2 इतिहास 20

दुश्मन्न सेइं जंग

1 किछ वक्तेरां बाद मोआबी ते अम्मोनी ते तैन सेइं बड़े मूनी सेना जंग केरनेरे लेई यहोशापात यहूदारे राज़े पुड़ हमलो कियो। 2 तैखन किछ लोकेईं एइतां यहोशापाते सेइं ज़ोवं, "समुन्दरेरे पार एदोम मुल्खेरे पासेरां अक बड़ी भीड़ तीं पुड़ हमलो केरनेरे लेई एज्जी राहोरीए; ते हेर, तै हसासोन्तामारे तगर ज़ैस जो एनगदी*20:2 एनगदी मतलब छ़ेलरो नाग भी ज़ोतन, पुज़्ज़ी जेवरीए।" 3 तैखन यहोशापात डेरि जेव ते यहोवारी तलाशी मां लेग्गी जेव, ते पूरे यहूदा प्रदेशे मां बरत रखनेरो प्रचार कराव। 4 एल्हेरेलेइ यहूदा प्रदेशेरे सारे नगरन मरां लोक यहोवा करां मद्दत मगनेरे लेई यरूशलेम नगरे मां अकोट्ठे भोए।

यहोशापात राज़ेरे प्राथना

5 तैखन यहोशापात यहोवारे भवने मां नंव्वे अंगनेरे सामने यहूदारे ते यरूशलेमेरे लोकन मां खड़ो भोइतां, 6 ज़ोरे सेइं प्राथना केरने लगो, "हे इश्शे पूर्वजां केरे परमेशर यहोवा! कुन तू सुर्गे मां परमेशर नईं? ते कुन तू कौमां-कौमां केरे सारे मुल्खन पुड़ राज़ न केरस? ते कुन तेरे हथ्थे मां एरी ताकत ते ज़ोर नईं, कि तेरो मुकाबलो कोई न केरि सखे? 7 हे इश्शे परमेशर! कुन तीं इस मुल्खेरे रानेबाले अपने इस्राएली लोकां केरे सामने केढतां अपने दोस्त अब्राहमेरे खानदाने हमेशारे लेई नईं दित्तोरे?✝20:7 याक. 2:23. 8 इस्से दादे-पड़दादे एसमां बेस्सी जे ते एसमां तेरे नव्वेंरी अक पवित्र ठार बनेइतां ज़ोवं, 9 ‘अगर तलवार या मरी या तैसेरे अलावा काल या होरी कोई मुसीबत असन पुड़ एज्जे, फिरी भी असां इस भवनेरे सामने ते तेरे सामने (तेरू नवं त इस भवने मां बस्सोरूए) खड़े भोइतां, अपने दुखेरे वजाई सेइं तीं कां प्राथना केरमेले ते तू शुन्तां बच़ालो।’ 10 ते हुनी अम्मोनी ते मोआबी ते सेईर एरे पहाड़ी प्रदेशेरे लोक ज़ैन पुड़ तीं इस्राएले मिस्र मुल्खे मरां एंइते बार चढ़ाई केरने न दित्ती, ते तैना तैन केरि तरफां मुड़ी जे ते तैन केरो नाश न कियो,✝20:10 गिन. 20:14-21;व्यव. 2:4-19. 11 हेर, तैन्ना लोक तेरे दित्तोरे अधिकारे एस मुल्खे मां ज़ेसेरो अधिकार तीं असन दित्तोरोए, असन केढतां केरहो बदलो असन देने लगोरेन। 12 हे इश्शे परमेशर, कुन तू तैन केरो न्याय न केरेलो? ई ज़ै बड़ी भीड़ असन पुड़ चढ़ाई केरी राहोरीए, तैसेरे सामने इश्शी कोई पेश न च़ले ते असन कोई समझ़ न एज्जे कि कुन कियोरू लोड़े? पन इश्शी एछ़्छ़ी तेरे पासे लेगोरिन।"

