2 इतिहास 32

सन्हेरीब राज़ेरो हमलो

1 हिजकिय्याह राज़े यहोवारे लेई वफादैरी सेइं कम्मां केरनेरे ते फ़सह तिहार मनानेरे बाद, अश्शूरेरे राज़े सन्हेरीबे एइतां ते यहूदा मां दाखल भोइतां क़िले बाले नगरां केरे खलाफ डेरे लेइतां घेरो दित्तो, तै तैन पुड़ कब्ज़ो केरनो चातो थियो। 2 एन हेरतां हिजकिय्याहे कि सन्हेरीब नेड़े एवरोए ते यरूशलेमे पुड़ हमलो केरनो चाते, 3 हिजकिय्याहे अपने हाकिमन ते शूरबीरन सेइं ई सलाह की, तैनी यरूशलेम नगरे करां बेइर पैनेरे नाग रोकनेरे लेई अपने हाकिमन सेइं सलाह की। ते तैनेईं तैसेरी मद्दत की। 4 एस गल्‍ली पुड़ बड़े लोक अकोट्ठे भोए, ते एक्‍की होरि सेइं एन ज़ोइतां कि, "अश्शूरेरे राज़े किजो इड़ी एज्जन, ते एइतां हछु पानी पीन," तैनेईं सारे नाग रोके ते तै दरिया शुकेई छ़डो ज़ै मुल्खेरे मझ़मेइं बगतो थियो। 5 फिरी हिजकिय्याह हिम्मत रेखतां ज़ैड़ी-ज़ैड़ी शहरपनाह ट्लुटोरी थी, तैड़ी-तैड़ी तै बनावाई। ते तै गुम्मटां केरि ज़ेरि उच्‍ची की ते तैस करां बेइर अक होरी शहरपनाह खड़ी कराई, ते दाऊदपुरे मां मिल्‍लो मज़बूत की। ते बड़े हथियार ते ढालां भी बनावेई। 6 तैखन तैनी लोकन पुड़ सेनापति च़ुन्ने ते तैना नगरेरे फाटकेरे चौवके पुड़ अकोट्ठे किये, ते एन ज़ोइतां तैन भरोसो दित्तो, 7 "हिम्मत रखा ते मज़बूत भोथ तुस न त अश्शूरेरे राज़े करां डेरथ ते न तैसेरे हछे लोकन लेहितां, ते तुस हिम्मत न हारा। किजोकि ज़ै असन सेइं साथीए, तै तैसेरे लोकन करां बड्डोए। 8 मतलब तैसेरो सहारो त मैन्हन पुड़े, पन असन सेइं साथी, इश्शी मद्दत ते इश्शे पासेरां जंग केरनेबालो इश्शो परमेशर यहोवाए।" एल्हेरेलेइ लोक यहूदारे राज़े हिजकिय्याहेरी गल्‍लन पुड़ भरोसो केरतां रान।

