राज़ेरां मट्ठां केरे मझ़ाटेरां च़ोरतां तैस कौन्शी समेत ज़ै तैसेरी देखभाल केरती थी बिछ़ानां रखनेरे कमरे मां छ़ुपाव। एन्च़रां सेइं यहोराम राज़ेरी कुई यहोशावत ज़ै यहोयादा याजकेरी कौन्श ते अहज्याहेरी बेइन थी, तैसां योआश अतल्याह करां एन्च़रे छ़ुपेइतां रख्खो कि तै तैस न मैरी बटी। 12 योआश तैस कां परमेशरेरे भवने मां शा साल छ़पोरो राव, ज़ेत्रे च़िरे तगर अतल्याह मुल्खे पुड़ राज़ केरती राई तैन छ़ुपेइतां रख्खू।