2 इतिहास 29

हिजकिय्याह राज़ेरू राज़

1 ज़ैखन यहूदा प्रदेशेरो राज़ो हिजकिय्याह राज़ो बनो तैखन तैसेरी उमर 25 साल थी, ते तैनी 29 साल यरूशलेम नगरे मां राज़ कियूं। ते तैसेरी अम्मरू नवं अबिय्याह थियूं, ज़ै जकर्याहेरी कुई थी। 2 ज़ेन्च़रे तैसेरे पूर्वज दाऊद राज़े कियोरू थियूं मतलब ज़ैन यहोवारी नज़री मां रोड़ू थियूं तेन्च़रे तै भी केरतो राव।

यहोवारे भवन शुद्ध केरनो

3 हिजकिय्याह अपने राज़ेरे पेइले सालेरे पेइले महीने मां तैनी यहोवारे भवनेरां दारां खोल्‍लां, ते तैन केरि मरम्मत भी कराई। 4 तैखन तैनी याजक ते लेवी एन्हतां भवनेरे पूरबेरे चौवके मां अकोट्ठे किये। 5 ते तैन सेइं ज़ोने लगो, "हे लेवी लोकव, मेरी शुना! हुनी अपने आपे पवित्र केरा, ते अपने पूर्वजां केरे परमेशर यहोवारे भवने पवित्र केरा, ते पवित्र जगाई मरां गन्दगी कढा। 6 हेरा इश्शे दादे-पड़दादेईं धोखो केरतां तैन कम कियोरू ज़ैन इश्शे परमेशर यहोवारी नज़री मां बुरू थियूं तैन शैरतां यहोवारे रानेरी ठारी पुड़ेरां तुत्तर फेरतां तैन पिठ हिरेवरी थी। 7 फिरी तैनेईं ओसारेरां दारां बंद कियां, ते दीये हिशाए। ते पवित्र ठारी मां इस्राएलेरे परमेशरेरे लेई न त गुग्गल बालो ते न होमबलि च़ाढ़ोरी थी। 8 एल्हेरेलेइ यहोवारो क्रोध यहूदा प्रदेश ते यरूशलेम नगरे पुड़ भड़को, ते तैनी एरू कियूं, कि तैना मारे-मारे फिरते रान ते लोक तैन हेरतां हैरान भोन ते च़ैड़ी देन, ज़ेन्च़रे कि तुस अपने एछ़्छ़न सेइं हेरने लगोरेथ। 9 हेरा, एल्हेरेलेइ इश्शे दादे-पड़दादे तलवारी सेइं मारे जे, ते इश्शां मट्ठां-कुइयां ते कौन्शां गुलैमी मां नेइ जेवरिन। 10 हुनी मेरे मने ई फैसलो कियोरोए कि इस्राएलेरे परमेशर यहोवा सेइं करार केरि, एल्हेरेलेइ कि तैसेरो भड़कोरो क्रोध असन पुड़ेरां दूर भोइ गाए। 11 हे मेरे मट्ठव, ढिल्‍ले न भोथ। हेरा, यहोवा इश्शे सामने खड़े राने, ते अपनि सेवा केरने, ते अपने सेवा केरनेबाले ते गुग्गल बालनेरे कम केरनेरे लेई तुसां च़ुनोरेथ।"

