1 यहूदा प्रदेशेरे लोकेईं योशिय्याह राज़ेरू मट्ठू तैसेरे मरनेरां बाद यहोआहाज नेइतां तैसेरे बाजी केरे जगाई पुड़ यरूशलेमे मां राज़ो बनाव। 2 ज़ैखन यहोआहाज यहूदारो राज़ो बनो, तैखन तैसेरी उमर 23 साल थी, ते तैनी ट्लाई महीने यरूशलेम नगरे मां राज़ कियूं। 3 तैखन मिस्र मुल्खेरे नको राज़े तै यरूशलेमे मां राज़ेरे तखते पुड़ेरां उसालो, ते यहूदा प्रदेशे पुड़ लगभग 3400 किल्‍लो चाँदी ते 34 किल्‍लो सोन्नू जुर्मानो लावं। 4 तैखन मिस्रेरे राज़े यहोआहाजेरो ढ्ला एलयाकीम यहूदारो ते यरूशलेमेरो राज़ो बनाव ते तैसेरू नवं बेदलतां यहोयाकीम रख्खू। पन नकोए तैसेरो ढ्ला यहोआहाज मिस्रे जो नियो।

5 ज़ैखन यहोयाकीम राज़ केरने लगो, तैखन तैसेरी उमर 25 साल थी, ते 11 साल तैनी यरूशलेम नगरे मां राज़ कियूं। तैनी तैन कम कियूं, ज़ैन तैसेरे परमेशर यहोवारी नज़री मां बुरू थियूं। 6 ज़ैखन तैस पुड़ बाबेलेरे राज़े नबूकदनेस्सरे हमलो कियो, ते बाबेले जो नेनेरे लेई तैस पितलरी बेड़ी लुवेई। 7 फिरी नबूकदनेस्सरे यहोवारे भवनेरां किछ भांडां बाबेले जो नियां, ते तैना अपने मन्दरे मां ज़ैन बाबेले मां थियूं रखां। 8 यहोयाकीमेरां तैना सारां कम्मां तैनी ज़ैना-ज़ैना भिट्टां कम्मां कियोरां थियां, ते तैस मां ज़ैना-ज़ैना बुरैई मैल्ही, तैना इस्राएलेरे ते यहूदारे राज़ां केरे इतिहासेरी किताबी मां लिखोरिन। ते तैसेरू मट्ठू यहोयाकीन तैसेरे जगाई पुड़ राज़ केरने लगो।

9 ज़ैस वक्त यहोयाकीन राज़ो बनो, तैस वक्त तैसेरी उमर 18 साल* थी, ते तैनी ट्लाई महीने ते दश दिहाड़े यरूशलेमे मां राज़ कियूं। तैनी तैन कम कियूं, ज़ैन परमेशर यहोवारी नज़री मां बुरू थियूं। 10 नंव्वो साल लगते नबूकदनेस्सर राज़े लोकन भेज़तां, तैस ते यहोवारे भवनेरां मन पसंद भांडां बाबेल नगरे मांजो मगां, ते तैसेरो ढ्ला सिदकिय्याह यहूदा ते यरूशलेमे पुड़ राज़ो बनाव।

11 ज़ैखन सिदकिय्याह राज़ केरने लगो, तैखन तैसेरी उमर 21 साल थी, ते तैनी यरूशलेमे मां 11 साल राज़ कियूं। 12 तैनी तैन कियूं, ज़ैन तैसेरे परमेशर यहोवारी नज़री मां बुरू थियूं। चाए यिर्मयाह नबी यहोवारी तरफां गल्‍लां केरतो थियो, फिरी भी तै तैसेरे सामने दीन न भोव। 13 फिरी नबूकदनेस्सरे ज़ैनी तैस परमेशरेरी कसम दित्तोरी थी, तैसेरी तैनी बगावत की, ते तैनी ज़िद की ते अपनो मन सखत कियो, कि तै इस्राएलेरे परमेशर यहोवारे पासे न फिरे।

