एज्रा यरूशलेम नगरे जो भेज़ो गानो
1 एन गल्लां केरे बाद मतलब फारसेरे राज़े अर्तक्षत्रेरे राज़ केरनेरे दिहाड़न मां, एज्रा बाबेले मरां यरूशलेम नगरे जो जेव। तैसेरो बाजी सरायाह थियो। सरायाहेरो बाजी अजर्याह थियो, अजर्याहेरो बाजी हिल्किय्याह थियो, 2 हिल्किय्याहेरो बाजी शल्लूम थियो, शल्लूमेरो बाजी सादोक थियो, सादोकेरो बाजी अहीतूब थियो, अहीतूबेरो बाजी अमर्याह थियो, अमर्याहेरो बाजी अजर्याह थियो, 3 अजर्याहेरो बाजी मरायोत थियो 4 मरायोतेरो बाजी जरहयाह थियो, जरहयाहेरो बाजी उज्जी थियो, उज्जी एरो बाजी बुक्की थियो, 5 बुक्की एरो बाजी अबीशू थियो, अबीशू एरो बाजी पीनहास थियो, पीनहासेरो बाजी एलीआजर थियो, एलीआजरेरो बाजी महायाजक हारून थियो। 6 ईए एज्रा मूसेरे कानूनेरे बारे मां ज़ै इस्राएलेरे परमेशर यहोवाए दित्तोरो थियो, बड़ो माहिर शास्त्री थियो। तैसेरे परमेशर यहोवारी सिद्धी नज़र तैस पुड़ राई, एल्हेरेलेइ राज़े तैसेरे मेर्ज़रे मुताबिक कियूं।
7 किछ इस्राएली लोक, ते याजक ते लेवी ते गीतां ज़ोनेबाले ते संत्री ते भवनेरे सेवकन मरां किछ लोक अर्तक्षत्र राज़ेरे हुकूमतरे सत्तोवं साले मां यरूशलेम नगरे जो जे। 8 एज्रा राज़ेरे सत्तोवं सालेरे पंच़ोंव महीने मां यरूशलेम नगरे मां पुज़्ज़ो। 9 सालेरे पेइले महीनेरे पेइले दिहाड़े एज्रा बाबेले मरां च़लोरो थियो, ते तैसेरे परमेशरेरी सिद्धी नज़र तैस पुड़ राई, एल्हेरेलेइ तै पंच़ोंव महीनेरे पेइले दिहाड़े यरूशलेम नगरे मां पुज़्ज़ो। 10 किजोकि एज्रा यहोवारे कानूनेरो मतलब समझ़ने, ते तैसेरे मुताबिक च़लने, ते इस्राएले मां विधि ते नियम शिखालनेरे लेई अपनो मन लेवरो थियो। 11 ज़ै चिट्ठी अर्तक्षत्र राज़े एज्रा याजक ते शास्त्री जो दित्तोरी थी, ज़ै यहोवारे हुक्मां केरे वचना केरो, ते तैसेरी इस्राएलन मां च़लेवरी विधि केरो शास्त्री थियो, तैसेरी ई नकले; 12 "एज्रा याजकेरे नंव्वे ज़ै सुर्गेरे परमेशरेरे कानूनेरो माहिर शास्त्री थियो, अर्तक्षत्र महाराज़ेरी तरफां। 13 अवं ऐह हुक्म देताईं, कि मेरे राज़े मां ज़ेत्रे इस्राएली ते याजक ते लेवी एपनी मेर्ज़ी सेइं यरूशलेम नगरे मां गानू चातन, तैना तीं सेइं साथी गान।