यहोवारो जुवाब

13 ते सारे यहूदी अपने-अपने बाल-बच्‍चन, कौन्शां ते मट्ठन समेत यहोवारे सामने खड़े राए। 14 तैखन आसापेरे खानदाने मरां यहजीएल नंव्वेरो अक लेवी ज़ैन जकर्याहेरू मट्ठू ते बनायाहेरू पोट्लड़ू ते मत्तन्याहेरे मट्ठे यीएलेरू पड़पोट्लड़ू थियूं, तैस मां लोकां केरे दरमियान यहोवारो आत्मा अव। 15 तैखन तै ज़ोने लगो, "हे सारे यहूदा ते यरूशलेमेरे रानेबाले लोकव, हे यहोशापात राज़ा, तुस सब ध्यान देथ। यहोवा तुसन सेइं इन ज़ोते, ‘तुस इस बेड़ी भीड़ी करां न डरा ते तुस हिम्मत न हारा। किजोकि जंग तुश्शी नईं, परमेशरेरीए। 16 कालां तैन केरो सामनो केरनेरे लेई गानू। ते हेरा तैना सीसेरी चड़ैई पुड़ च़ैढ़ी राहोरेन ते यरूएल नगरेरे सामने वैदी पुड़ तुसन मेल भोल्हो। 17 इस लड़ाई मां तुसन लड़नू नईं पेनू। हे यहूदारे सेना, ते हे यरूशलेमेरे सेना, रुकोरे रेइयथ, ते खड़े रेइतां यहोवारी तरफां अपनो बचाव हेरथ।’ न डरा, ते तुस हिम्मत न हारा। कालां तैन केरो सामनो केरने च़ेलथ ते यहोवा तुसन सेइं साथी रालो।"

18 तैखन यहोशापात ज़मीनी पुड़ तुत्तर फेरतां झुको ते सारे यहूदारे ते यरूशलेमेरे रानेबाले यहोवारे सामने झुकतां यहोवारी आराधना की। 19 कहाती ते कोरही लोकन मरां किछ लेवी खड़े भोइतां इस्राएलेरे परमेशर यहोवारी आराधना बेड़ी उच्‍ची आवाज़ी सेइं केरने लगे।

ज़ींत ते लूट

20 तैना होरसां झ़ेझ़ां सुबेले उठतां तकोआरे सुनसान ठैरारे पासे निस्सी जे। ते च़लते बार यहोशापाते खड़े भोइतां ज़ोवं, "हे यहूदा ते यरूशलेमेरे राने बालाव, मेरी गल शुना, अपने परमेशर यहोवा पुड़ विश्वास रखा, तैखन तुस कायम राले। तैसेरे नेबन पुड़ भरोसो केरा, तैखन तुसन ज़ींत मैल्ही।" 21 तैखन यहोशापात राज़े लोकन सेइं सलाह मुशोरो केरतां किछ लोक ठहराए, ज़ैना कि पवित्र भोइतां सेनारे अग्री-अग्री च़लते बार यहोवारे लेई गीतां ज़ोन, ते इन ज़ोइतां तैसेरी तारीफ़ केरन, "यहोवारी तारीफ़ भोए, किजोकि तैसेरी दया हमेशारीए।" 22 ज़ैस वक्ते तैना गीतां ज़ोइतां तैसेरी आराधना केरने लगे, तैस्से मौके यहोवा अम्मोनी, मोआबी ते सेईरेरे पहाड़ी प्रदेशेरे लोकन पुड़ ज़ैना यहूदारे खलाफ एज्जी राहोरे थिये, मारनेबाले बिशाले ते तैनेईं तैना मारे। 23 किजोकि अम्मोनी ते मोआबी लोकेईं सेईरेरे पहाड़ी प्रदेशेरे रानेबाले डराने ते नाश केरनेरे लेई तैन पुड़ हमलो की, ते ज़ैखन तैनेईं सेईरेरे पहाड़ी प्रदेशेरे रानेबाले खतम केरि छ़डे, तैखन तैना एक्‍की होरी मारने शुरू भोइ जे।

