1 ज़ैखन एन्ना कम्मां पूरां भोआं, तैखन किछ हाकिम मीं कां एइतां ज़ोने लगे, "न त इस्राएली लोक न याजक, ते न लेवी इस मुल्खेरे लोकन करां अलग भोए; बल्के कनानी, हित्ती, परिज्जी, यबूसी, अम्मोनी, मोआबी, मिस्री ते एमोरी लोकां केरां ज़ेरां भिट्टां कम्मां केरतन। 2 किजोकि तैनेईं तैन केरि कुइयां अपने लेई ते अपने मट्ठां केरे लेई कौन्शां बनेई; ते पवित्र खानदान इस पासेरे मुल्खेरे लोकन मां मिली जेवरूए। बल्के हाकिम ते प्रधानां केरो हथ इस बुराई मां सेभन करां जादे।" 3 ऐह गल शुन्तां मीं दुखेरे मारे अपना लिगड़ां ते चोगो छ़िन्दो, ते अपने दोग्गेरे बाल ते दाढ़ी पुट्टी, ते परेशान भोइतां बिशोरो राव।✝ 4 तैखन ज़ेत्रे लोक इस्राएलेरे परमेशरेरे वचन शुन्तां बाबेलेरी गुलैमी मरां वापस एवरे लोकां धोखेबैज़रे वजाई सेइं थरकते थिये, सब लोक मीं कां अकोट्ठे भोए, ते अवं ड्लवझ़ी बलिदान केरनेरे वक्ते तगर परेशान राव। 5 पन ड्लवझ़ी बलिदान केरनेरे मौके अवं लिगड़ां ते चोगो छ़िन्दोरो बरतेरे हालती मां उठ्ठो, फिरी ज़ैंधू केरे भारे झुको, ते अपने हथ यहोवा परमेशरेरे पासे फैलेइतां प्राथना की:

6 हे मेरे परमेशर! मीं अपनु तुत्तर तेरे पासे फिराते शर्म एइतीए, ते हे मेरे परमेशर! मेरू तुत्तर कालू आहे; किजोकि इश्शे लोकां केरां अधर्मेरां कम्मां इश्शे दोग्गे पुड़ च़ैढ़ी जेवरन, ते इश्शो पाप बद्धते-बद्धते अम्बरे तगर पुज़ोरोए।✝ 7 अपने पूर्वजां केरे दिहाड़न करां लेइतां अज़्ज़ेरे दिहाड़े तगर असां पापी अहम, ते अपने अधर्मेरे कम्मेरे वजाई सेइं असां अपने राज़े ते याजकन समेत मुल्खां-मुल्खां केरे राज़ां केरे हथ्थे मां कियोरेम कि तलवार, गुलामी, ते लुट्टे गाने मां ते कालू तुत्तर भोनेरी मुसीबती मां पेवरेम, ज़ेन्च़रे अज़ इश्शी ई हालते। 8 हुनी थोड़े दिहाड़न करां इश्शे परमेशर यहोवारो अनुग्रह असन पुड़ भोवरोए, कि असन मरां कोई-कोई बेंच़ी गाए, ते असन तैसेरे पवित्र ठारी मां अक खीलो मैल्हे, ते इश्शो परमेशर इश्शी एछ़्छ़न लौ बखशे, ते गुलैमी मां असन आराम मैल्हे। 9 असां गुलाम त अहम, पन असां इश्शे परमेशरे गुलैमी मां नईं छ़डोरे, बल्के फारसेरे राज़े असन पुड़ एत्रे महरबान किये, कि असन नंव्वी ज़िन्दगी देइतां अपने परमेशरेरो भवन बनाम, ते तैसेरी मरम्मत केरने लगे, ते असन यहूदा ते यरूशलेमे मां आड़ मैल्ही।

10 "हुनी हे इश्शे परमेशर! इसेरां बाद असां कुन ज़ोम, इन्ने कि तेरे तैन हुक्म ट्लोड़ोरेन,✝ 11 ज़ैना तीं एन ज़ोइतां अपने दास नेबी केरे ज़िरिये दित्तोरे थिये, ‘ज़ैस मुल्खेरे अधिकारी भोनेरे लेई तुस गाने बालेथ, तै त मुल्खे-मुल्खेरे लोकां केरि अशुद्धतारे वजाई सेइं ते तैन केरे भिट्टे कम्मां केरे वजाई सेइं अशुद्ध मुल्खे, तैनेईं एक्‍की पासेरां होरि पासे तगर अपने अशुद्धता सेइं भरोरोए। 12 एल्हेरेलेइ हुनी न त एपनी कुइयां तैन केरे मट्ठन जो ते न तैन केरि कुइयां अपने मट्ठन जो ड्लेइयथ, ते न कधी तैन केरू सुख चानू, एल्हेरेलेइ तुसां मज़बूत बना, ते तुस तैस मुल्खेरी रोड़ी-रोड़ी चीज़ां खेइ बटथ, ते तैस अपने खानदानेरे लेई छ़डा कि तै हमेशा तैन केरे अधिकारे मां भोए।’ 13 इन सब भोनेरां बाद ज़ै इश्शे बुरे कम्मां ते बड़े दोषेरे वजाई सेइं असन पुड़ बीतोरोए, कि हे इश्शे परमेशर तीं इश्शे अधर्मेरी ज़ेरि असन सज़ाह न दित्ती, बल्के असन मरां किछ बच़ेइतां रखोरेन, 14 त असां कुन तेरे हुक्म फिरी ट्लोड़म, ते भिट्टां कम्मां केरनेबाले लोकन सेइं रिश्तो रखम? त कुन तू असन पुड़ एत्रो क्रोध न केरेलो, ज़ैस सेइं असां नाश भोम ते न त कोई बच़े, ते न कोई राए? 15 हे इस्राएलेरे परमेशर यहोवा! तू धर्मीस, अस बेच़तां आज़ाद भोवरेम ज़ेन्च़रे कि अज़्ज़े। हेर, अस तेरे सामने दोषी अहम, इस वजाई सेइं कोई तेरे सामने खड़ो न रेई सके।"