12 तैखन लेवी खड़े भोए: मतलब कहाती लोकन मरां अमासैरू मट्ठू महत, ते अजर्याहेरू मट्ठू योएल, ते मरारी लोकन मरां अब्दी एरू मट्ठू कीश, ते यहल्‍लेलेलेरू मट्ठू अजर्याह, ते गेर्शोनी लोकन मरां जिम्मारू मट्ठू योआह, ते योआहरू मट्ठू एदेन। 13 ते एलीसापानेरे खानदाने मरां शिम्री, ते यूएल ते आसापेरे खानदाने मरां जकर्याह ते मत्तन्याह। 14 ते हेमानेरे खानदाने मरां यहूएल ते शिमी, ते यदूतूनेरे खानदाने मरां शमायाह ते उज्जीएल। 15 तैनेईं अपने भियाल अकोट्ठे किये ते अपने-आपे पवित्र केरतां राज़ेरे तैस हुक्मेरे मुताबिक ज़ै तैनी यहोवारो वचन मैलतां दित्तोरो थियो, यहोवारो भवन शुद्ध केरनेरे लेई अन्तर जे। 16 तैखन याजक यहोवारे भवनेरे एन्त्रियों हिस्सो शुद्ध केरनेरे लेई तैस मां गेइतां यहोवारे भवने मां ज़ेत्री अशुद्ध चीज़ां मैल्ही तैना सब केढतां यहोवारे भवनेरे अंगने मां नी, ते लेवी लोकेईं तैना छ़ुइतां बेइर किद्रोनेरे नाले मां पुज़ेई। 17 पेइले महीनेरे पेइले दिहाड़े तैनेईं शुद्ध केरनेरू कम शुरू कियूं, ते तैस्से महीनेरे अठोवं दिहाड़े तैना यहोवारे ओसारे तगर जे। एन्च़रां सेइं तैनेईं यहोवारो भवन अठ दिहाड़न मां शुद्ध कियो, ते पेइले महीनेरे शोड़ोवं दिहाड़े तैनेईं तैन कम पूरू कियूं। 18 तैखन तैनेईं हिजकिय्याह राज़े कां गेइतां ज़ोवं, "असेईं यहोवारे पूरे भवने ते भांडां समेत होमबलि केरनेरी वेदी, ते च़ढ़तल च़ाढ़नेरो मेज़ भी शुद्ध कियो। 19 ज़ेत्रां भांडां आहाज राज़े अपने राज़े मां धोखो केरतां शैरी छ़डोरां थियां, तैना भी असेईं ठीक केरतां शुद्ध कियां। ते तैना यहोवारी वेदी कां सामने रख्खोरां आन।"

भवनेरू दुबारां अर्पण केरनू

20 तैखन हिजकिय्याह राज़ो झ़ेझ़ां उठतां नगरेरे हाकिम अकोट्ठे केरतां, यहोवारे भवने मां जेव। 21 तैखन तैनेईं रियासतरे ते पवित्र ठार ते यहूदा प्रदेशेरे लेई सत बछ़ड़ां, सत हुड़, सत गबड़ां ते पापबलि देनेरे लेई सत थाव्वे आने, ते तैनी हारूनेरे खानदानेरे लेवन हुक्म दित्तो कि इना सब यहोवारी वेदी पुड़ च़ाढ़न। 22 तैखन तैनेईं बछ़ड़ां बलि कियां, ते याजकेईं तैन केरो खून नेइतां वेदी पुड़ छ़िड़को। तैखन तैनेईं हुड़ बलि किये, ते तैन केरो खून भी नेइतां वेदी पुड़ छ़िड़को, ते गबड़ां भी बलि कियां, ते तैन केरो खून नेइतां वेदी पुड़ छ़िड़को। 23 तैखन तैना पापबलि केरनेरे लेई थाव्वन राज़े ते मेण्डलरे सामने आए ते तैन पुड़ अपने-अपने हथ रख्खे। 24 तैखन याजकेईं तैना बलि केरतां, तैन केरो खून नेइतां वेदी पुड़ छ़िड़कतां ते पापबलि किये, ज़ैस सेइं सारे इस्राएलेरे लेई प्रायश्चित कियो गाए। किजोकि राज़े सारे इस्राएली केरे लेई होमबलि ते पापबलि केरनेरो हुक्म दित्तोरो थियो।

