एज्रा 5

यहोवारो भवन बनानेरू कम जारी

1 तैखन हाग्गै नबी ते इद्दोएरू पोट्लड़ू जकर्याह नेबे यहूदा प्रदेश ते यरूशलेम नगरेरे यहूदी लोकन सेइं इस्राएलेरे परमेशरेरे नंव्वे सेइं नबूवत की। 2 तैखन शालतीएलेरू मट्ठू जरुब्बाबेल ते योसादाकेरू मट्ठू येशुअ, कमर केस्तां परमेशरेरो भवन ज़ै यरूशलेम नगरे मांए बनाने लगे; ते परमेशरेरे तैना नबी साथ देते राए।

3 तैस मौके बड्डे दरियारे इस पासे तत्तनै नंव्वेरो हाकिम ते शतर्बोजनै अपने साथी लोकन समेत तैन कां गेइतां एन पुछ़ने लगे, "ई भवन बनानेरो हुक्म तुसन केनि दित्तो?" 4 तैनेईं लोकन सेइं एन भी ज़ोवं, "इस भवने बनानेबाले मैन्हु केरां कुन नंव्वां आन?" 5 पन यहूदी लोकां केरे बुज़ुर्गां केरे परमेशरेरी नज़र तैन पुड़ थी, एल्हेरेलेइ ज़ांतगर एस गल्‍लरी चर्चा दारा राज़े सेइं न कीजेई ते तैसेरी तैस चिट्ठरे बारे मां जुवाब न मैल्हो, तांतगर फारसेरे हाकिमेईं तैना भवनेरे कम्मे मां न रोके।

6 ज़ै चिट्ठी बड्डे दरियारे इस पासे तत्तनै हाकिम ते शतर्बोजनै ते बड्डे दरियारे इस पासेरे तैन केरे साथी फारसी लोकेईं दारा राज़े कां तैसेरी ई भेज़ोरी नकले; 7 तैनेईं तैस जो अक चिट्ठी लिखी, ज़ैस मां एन लिखोरू थियूं: दारा राज़े हर किसमे सेइं सुख भोए। 8 राज़े ई गल पतो लग्गे, कि असां लोक यहूदा प्रदेशे मां परमेशरेरे भवने कां जेवरे थिये, तै बड्डे-बड्डे घोड़न सेइं बेनि राहोरोए, ते तैसेरी दिवारन मां केड़ी ज़ुड़ने लेवरिन; ते एन कम तैन लोक बड़े जल्दी केरने लगोरेन, ते कामयाब भी भोने लगोरेन। 9 एल्हेरेलेइ असेईं तैन बुज़ुर्गन एन पुछ़ू, "ऐह भवन बनावाने, ते ऐह शहरपनाह खड़ी केरनेरो हुक्म तुसन केनि दित्तोरोए?" 10 ते असेईं तैन केरां नंव्वां भी पुछ़ा, कि असां तैन प्रधान मैन्हु केरां नंव्वां लिखतां तीं सेइं ज़ोई सखम। 11 तैनेईं असन ऐह जुवाब दित्तो, "असां त सुर्ग ते धेरतरे परमेशरेरे दासम, ते ज़ै भवन बड़े साल पेइले इस्राएली केरे एक्‍की राज़े*5:11 राज़े फारसी लोक न थी ज़ानते कि सुलैमान इस्राएलेरो राज़ोए, एल्हेरेलेइ तैनेईं सिर्फ राज़ो लिखू। बनेइतां तियार कियोरो थियो, तैए अस दुबारां बनाने लगोरेम। 12 ज़ैखन इश्शे दादे-पड़दादेईं सुर्गेरो परमेशर सरकावरो थियो, तैखन तैनी तैना बाबेलेरे कसदी राज़े नबूकदनेस्सरे हथ्थे मां कियोरे थिये, ते तैनी ई भवन नाश कियो ते लोक गुलाम बनेइतां बाबेले जो ने। 13 पन बाबेलेरे कुस्रू राज़ेरे पेइले साले मां कुस्रू राज़े परमेशरेरो ई भवन बनानेरो हुक्म दित्तोरो थियो। 14 परमेशरेरे भवनेरां ज़ैना सोन्ने चैंदरां भांडां नबूकदनेस्सरे यरूशलेमेरे परमेशरेरे भवने मरां केढतां बाबेलेरे मन्दरे मां रख्खोरां थियां, तैना कुस्रू राज़े बाबेलेरे मन्दरे मरां केढतां शेशबस्सर नंव्वेरे मैन्हु ज़ै तैनी हाकिम ठहरेवरो थियो, तैसेरे हथ्थे सौंफी दित्तां। 15 कुस्रू राज़े शेशबस्सरे सेइं ज़ोवं, ‘एना भांडां नेइतां यरूशलेमेरे भवने मां रख, ते परमेशरेरो भवन एपनी जगाई पुड़ बनाव गाए।’ 16 तैखन तैन्नी शेशबस्सरे एइतां परमेशरेरो भवन ज़ै यरूशलेम नगरे मांए तैसेरी मुनीयाद रख्खी; ते तैखन करां हुन्ना तगर ई भवन बन्ने लगोरोए, पन हेजू तगर नईं बनोरो। 17 ते अगर राज़े रोड़ू लग्गे त बाबेलेरे राज़ेरे भण्डारे मां ई गल तोप्पी गाए, कि राज़े कुस्रूए सच़्च़े परमेशरेरो भवन ज़ै यरूशलेम नगरे मांए बनानेरो हुक्म दित्तोरो थियो, कि नईं। तैखन राज़ो एस बारे मां अपनि इच्छा असन सेइं ज़ोए।"