14 "तू त राज़े ते तैसेरे सत्ते मेंत्री केरि तरफां एल्हेरेलेइ भेज़ो गातस, कि अपने परमेशरेरे कानूनेरे बारे मां ज़ै तीं कांए, यहूदा प्रदेश ते यरूशलेम नगरेरी हालत ज़ानस, 15 ते ज़ैन सोन्नू-चाँदी, राज़े ते तैसेरे मंत्री लोकेईं इस्राएलेरे परमेशरे ज़ेसेरो भवन यरूशलेम नगरे मांए, अपनि इच्छा सेइं दित्तोरूए। 16 ते ज़ेत्रू सोन्नू-चाँदी बाबेलेरे सारे सूबन मरां तीं मैल्हे, ते ज़ैन किछ लोक ते याजक अपने मेर्ज़ी सेइं अपने परमेशरेरे भवनेरे लेई ज़ै यरूशलेम नगरे मांए देले, तैस ने। 17 एल्हेरेलेइ तू तैन रुपेइयन सेइं जल्दी दांत, हुड़ ते गबड़ां ते तैसेरे मुताबिक अन्नबलि ते पीनेरी च़ढ़तलरी चीज़न समेत घिन्ना ते तैस वेदी पुड़ च़ैढ़ां, ज़ै तुश्शे परमेशरेरे यरूशलेम नगरेरे भवने मांए। 18 ते ज़ैन सोन्नू-चाँदी बेंच़ी गाए, तैस मरां ज़ैन किछ तीं तेरे सैथन ठीक लग्गे, तैन्ने अपने परमेशरेरे मुताबिक केरनू। 19 तेरे परमेशरे भवनेरी सेवारे लेई ज़ैना भांडां तीं सौंफां गातन, तैना यरूशलेम नगरेरे परमेशरेरे सामने रेखी देइयां। 20 इसेरे अलावा ज़ैन किछ तीं अपने परमेशरे भवनेरे लेई लगतू भोए, तैन राज़ेरे खज़ाने मरां देइयां।
21 "अवं अर्तक्षत्र राज़ो ऐह हुक्म देताईं, कि तुस बड्डे दरियाए पार सेभी खज़ानची लोकन करां ज़ैन किछ एज्रा याजक, ज़ै सुर्गेरे परमेशरेरे कानूनेरो शास्त्री आहे तुसन लोकन सेइं जल्दी कियूं गाए। 22 मतलब, 3500 किल्लो चाँदी, 10000 किल्लो गेहुं, ते 2000 लीटर दाछ़रो रस, ते 2000 लीटर तेल ते लून ज़ेत्रू लग्गे तेत्रू दित्तू गाए। 23 ज़ै-ज़ै हुक्म सुर्गेरे परमेशरेरी तरफां मैल्हे, ठीक तैसेरे मुताबिक सुर्गेरे परमेशरेरे भवनेरे लेई कियूं गाए, राज़े ते राज़ेरे मट्ठां केरे रियासतन पुड़ परमेशरेरो क्रोध किजो भड़के। 24 फिरी अस तुसन इन ज़ोतम, कि परमेशरेरे तैस भवनेरे कोन्ची याजके, लेवी, गीतां ज़ोनेबाले, संत्री, भवनेरे सेवक या कोन्ची सेवके करां कर, चुंगी, ते कने राहदारी नेनेरो हुक्म नईं।
25 "फिरी हे एज्रा! तेरे परमेशरे करां मैल्होरी अक्लरे मुताबिक ज़ै तीं मांए, न्यायी ते विचार केरनेबाले च़ुन ज़ैना बड्डे दरियारे पार रानेबाले तैन सब लोकन मां ज़ैना तेरे परमेशरेरे कानूने ज़ानते भोन न्याय केरन; ते ज़ै-ज़ै तैन्न न ज़ानतो भोए, तैन्न तुस शिखाला। 26 ज़ै कोई तेरे परमेशरेरे कानूने ते राज़ेरे कानूने न मन्ने, तैस जल्दी सज़ाह दित्ती गाए, चाए मौतरी सज़ाह ते चाए मुल्खे मरां कढू गानू, चाए माल ज़पत केरनो, चाए कैदखाने मां छ़डू गानू।" 27 धने इश्शे पूर्वजां केरो परमेशर यहोवा, ज़ैनी एरी इच्छा राज़ेरे मने मां पैदा कियोरीए, कि यरूशलेम नगरे मां यहोवारे भवने सज़ान। 28 ते मीं पुड़ राज़ो ते तैसेरे मंत्री ते राज़ेरे सारे बड्डे हाकिम महरबान किये। मेरे यहोवारी सिद्धी नज़र मीं पुड़ भोइ, इसेरे मुताबिक मीं हिम्मत की, ते इस्राएले मरां खास मड़द अकोट्ठे किये, कि तैना मीं सेइं साथी च़लन।