सन्हेरीबेरे अधिकैरी केरो सन्देश

9 इसेरे बाद अश्शूर मुल्खेरो राज़ो सन्हेरीब ज़ै सारी सेना समेत लाकीश नगरेरे सामने थियो, तैनी अपने सिपाही यरूशलेमे मां यहूदारे राज़े हिजकिय्याह ते तैन सेभी यहूदी लोकन कां ज़ैना यरूशलेमे मां थिये एन ज़ोनेरे लेई भेज़े, 10 "अश्शूरेरो राज़ो सन्हेरीब एन ज़ोते, कि तुसन केसेरो भरोसोए कि ज़ैस सेइं कि तुस च़ेवरे पासना घेरे मां एवरेथ ते तुस यरूशलेमे मां बिशोरेथ? 11 कुन हिजकिय्याह तुसन सेइं एन ज़ोइतां कि इश्शो परमेशर यहोवा असन अश्शूरेरे राज़ेरे पंजे करां बच़ालो तुसन न टपलाए कि तुसन नियन्ने भत्ते ट्लिशी सेइं मारे? 12 कुन तैनी हिजकिय्याह तैसेरी उच्‍चे ठारां ते वेदी दूर केरतां यहूदा ते यरूशलेमे हुक्म नईं दित्तोरो, कि तुस एक्‍की वेदी कां झुकथ ते तैस्से कां गुग्गल बालनो? 13 कुन तुसन पतो नईं, कि मीं ते मेरे दादे-पड़दादेईं मुल्खे-मुल्खेरे सारे लोकन सेइं कुन-कुन कियोरूए? कुन तैन मुल्खां केरि कौमां केरे देबते कोन्ची भी तरीके सेइं अपने मुल्खे मेरे हथ्थे करां बच़ेइ सखे? 14 ज़ेत्री कौमां केरो मेरे दादे-पड़दादेईं नाश कियोरोए तैन केरे सारे देबतन मरां कौन थियो ज़ै अपने लोकन मेरे हथ्थे करां बच़ेइ सखे? फिरी तुश्शो देबतो तुसन मेरे हथ्थे करां केन्च़रे बच़ालो? 15 हुनी हिजकिय्याह तुसन एन्च़रां सेइं टपलाए ते बहकाए न, ते तुस तैस पुड़ भरोसो न केरा, किजोकि कोन्ची कौमी या राज़ेरो कोई देबतो अपने लोकन न त मेरे हथ्थे करां ते न मेरे दादे-पड़दादां केरे हथ्थे करां बच़ेइ सको। इन पक्‍कू आहे कि तुश्शो देबतो तुसन मेरे हथ्थे करां न बच़ालो।"

16 एस करां भी जादे सन्हेरीबेरे अधिकैरेईं यहोवा परमेशरेरी, ते तैसेरे दास हिजकिय्याहेरी निन्दा की। 17 फिरी तैनी अक एरी चिट्ठी भेज़ी, ज़ैस मां इस्राएलेरे परमेशर यहोवारी निन्दा की, तैस मां इना गल्‍लां लिखोरी थी: "ज़ेन्च़रे मुल्खे-मुल्खेरे कौमां केरे देबतेईं अपने-अपने लोक मेरे हथ्थे करां न बच़ाए तेन्च़रे हिजकिय्याहेरो देबतो भी अपने लोकन मेरे हथ्थे मरां न बच़ालो।" 18 ते तैनेईं बड़े उच्‍ची आवाज़ी सेइं तैन यरूशलेमेरे लोकन जो ज़ैना शहरपनाही पुड़ बिश्शोरे थिये, यहूदी भाषाई मां आवाज़ दित्ती, कि तैन डरेइतां घबरान ज़ैस सेइं असां लोक नगरे पुड़ कब्ज़ो केरम। 19 तैनेईं यरूशलेमेरे परमेशर यहोवारी चर्चा की, कि ज़ेन्च़रे मुल्खे-मुल्खेरे लोकां केरे देबतां केरो ज़ेरो भोए, ज़ैना मैन्हु केरे बनेवरेन।

सन्हेरीबे करां छुटकारो

20 तैखन हिजकिय्याह राज़ो ते आमोसेरे मट्ठे यशायाह नबी दूइयेईं सुर्गेरे पासे तुत्तर फिरेइतां यहोवा कां मद्दतरे लेई प्राथना की। 21 तैखन यहोवा अक स्वर्गदूत भेज़ो, तैनी अश्शूरेरे राज़ेरे डेरन मां सारे शूरबीर बहादर, प्रधान ते सेनापति केरो नाश कियो। एल्हेरेलेइ तै शरमिन्दो भोइतां, अपने मुल्खे जो वापस च़लो जेव। ते ज़ैखन सन्हेरीब अपने देबतेरे मन्दरे मां थियो, तैखन तैसेरे अपने दूई मट्ठेईं तैड़ी तै तलवारी सेइं मारो। 22 यहोवा हिजकिय्याह ते यरूशलेमेरे रानेबाले अश्शूरेरे राज़े सन्हेरीब ते अपने सारे दुश्मना केरे हथ्थे करां बच़ाव, ते च़ेवरे पासन तैन शान्ति दित्ती। 23 तैखन बड़े लोक यरूशलेमे मां यहोवारे लेई च़ढ़तल ते यहूदारे राज़े हिजकिय्याहेरे लेई कीमती चीज़ां भी आन्ने लगे, ते तैस मौके तै सैरी कौमां केरि नज़री मां बड़ो महान भोइ जेव।

