1 आसा राज़ेरे राज़ केरनेरे छेतियोवं साले मां इस्राएलेरे राज़े बाशाए यहूदा प्रदेशे पुड़ हमलो कियो ते रामाह नगरे एल्हेरेलेइ मज़बूत कियूं, कि यहूदारे राज़े आसा कां कोई एज्जी गेइ न सके। 2 एल्हेरेलेइ आसा राज़े यहोवारे भवने ते राज़ेरे मेहलेरे भण्डारन मरां चाँदी-सोन्नू केढतां दमिश्क* नगरेरे रानेबाले अराम मुल्खेरे राज़े बेन्हददे कां मैन्हु भेज़तां इन ज़ोवं, 3 "ज़ेन्च़रे मेरे ते तेरे बाजी केरे दरमियाने मां करार थियो तेन्च़रे मेरे ते तेरे दरमियाने मां भी असां करार केरम। ते हेर अवं तीं कां सोन्नू-चाँदी भेज़ताईं, एल्हेरेलेइ एई, ते इस्राएलेरे राज़े बाशा सेइं अपनो करार ट्लोड़, ताके तै मीं करां दूर भोए।" 4 बेन्हदद राज़े आसा राज़ेरी ऐह गल मेनतां, अपने सेनां केरे प्रधान्न करां इस्राएली नगरन पुड़ हमलो करावेइतां इय्योन, दान, आबेल्मैम ते नप्ताली गोट्लेरे सब भण्डारे बाले नगर ज़ींते। 5 एन शुन्तां बाशा राज़े रामाह नगर मज़बूत केरनू शारू, ते अपनु कम केरनू बन्द कियूं। 6 तैखन आसा राज़े यहूदा प्रदेशेरे सारे लोक अकोट्ठे किये ते रामाह नगरेरे घोड़ ते लकड़ी, ज़ैन सेइं बाशा कम केरतो थियो, तैन सब किछ तैनी नेव, ते तैन सेइं तैनी गेबा ते मिस्पा नगरां मज़बूत कियां।

7 तैस मौके हनानी नबी यहूदा प्रदेशेरे राज़े आसा कां गेइतां ज़ोने लगो, "तीं ज़ै अपने परमेशर यहोवा पुड़ भरोसो न रख्खो बल्के अरामेरे राज़े पुड़ भरोसो रख्खो, एस वजाई सेइं अरामेरे राज़ेरी सेना तेरे हथ्थे करां बेंच़ी जेवरीए। 8 कुन कूशी ते लूबी केरि सेना बड़ी न थी, ते कुन तैस मां बड़े रथ, ते सुवार न थिये? फिरी भी तीं यहोवा पुड़ भरोसो रखोरो थियो, एस वजाई सेइं तैनी तैना तेरे हथ्थे मां किये।✝ 9 हेर, यहोवारी नज़र सारे धेरती पुड़ एल्हेरेलेइ फिरती रहतीए कि ज़ैन केरो दिले तैसेरे पासे बेकसूर रहते, तैन केरि मद्दती मां तै अपनि शक्ति हिराए। तीं इन कम बेवकूफी सेइं कियूं, एल्हेरेलेइ हुनी अज़्ज़ेरे बाद तू लड़ैई मां फसोरो रालो।" 10 तैखन आसा राज़े नेबी पुड़ सेरकोव ते तै कैदखाने मां छ़डो, किजोकि तैसेरी एस गल्‍लरे वजाई सेइं तैस बड़ी सरक अई। ते तैस्से वक्तेरां बाद आसा किछ लोकन पुड़ ज़ुलम भी केरनो शुरू कियो।

11 शुरू करां लेइतां आखरी तगर आसा राज़ेरां कम्मां यहूदा ते इस्राएलेरे राज़ां केरे इतिहासेरी किताबन मां लिखोरन। 12 अपने राज़ेरे उनतैलियोवं साले मां आसा पव्वां केरि बिमारी लग्गी, ते तै बिमारी बड़ी जादे बेधी जेई, फिरी भी तैनी बिमार भोइतां यहोवारी शरण नईं बल्के बेइदां केरि शरण नेइ। 13 आखरी मां आसा अपने राज़ेरे इकतैलियोवं साले मां अपने दादे-पड़दादां केरो ज़ेरो मेरि जेव। 14 तैखन तै तैसेरी कब्री मां ज़ै तैनी पेइली दाऊदपुरे मां घड़ावरी थी, तैस मां तै दब्बो जेव। ते तैसेरी लाश खुशबूदार चीज़न सेइं ते किसमां-किसमां केरे मसालन सेइं भेरतां एक्‍की बिछ़ाने पुड़ रख्खी, ते बेड़ी खुशबूदार चीज़ां तैसेरे आदरारे लेई बैली।