24 ज़ैखन यहूदारी सेना सुनसान ठैरारे चौकी पुड़ पुज़तां तैस भीड़रे पासे नज़र की, तैखन कुन हेरू कि तैना ज़मीनी पुड़ पेवरी लाशां आन, ते कोई न बच़ेथो। 25 तैखन यहोशापात ते तैसेरे सेना लुटनेरे लेई जे ते तैन लाशन मांमेइं बड़ी जाईदात ते कीमती गेहने मैल्हे। तैन एत्रे गेहने मैल्हे कि तैन न नेही सके, बल्के लुटारो माल एत्रो मैल्हो, कि अकोट्ठे केरते-केरते ट्लाई दिहाड़े बीती जे। 26 च़ेवरोवं दिहाड़े तैना बराका नव्वेंरी बुन्हीं वैदी मां अकोट्ठे भोए ते तैड़ी यहोवारू शुक्र कियूं। एस वजाई सेइं तैस जगारू नवं बराकारी वादी*20:26 बराकारी वादी मतलब बरकतरी वादी पेवं, ज़ैन अज़ तगर भी आहे। 27 तैखन यहूदा ते यरूशलेम नगरेरे सारे मड़द ते तैन केरे अग्री-अग्री यहोशापाते सेइं साथी, आनन्दे सेइं यरूशलेमे जो वापस आए, किजोकि यहोवा तैना दुश्मन्न पुड़ खुश कियोरे थिये। 28 एल्हेरेलेइ तैना सैन्गी, सितार ते नरशिंगे बज़ाते यरूशलेमे मां यहोवारे भवने मां आए। 29 ते ज़ैखन मुल्खे-मुल्खेरे सारे लोकेईं शुनू कि इस्राएलेरे दुश्मन्न सेइं यहोवा लड़ो, तैखन तैन केरे दिले मां परमेशरेरो डर बिश्शी जेव। 30 एन्च़रां सेइं यहोशापातेरे राज़े मां आराम मैल्हो, किजोकि तैसेरे परमेशरे तैन च़ेवरे पासना सुख चैन दित्तो।

यहोशापात राज़ेरे आखरी दिहाड़े

31 एन्च़रे सेइं यहोशापाते यहूदा पुड़ राज़ कियूं। ज़ैखन तै राज़ो बनो तैस वक्त तैसेरी उमर 35 साल थी, ते तैनी 25 साल यरूशलेम नगरे मां राज़ कियूं। ते तैसेरी अम्मरू नवं अजूबा थियूं, ज़ै शिल्हीएरी कुई थी। 32 तै अपने बाजी आसारे बत्ती पुड़ च़लो ते तैस करां न मुड़ो, मतलब ज़ैन यहोवारी नज़री मां ठीक थियूं तैन्ने तै केरतो राव। 33 फिरी भी मूरती पुज़ारी उच्‍ची ठारां न बिछ़ोड़ी जेई, बल्के हेजू तगर लोकेईं अपनो दिल अपने दादे-पड़दादां केरे परमेशरे पासे न थियो लेवरो। 34 शुरू करां आखरी तगर यहोशापातेरां कम्मां, हनानी एरे मट्ठे येहूएरे बारे मां तैस बारे मां लिखेरूए, ज़ैन इस्राएलेरे राज़ां केरे इतिहासेरे मां मैलते।

35 इसेरे बाद यहूदारे राज़े यहोशापाते इस्राएलेरे राज़े अहज्याह सेइं ज़ै बड़ो ज़ुलम केरतो थियो, करार कियो। 36 मतलब तैनी तैस सेइं एल्हेरेलेइ मिलाप कियो कि तर्शीश नगरे जो गानेरे लेई ज़िहाज़ां बनावाए, ते तैनी एरां ज़िहाज़ां एस्योनगेबेरे मां बनावां। 37 तैखन दोदावाहेरे मट्ठे मारेशा नगरेरे रानेबाले एलीएजेरे यहोशापातेरे खलाफ ई नबूवत की, "तीं ज़ै अहज्याह सेइं करार कियोरोए, एस वजाई सेइं यहोवा तेरी बनेवरी चीज़न ट्लोड़ी छ़डेलो।" एल्हेरेलेइ ज़िहाज़ां ट्लूटी जेआं ते तर्शीश नगरे जो न गेइ बटां।