25 फिरी तैनी दाऊद ते राज़ेरो नबी गाद, ते नातान नेबेरे हुक्मेरे मुताबिक ज़ै यहोवारी तरफां तैसेरे नेबी केरे ज़िरिये मैल्होरो थियो, झ़ेल्‍ली, सैन्गी ते सितारां एन्हतां लेवी यहोवारे भवने मां खड़े किये। 26 तैखन लेवी दाऊदेरे च़लेवरे बाज़े ट्लेइतां, ते याजक तुरही ट्लेइतां भवने कां खड़े भोए। 27 तैखन हिजकिय्याह वेदी पुड़ बलि च़ाढ़नेरो हुक्म दित्तो, ते ज़ैखन होमबलि च़ाढ़ने लगे, तैखन यहोवारू गीत शुरू भोवं, ते नरशिंगे ते इस्राएलेरे राज़े दाऊदेरे बाज़े बज़ाने लगे।

28 ते सारे लोक यहोवारे आराधना केरते, ते गीतां ज़ोते ते नरशिंगे बज़ाते राए। इन सब तैखन तगर भोतू राव, ज़ैखन तगर होमबलि न च़ाढ़ी। 29 ज़ैखन बलि च़ाढ़ी, तैखन राज़ो ते ज़ेत्रे तैस सेइं साथी तैड़ी थिये, तैनेईं सेभेइं क्रोड़रे भारे झुकतां आराधना की। 30 हिजकिय्याह राज़े ते हाकिमेईं लेवी लोकन हुक्म दित्तो, कि दाऊद ते आसाप नेबेरां भजना ज़ोइतां यहोवारी आराधना केरन। तैनेईं आनन्दे सेइं आराधना की ते क्रोड़ी झुकेइतां आराधना की।

31 तैखन हिजकिय्याह ज़ोने लगो, "हुनी तुसेईं यहोवारे लेई अपनो-आप पवित्र कियोरोए। एल्हेरेलेइ नेड़े गेइतां यहोवारे भवने मां मेलबलि ते शुक्रेरी बलि पुज़ाथ।" तैखन मेण्डलरे लोकेईं मेलबलि ते शुक्रेरी बलि पुज़ाई, ते ज़ेत्रे लोक अपने मेर्ज़ी सेइं देनू चाते थिये तैनेईं भी होमबलि पुज़ेई।✝29:31 लैव्य. 7:12. 32 ज़ैना होमबलि देनेरे जानबर मेण्डलरे लोकेईं आनोरे थिये, तैन केरि गिनती ई थी: 70 दांत, 100 हुड़, ते 200 गबड़ां, इना सब यहोवारे लेई होमबलि केरनेरे कम्मे मां आए। 33 पवित्र कियोरे जानबर, 600 दांत ते 3000 गब्बां थियां। 34 पन याजक थोड़े थिये, कि तैना सारे होमबलि कियोरे जानबरां केरि खैड़ी न केढी सखते थिये लेवी तैस मौके तगर तैन केरि मद्दत केरते राए ज़ांतगर तैन कम पूरू न भोइ जेवं, ते याजकेईं अपनो आप पवित्र न कियो। किजोकि लेवी अपनो आपे पवित्र केरनेरे लेई पवित्र याजकन करां जादे साफ दिलेरे थिये। 35 फिरी होमबलि कियोरे जानबर बड़े थिये, ते मेलबलि कियोरे जानबरां केरि चर्भी भी बड़ी थी, ते हर एक्‍की होमबेलि सेइं साथी पीनेरी च़ढ़तल भी देनी पेती थी। एल्हेरेलेइ यहोवारे भवने मां सेवा ठीक की। 36 तैखन हिजकिय्याह राज़े ते सारे यहूदारे लोक तैस कम्मेरे वजाई सेइं खुशी भोए, ज़ैन यहोवा अपने लोकां केरे लेई तियार कियोरू थियूं। किजोकि तैन कम बड़ू जल्दी पूरू भोवरू थियूं।