1 फारस मुल्खेरे कुस्रू राज़ेरे हुकूमतरे पेइले साले मां यहोवा तैसेरो मन उभारो कि ज़ै नबूवत यिर्मयाह नेबे कियोरी थी, तै पूरी भोए, एल्हेरेलेइ तैनी अपने सारे रियासती मां इस बारे मां एलान कराव ते इन लिखतां भी दित्तू:

2 "फारस मुल्खेरो राज़ो कुस्रू इन ज़ोते: सुर्गेरे परमेशरे यहोवाए सैरी दुनियारू राज़ मीं दित्तोरूए, ते तैनी मीं हुक्म दित्तोरोए, कि यहूदा प्रदेशेरे यरूशलेम नगरे मां मेरो अक भवन बनावा। 3 अवं प्राथना केरताईं, तैसेरे सारे लोकन मरां तुश्शे दरमियाने मां ज़ै कोई भोए, तैसेरो परमेशर तैस सेइं साथी राए, ते तै यहूदा प्रदेशेरे यरूशलेम नगरे मां गेइतां इस्राएलेरे परमेशर यहोवारो भवन बनाए ज़ेसेरी आराधना यरूशलेम नगरे मां की गातीए तैए परमेशरे। 4 ते ज़ै कोई यहूदी कोन्ची जगाई पुड़ गुलैमी मां रेई जेवरो भोए, ज़ैड़ी तै रहतो भोए, तैस जगारे मैन्हु, सोन्नू, चाँदी, धन ते जानबर देइतां तैसेरी मद्दत केरन ते इसेरे अलावा यरूशलेम नगरेरे परमेशरेरे भवनेरी मरम्मत केरनेरे लेई अपने-अपने मेर्ज़ी सेइं भेंट च़ाढ़न।"

5 तैखन यहूदा ते बिन्यामीन गोट्लां केरे पूर्वजां केरे घरानेरे ज़ेत्रे प्रधान मड़द ते याजक ते लेवी केरो मन यहोवा परमेशरे उभारोरो थियो कि गेइतां यरूशलेम नगरे मां यहोवारे भवनेरी मरम्मत केरन, तैना सब भवन बनानेरे लेई तियार भोए। 6 तैखन तैन केरे आसे-पासे रानेबाले सारे लोकेईं ज़ैना गुलैमी मरां वापस एवरे थिये तैन चैंदरां भांडां, सोन्नू, धन ते जानबर ते कीमती चीज़ां देइतां, तैन केरि मद्दत की। एन तैस करां जादे थियूं, ज़ैन लोकेईं एपनी-एपनी मेर्ज़ी सेइं दित्तोरू थियूं। 7 फिरी यहोवारे भवनेरां ज़ैना भांडां बाबेलेरे राज़े नबूकदनेस्सर यरूशलेम नगरे मरां केढतां अपने देबतेरे मन्दरे मां रख्खोरां थियां,✝ 8 तैना कुस्रू राज़े, मिथ्रदात खज़ानची करां कढेइतां यहूदी लोकां केरे शेशबस्सर नंव्वेरे प्रधाने कां गेनतां सौंफी दित्तां। 9 तैन केरि गिनती ई थी, सोन्नेरी 30 पातरां ते चैंदरी 1000 पातरां ते चैंदरे 29 चैकू, 10 सोन्नेरे 30 कुटोरे ते दरमियाना किसमेरे चैंदरे 410 कुटोरे ते बाकी किसमेरां 1000 भांडां। 11 सोन्ने चैंदरां सारां भांडां कुल मिलेइतां 5400 थियां। एना सब शेशबस्सर प्रधाने तैस मौके आनां ज़ैखन तैना बाबेलेरी गुलैमी मरां वापस यरूशलेम नगरे जो आए।