1 तैखन सुलैमान राज़े प्राथना की,

"यहोवा ज़ोवरू थियूं, कि अवं घनी बिदलारी मां बास केरेलो।

2 पन मीं तेरे लेई अक रानेरी ठार बल्के भवन बनेवरोए, ज़ैस मां तू हमेशा-हमेशा रास।"✝

3 तैखन राज़े इस्राएली लोकां पासे तुत्तर फिरेइतां आशिर्वाद दित्तो। ते सारे लोक खड़े राए। 4 ते तैनी ज़ोवं, "इस्राएलेरे परमेशर यहोवारी तारीफ़ भोए, ज़ैनी अपने ज़बानी सेइं मेरे बाजी दाऊदे सेइं ई वाधो कियोरो थियो, ते तैनी अपनो कियोरो वाधो पूरो कियो। ✝

5 "‘ज़ैस दिहाड़े करां मीं अपने लोक मिस्र मुल्खे मरां केढतां आनोरेन, तैखन करां मीं न त इस्राएलेरे कोन्ची गोट्लेरू कोई नगर च़ुनू ज़ैस मां मेरे रानेरे लेई भवन बनाव गाए, ते न कोई मैन्हु च़ुनो कि तै मेरे इस्राएलेरे प्रधान भोए। 6 पन मीं यरूशलेम नगर एल्हेरेलेइ च़ुनू, कि मेरू नवं तैड़ी भोए, ते दाऊद च़ुनो कि तै मेरे लोकन पुड़ इस्राएलेरो प्रधान भोए।’ 7 मेरे बाजी दाऊदेरी ई मर्ज़ी थी कि इस्राएलेरे परमेशर यहोवारे लेई अक भवन बनवाए। 8 पन यहोवा मेरे बाजी दाऊदे सेइं ज़ोवं, ‘तेरी ज़ै इच्छा थी कि यहोवारे लेई अक भवन बनेइं, एरी इच्छाई केरतां तीं भलू त कियूं; 9 पन फिरी भी तू तैस भवने बनेई न बटेलो। तेरू ज़ैन अपनु मट्ठू भोल्हु, तैन्ने मेरो भवन बनालू।’ 10 ई वाधो ज़ै यहोवा कियोरो थियो, तै तैनी पूरो भी कियोरोए। ते अवं अपने बाजी दाऊदेरे जगाई पुड़ खड़ो भोइतां यहोवारे वाधेरे मुताबिक इस्राएलेरे तखते पुड़ बिशोरोईं, ते इस्राएलेरे परमेशर यहोवारे लेई ई भवन बनेवरोए। 11 एसमां मीं तै सन्दूख रख्खो, ज़ैस मां यहोवारो तै करारे, ज़ै तैनी इस्राएले सेइं कियोरो थियो।"

12 तैखन सुलैमान राज़ो सारे इस्राएली केरे हेरते यहोवारी वेदी कां सामने खड़ो भोव ते अपने हथ फैलाए। 13 सुलैमाने पंच़ हथ लम्मी, पंच़ हथ बिल्‍ली ते सड़े ट्लाई हथ उच्‍ची पितलरी अक चौवकी बनेइतां अंगनेरे मझ़ाटे रखावरी थी। तैस्से पुड़ खड़े भोइतां तैनी सारे इस्राएली लोकां केरे सामने ज़ैन्धु टेकतां सुर्गेरे पासे हथ फैलेइतां ई प्राथना की, 14 "हे यहोवा, हे इस्राएलेरे परमेशर, तेरो ज़ेरो न त सुर्गे मां ते न धेरती पुड़ कोई परमेशरे: तेरे ज़ैना दास अपने पूरे मने सेइं तेरे सामने च़लतन, तैन केरे लेई तू अपनो करार पूरो केरतस ते दया केरतो रहतस। 15 तीं ज़ै वाधो मेरे बाजी दाऊदे सेइं कियोरो थियो, तै तीं अज़ पूरो कियो। ज़ेन्च़रे तीं ज़ोवरू थियूं, तेन्च़रे तीं इश्शे सामने पूरू भी कियूं। 16 एल्हेरेलेइ हुनी हे इस्राएलेरे परमेशर यहोवा, ई वाधो भी पूरो केर, ज़ै तीं अपने दास मेरे बाजी दाऊदे सेइं कियोरो थियो, ‘तेरे खानदाने मां मेरे सामने इस्राएलेरे तखते पुड़ बिशने बालां केरि कमी न भोल्ही, सिर्फ इन भोए कि ज़ेन्च़रे तू अपने आपे मेरे सामने ज़ैनतां च़लतो राहोरोस, तेन्च़रे तेरे खानदानेरे लोक अपनि चाल च़लने मां एरी एहतियात केरन, कि मेरे कानूने पुड़ च़लन।’ 17 हुनी हे इस्राएलेरे परमेशर यहोवा, ज़ै वाधो तीं अपने दास दाऊदे सेइं कियोरो थियो, तैस पूरो केर।

