1 ज़ैखन यहूदा ते बिन्यामीन गोट्लां केरे दुश्मनेईं शुनू कि बाबेलेरे गुलैमी मरां छुटतां लोक इस्राएलेरे परमेशर यहोवारे लेई भवन बनेई राहोरेन, 2 तैखन तैना जरुब्बाबेल ते पूर्वजां केरे घराना केरे प्रधान्न कां गेइतां तैन सेइं ज़ोने लगे, "असन भी एप्पु सेइं साथी भवन बनाने देथ। किजोकि तुश्शे ज़ेरे अस भी तुश्शे परमेशर यहोवारी तलाशी मां लगोरेम, ते अश्शूरेरे राज़े एसर्हद्दोने ज़ैनी असां इड़ी पुज़ावरेम, तैन दिहाड़न करां लेइतां अज़ तगर असां तैस्से जो बलि च़ाढ़ते राहोरेम।" 3 जरुब्बाबेल, येशुअ ते इस्राएलेरे पूर्वजां केरे घरानेरे प्रधान्न तैन सेइं ज़ोवं, "इश्शे परमेशरेरे लेई भवन बनानेरे कम्मे मां तुश्शू असन सेइं कोई कम नईं। अस लोक एप्पु मिलतां फारसेरे राज़े कुस्रूएरे हुक्मेरे मुताबिक इस्राएलेरे परमेशर यहोवारे लेई भवन बनामेले।"

4 तैखन तैस मुल्खेरे गैर इस्राएली लोक यहूदी लोकन उदास केरने ते तैन डरेइतां भवन बनाने मां रुकावट केरने लगे। 5 ते फारसेरे राज़े *कुस्रूएरे ज़िन्दगी भर फारसेरे राज़े दारा राज़ेरे वक्ते तगर भवनेरे कम्मे मां रुकावट पैदा केरनेरे लेई वकीलन रिश्पत देंते राए। 6 क्षयर्ष राज़ेरे हुकूमतरे शुरुआती मां तैनेईं यहूदा प्रदेश ते यरूशलेम नगरेरे लोकां केरे खलाफ दोष लिखतां चिट्ठी भेज़ी।

7 किछ वक्तेरां बाद अर्तक्षत्र फारसेरे राज़ेरे राज़ केरनेरे दिहाड़न मां बिशलाम, मिथ्रदात, ते ताबेले ते तैन केरे साथी लोकेईं फारसेरे राज़े अर्तक्षत्र जो चिट्ठी लिखतां भेज़ी, ते चिट्ठी अरामी लफज़न मां ते अरामी भाषाई मां लिखोरी थी। 8 मतलब रहूम राज मंत्री ते शिमशै मंत्री तैनेईं यरूशलेम नगरेरे खलाफ अर्तक्षत्र राज़े जो इस बारे मां चिट्ठी लिखी। 9 तैस मौके रहूम राज मंत्री ते शिमशै मंत्री ते तैन केरे सैथेईं मतलब दीनी, अपर्सतकी, तर्पली, अफ़ारसी, एरेकी, बाबेली, शूशनी, देहवी, एलामी लोकेईं, 10 ते बाकी कौमेईं ज़ैना महान ते प्रधान ओस्‍नप्परे पार एन्हतां सामरिया नगरे मां ते फरात दरियारे इस पासेरे बाकी मुल्खे मां बसेवरी थी, अक चिट्ठी लिखी। 11 ज़ै चिट्ठी तैनेईं अर्तक्षत्र राज़े जो लिखी तैसारी ई नकले, "अर्तक्षत्र राज़ेरी सेवाई मां तेरे दास ज़ैना फरात दरियाए पार रहतन सुखसांध भेज़तन। 12 अर्तक्षत्र राज़े इस गल्‍लरे बारे मां पतो भोए कि ज़ैना यहूदी तीं करां पार च़ले एवरेन तैना असन कां यरूशलेम नगरे मां पुज़ोरेन। तैना त तैस बागी ते दुष्ट नगरे फिरी बसाने लगोरेन। बल्के तैसेरी मुनीयादां केढोरिन ते शहरपनाह खड़ी केरने लगोरेन। 13 हुनी राज़े इस गल्‍लरे बारे मां पतो भोए कि तैन नगर आबाद भोल्हु ते तैसेरी शहरपनाह खड़ी भोइ गाली, त तैना लोक चुंगी, राहदारी फिरी न देले, ते आखरी मां राज़ां केरो नुकसान भोल्हो। 14 ते असां लोक त राज़ेरू लून खातम ते एन ठीक नईं कि इश्शे राज़ेरी बेइज़्ज़ती इश्शे हेरते भोए, एल्हेरेलेइ असां ई चिट्ठी लिखतां राज़े सेइं ज़ोतम। 15 तेरे पूर्वजां केरे इतिहासेरी किताबी मां तोप्पु गाए; तैखन तीं पतो लग्गेलो कि इन नगर बगावत केरनेबालू ते राज़ां केरू ते सूबां केरू नुकसान केरनेबालू आहे, ते पुराने ज़माने करां तैस मां बगावत च़लती एवरीए। एल्हेरेलेइ तैन नगर नष्ट भी कियोरू थियूं। 16 असां राज़े निश्चो करेई देतम कि अगर यरूशलेम नगर बसाव गाए ते तैसेरी शहरपनाह बेनि गाए, तैखन इस वजाई सेइं फरात दरियारे इस पासे तेरो कोई हिस्सो न रेई गाए।"

17 तैखन राज़े रहूम राज मंत्री ते शिमशै मंत्री ते सामरिया ते फरात दरियाए इस पासे रानेबाले ते तैन केरे बाकी साथी लोकन कां ई जुवाब भेज़ो, "सुख भोए! 18 ज़ै चिट्ठी तुसेईं मीं कां भेज़ी तै मेरे सामने पेढ़तां साफ-साफ शुनाई जेई। 19 ते मेरे हुक्मे सेइं तोप्पे गाने सेइं पतो लग्गो, कि तैन नगर पुराने ज़माने करां राज़ां केरे खलाफ बगावत केरतू एवरूए ते तैस मां दंगे ते फसाद भोते एवरेन। 20 यरूशलेम नगरे मां सामर्थी राज़ेईं राज़ कियूं ज़ैना फरात दरियाए पार सारे मुल्खे पुड़ राज़ केरते थिये, ते चुंगी ते कर ते राहदारी तैन दित्ती गाती थी। 21 एल्हेरेलेइ हुनी इस हुक्मेरो प्रचार केर कि तैना लोक रोके गान ते ज़ांतगर मेरी तरफां हुक्म न मैल्हे, तांतगर तैन नगर दुबारां न बनान। 22 ते खबरदार राथ, एस गल्‍ली मां ढिल्‍ले न रेइयथ; राज़ां केरो नुकसान केरनेबाली तै बुराई बधाई न गाए?"

23 ज़ैखन अर्तक्षत्र राज़ेरी ऐह चिट्ठी रहूम ते शिमशै मंत्री ते तैन केरे साथी लोकन पेढ़तां शुनाई जेई, तैखन तैनेईं लूश केरतां यरूशलेम नगरेरे यहूदी लोकन कां गेइतां ज़बरदस्ती तैना रोके। 24 तैखन परमेशरेरे भवनेरू कम रुकी जेवं, ज़ैन यरूशलेम नगरे मांए। ते फारसेरे दारा राज़ेरे राज़ केरनेरे दूइयोवं साले तगर रुकोरू रावं।