हिजकिय्याहेरी बिमारी ते घमण्ड

24 तैन दिहाड़न मां हिजकिय्याह एत्रो बिमार भोइ जेव, कि तै मरने बालो थियो, तैखन तैनी यहोवा कां प्राथना की। ते परमेशरे तैस सेइं गल्‍लां केरतां तैसेरे लेई अक निशान दित्तो। 25 पन हिजकिय्याहे तैस उपकारेरो जुवाब न दित्तो, किजोकि तैसेरो दिल घमण्डे सेइं भरोरो थियो। एस वजाई सेइं यहोवारो क्रोध यहूदा ते यरूशलेमे पुड़ भड़को। 26 तैखन हिजकिय्याह यरूशलेमेरे रानेबालन समेत अपने मनेरे घमण्डेरे वजाई सेइं दीन भोइ जेव, एल्हेरेलेइ यहोवा अपनो क्रोध तैन पुड़ हिजकिय्याहेरे दिहाड़न मां न भड़कव।

हिजकिय्याहेरी धन-दौलत ते तैसेरां कम्मां

27 हिजकिय्याह राज़ो बड़ो अमीर भोव ते तैसेरी शान-ओ-शोकत बधी। ते तैनी चाँदी, सोन्नू, मणि, खुशबूदार चीज़ां, ढालां ते सब किसमां मन पसंद चीज़ां केरे लेई भण्डार बनावाए। 28 फिरी तैनी अन्न, नंव्वो दाछ़रो रस, ते ज़ैतूनेरे तेलेरे लेई गुदाम बनाए, ते हर किसमेरे जानबरां केरे लेई गेवड़ां, ते गब्बां केरे लेई बाड़ बनावाए। 29 तैनी नगर बसाए, ते बड़ां गोरू गब्बां अकोट्ठां कियां, किजोकि परमेशरे तैस बड़ी धन-दौलत दित्तोरी थी। 30 तैन्नी हिजकिय्याह गीहोन नंव्वेरे दरियाएरू बेइयोवं पानी बन्द केरतां होरी बत्तां केढतां दाऊदपुरेरे पश्चिमेरे पासे सिद्धू पुज़व, ते हिजकिय्याह अपने सारे कम्मन मां कामयाब भोतो थियो। 31 फिरी भी ज़ैखन बाबेलेरे हाकिमेईं तैस कां तैसेरे मुल्खे मां कियोरे बड्डां कम्मां केरे पुछ़नेरे लेई दूत भेज़े तैखन परमेशरे तै एल्हेरेलेइ शारो, कि तैन पेरखतां तैसेरे दिलेरो सारो भेद बुझ़ी सेखी।

हिजकिय्याह राज़ेरी मौत

32 हिजकिय्याह राज़ेरां बाकी कम्मां, ते तैसेरे भेक्तरां कम्मां केरे बारे आमोसेरे मट्ठे यशायाह नेबेरे दर्शन नव्वेंरी किताबी मां, ते यहूदा ते इस्राएलेरे राज़ां केरे इतिहासेरी किताबी मां लिखेरूए। 33 हिजकिय्याह अपने दादे-पड़दादां केरो ज़ेरो मेरि जेव ते तै दाऊदेरे खानदानेरे कब्रस्ताने मां दब्बो जेव, ते सब यहूदी लोकेईं ते यरूशलेम नगरेरे लोकेईं तैसेरे मरने पुड़ तैसेरी आदर की। तैसेरू मट्ठू मनश्शे तैसेरी ठैरी पुड़ राज़ो बनू।