18 "पन कुन परमेशर तू सच़्च़े इन्सानन सेइं साथी धेरती पुड़ बास केरेलो? सुर्गे मां बल्के सेभन करां उच्‍चे सुर्गे मां भी तू न लेग्गी बटस, फिरी मेरे बनेवरे इस भवने मां तू केन्च़रे लेग्गी बटेलो? 19 पन फिरी भी हे मेरे परमेशर यहोवा, अपने दासेरी प्राथना ते बिनती केरे पासे ध्यान दे ते मेरी फरियाद ते ई प्राथना शुन, ज़ै अवं तेरे सामने केरि राहोरोईं। 20 तै ई आहे कि तू इस भवनेरे पासे तकतो रास, ज़ेसेरे बारे मां तीं ज़ोवं कि अवं तैस मां अपनु नवं रखेलो, ते ज़ै प्राथना तेरो दास इस ठारारे पासे केरेलो, तैस तू शुन। 21 ते अपने दास, ते अपने इस्राएली लोकां केरि प्राथना ज़ै तैना इस भवनेरे पासे छंदे केरतां केरन, तैस शुना; सुर्गे मरां ज़ैड़ी तू रहतस, शुना; ते शुन्तां तैन केरे पाप माफ़ केरां।

22 "ज़ैखन कोई मैन्हु केन्चेरे खलाफ पाप केरे, त तैस कसम दित्ती गाए, ते तै एइतां इस भवने मां तेरी वेदी कां सामने कसम केरे, 23 तैखन तू सुर्गे मरां शुना ते फैसलो केरे, ते अपने दासां केरो न्याय केरतां दुष्टे बदलो देइयां, ते तैसेरी बुरैइअरी सज़ाह तैस्से देइयां, ते बेकसूरे बेकसूर ठहरेइतां, तैसेरे धार्मिकतारे मुताबिक तैस फल देइयां।

24 "फिरी अगर तेरे इस्राएली लोक तेरे खलाफ पाप केरनेरे वजाई सेइं अपने दुश्मन्न करां हैरी गान, ते तेरे पासे मुड़तां तेरे नंव्वेरो इकरार केरन, ते इस भवने मां तीं कां प्राथना केरन ते छंदे केरन, 25 त तू सुर्गे मरां तैन केरि प्राथना शुना; ते अपने इस्राएली लोकां केरो पाप माफ़ केरां, ते तैन एस मुल्खे मां वापस ऐन्हां ज़ै तीं तैन ते तैन केरे दादे-पड़दादन दित्तोरो थियो।

26 "ज़ैखन तैना तेरे खलाफ पाप केरन, ते एस वजाई सेइं अम्बर एत्रू बन्द भोइ गाए कि झ़ड़ी न भोए, एरे वक्त अगर तैना इस ठारारे पासे प्राथना केरतां तेरे नंव्वेरो इकरार केरन, ते तू ज़ै तैन दुख देतस, एस वजाई सेइं तैना अपने पापे करां फिरन, 27 त तू तैन केरि प्राथना सुर्गे मरां शुना, ते अपने दासां केरो ते अपने इस्राएली लोकां केरो पाप माफ़ केरां। तू ज़ै तैन रोड़ी बत हिरातस ज़ैस पुड़ तैनेईं च़लेरू लोड़ते, एल्हेरेलेइ अपने एस मुल्खे पुड़ ज़ै तीं अपने लोकां केरो हिस्सो केरतां तैन दित्तोरोए, झ़ड़ी बखेइयां।

28 "ज़ैखन इस मुल्खे मां काल या महामारी या शोह पे या फसली गेरूई या टिट्टां या कीड़े लग्गन, या तैन केरे दुश्मन तैन केरे मुल्खेरे फाटकन मां तैन्न घेरन, या कोई मुसीबत या रोग तैन पुड़ एज्जे; 29 तैखन अगर कोई मैन्हु या तेरे सारे इस्राएली लोक ज़ैना अपनो-अपनो दुख ते अपनो-अपनो अफ़सोस ज़ैनतां ते छंदे केरतां प्राथना केरतां अपने हथ इस भवनेरे पासे फैलान। 30 त तू अपने सुर्गे मां ज़ैड़ी तू रहतस तैट्ठां शुन्तां माफ़ केरां, ते हर एक्‍केरो मन ज़ैनतां तैसेरे चालरे मुताबिक फल देइयां। (तूए त मैन्हु केरो मन ज़ान्ने बालो आस) 31 कि तैना ज़ेत्रे दिहाड़े इस मुल्खे मां रान, ज़ै तीं तैन केरे दादे-पड़दादन दित्तोरो थियो, तेत्रे दिहाड़न तगर तैना तेरो डर मन्ते तेरी बत्ती पुड़ च़लते रान।