14 यहूदा प्रदेशेरे सारे प्रधान याजकेईं ते लोकेईं भी ते गैर कौमां केरां ज़ेरां भिट्टां कम्मां केरतां बड़ो धोखो कियो, ते यहोवारो भवन ज़ै तैनी यरूशलेमे मां पवित्र कियोरो थियो, अशुद्ध कियो।

15 तैन केरे पूर्वजां केरे परमेशर यहोवा अपने दूत भेज़तां तैन खबरदार केरतो थियो, किजोकि तै अपने प्रजारे लोकन ते अपने भवने पुड़ तरस खातो थियो। 16 पन तैना परमेशरेरे भेज़ोरे दूतां केरो मज़ाक बनाते थिये, तैसेरे वचन घटिया समझ़ते थिये, ते तैसेरे नेबी केरि हासी बनाते थिये। यहोवा अपने लोकन पुड़ एरहो नाराज़ भोव, कि बच़नेरो कोई तरीको न राव।✝

17 तैखन तैनी तैन पुड़ कसदी लोकां केरे राज़े करां तैन पुड़ चढ़ाई कराई, ते तैनेईं तैन केरे जुवान तैन केरे पवित्र भवने मां तलवारी सेइं मारे। ते कुन जुवान, कुन कुवैरी कुइयां, कुन बुढे, कुन छ़ित्ते दोग्गे बाले, कोन्ची पुड़ भी दया न की। यहोवाए सभे तैसेरे हथ्थे मां किये। 18 कुन निकड़े, कुन बड्डे, परमेशरेरे भवनेरां सारां भांडां ते यहोवारो भवन, ते राज़ो, ते तैसेरे हाकिमां केरे खज़ाने, इन सब तैनेईं बाबेले जो नियूं। 19 कसदी लोकेईं परमेशरेरो भवन फुक्‍को, ते यरूशलेमेरी शहरपनाह ट्लोड़ी छ़डी, ते अग लेइतां तैसेरे सारे भवन फुक्‍के, ज़ैन कीमती सामान तैस मां थियूं तैन नाश कियूं। 20 ज़ैना तलवारी करां बेंच़ी जेवरे थिये, तैनी तैना बाबेले जो ने, ते फारसेरे राज़ेरो कब्ज़ो भोने तगर तै तैसेरे ते तैसेरे मट्ठां पोट्लड़ां केरे गुलाम राए। 21 इन सब एल्हेरेलेइ भोवं कि यहोवारू ज़ैन वचन यिर्मयाह नेबेरे ज़िरिये ज़ोवं जेवरू थियूं, तैन पूरू भोए, कि मुल्ख अपने आरामेरे वक्ते मां सुख भोगतो राए। एल्हेरेलेइ ज़ांतगर तैन उज़ड़ोरू रालू तैखन तगर मतलब 70 साल पूरे भोने तगर तैस आराम मैल्हो।

22 फारस मुल्खेरे कुस्रू राज़ेरे हुकूमतरे पेइले साले मां यहोवा तैसेरो मन उभारो कि ज़ै नबूवत यिर्मयाह नेबे कियोरी थी, तै पूरी भोए। एल्हेरेलेइ तैनी अपने सारे रियासती मां ई प्रचार कराव, ते इस बारे मां चिट्ठी लिखेई: 23 "फारस मुल्खेरो राज़ो कुस्रू इन ज़ोते, ‘सुर्गेरे परमेशरे यहोवाए सैरी दुनियारू राज़ मीं दित्तोरूए, ते तैनी मीं हुक्म दित्तोरोए कि यरूशलेम ज़ैन यहूदा प्रदेशे मांए तैस मां मेरो अक भवन बनावा। एल्हेरेलेइ हे तैसेरे लोकव, तुसन मरां ज़ै कोई चाहे, तैसेरो परमेशर यहोवा तैस सेइं साथी राए, तै तरहां रुवाना भोइ गाए।’"