32 "फिरी परदेशी भी ज़ै तेरे इस्राएली लोकन मरां न भोए, ज़ैखन तैना त तेरू महान नवं ते शेक्ति बालो हथ ते तेरी अग्रोवं कियोरी पाखड़री खबर शुन्तां दूर मुल्खे मरां एज्जे, ते एइतां इस भवनेरे पासे तुत्तर फिरेइतां प्राथना केरे, 33 तैखन तू अपने सुर्गे मरां शुना ज़ैड़ी तू रहतस, ते ज़ैस गल्‍लरे लेई तै परदेशी तीं कां बिनती केरे, तैसेरे मुताबिक केरां। ज़ैस सेइं धेरतरे सारे मुल्खेरे लोक तेरू नवं ज़ैनतां, तेरे लोक इस्राएली लोकां केरे सामने तेरो डर मन्न; ते याकीन केरन, कि ई भवन ज़ै मीं बनेवरोए, तैस जो तेरो भवन ज़ोतन।

34 "ज़ैखन तेरे लोक ज़ैड़ी कोन्च तू तैन भेज़स तैड़ी अपने दुश्मन्न सेइं लड़ाई केरनेरे लेई निस्सन, ते एस नगरेरे पासे ज़ैन तीं च़ुनोरूए, ते इस भवनेरे पासे ज़ै मीं तेरे लेई बनेवरोए, तुत्तर फिरेइतां तीं कां प्राथना केरन, 35 तैखन तू सुर्गे मरां तैन केरि प्राथना ते बिनती शुना, ते तैन केरो न्याय केरां।

36 "कोई मैन्हु एरहो नईं ज़ै पाप न केरे अगर तैना भी तेरे खलाफ पाप केरन ते तू तैन पुड़ क्रोध केरतां तैन दुश्मना केरे हथ्थे केरस, ते तैना तैन गुलाम बनेइतां कोन्ची मुल्खे जो नेन, चाहे तै दूर भोए या नेड़े, 37 त अगर तैना गुलैमरे मुल्खे मां सोच विचार केरन, ते मुड़तां अपने गुलाम बनाने बालां केरे मुल्खे मां तीं कां छंदे केरतां ज़ोन, ‘असेईं पाप कियोरोए, ते बुराई ते गलत कम कियोरूए,’ 38 एल्हेरेलेइ अगर तैना अपने गुलैमरे मुल्खे मां ज़ैड़ी तैना गुलाम बनेइतां नियोरे भोन अपने पूरे मने सेइं ते पूरे दिले सेइं तेरे पासे फिरन, ते अपने एस मुल्खेरे पासे ज़ै तीं तैन केरे दादे-पड़दादन दित्तोरो थियो, ते एस नगरे पासे ज़ैन तीं च़ुनोरूए, ते इस भवनेरे पासे ज़ै मीं तेरे लेई बनेवरोए, तैसेरे पासे तेकतां तीं कां प्राथना केरन, 39 त तू अपने सुर्गे मरां ज़ैड़ी तू रहतस तैन केरि प्राथना ते बिनती शुना, ते तैन केरो न्याय केरा ते ज़ै पाप तेरे लोक तेरे खलाफ केरन, तैन माफ़ केरां। 40 ते हे मेरे परमेशर! ज़ै प्राथना इस ठारी मां की गाए तैसेरे पासे तकतो रेइयां ते अपने कन लेइतां रेखां।

41 ‘हुनी हे यहोवा परमेशर, उठतां अपने शेक्तरे सन्दूखे समेत अपने आरामेरी ठारी मां एई

हे यहोवा परमेशर तेरे याजकेईं छुटकारेरां लिगड़ां लेवरन,

ते तेरे भक्त लोक भलैइयरे वजाई सेइं आनन्द मनाते रान।

42 हे यहोवा परमेशर, अपने च़ुनोरे राज़ेरी प्राथना अनशुनी न केरां,

तू अपने दास दाऊदे पुड़ कियोरी दयारू कम याद रख।’"