19 Amutoziba kuti mibili yenyu ithempeli leMeya Yakayengemala imukati kwenyu, yamunayo ibva kuNdzimu? Amutji imwi tjekwenyu; 20 makatengwa nentengo. Ndizo kudzani Ndzimu mumibili yenyu.

27 koga ndonanha mbili wangu ndiwuntshambidzila, kudze kuti ndisilahiwe hule kwesumikila kubamwe.

3 Hapa ndikoba kose kwandinako, ndingapa mbili wangu kuti upisiwe*, koga ndisina ludo, anditobuyigwa netjimwe.

13 Ngobe ngeMeya in’ompela takabvubikiwa mumbili un’ompela, maJuta kene maGiriki, balanda kene bakasunungugwa-kakale tose takatiwa kuti tin’we kweMeya in’ompela.

4 Ngobe sayikoku mbili un’ompela una ndungululo njinji, akuta kuli kuti dzose ndungululo dzina n’hingo iwo zwawo, 5 iswi bo, tili banjinji, timbili un’ompela muna Khirisitu, koga tili ndungululo dzakasiyana.

8 Ngobe zwisimisa mbili kuna gumwe lubhatsho, koga hla Ndzimu kobhatsha muzwinhu zose, ngobe kuna tjigadzabgwe tjebutjilo gwangwenuwali nemubutjilo gunohha.

41 Lindani mutembezele kudze musingine mukulikwa, meya inoda, koga nyama ayina masimba."

29 Ndizo hapa hhiho lilo leludli likuta kuti utjinye, ulikopole, ulilahe. Kuhine kuti ulahikigwe nendungululo yembili in’ompela pana kuti mbili wose uposegwe mugehena.

25 "Ndizo ke ndomubudza, musizwimanikanye nekwebutjilo gwenyu, kuti mowhodlani kene kuti mowhon’wani, kene nekwemibili yenyu, kuti mowhombalani. Butjilo agutopinda zodliwa, nembili awutopinda zwiyambalo?

28 Kakale musihle ibabo banobulaya mbili koga besingatubule bulaya meya, koga ihlani iye unotubula paladza mbili kose nemeya mugehena.

1 Kwakati kwatjikubungana zwiwulu zwinjinji zwebanhu kwekuti baka botshambana, akatangisa lebeleka nebadiyiwa babe kutanga, eti, "Mutjenjelele mbidzo yebaFarisi, ibutjengeli. 2 Akuna tjakafumikiwa tjisingowhozumbunugwa, kene tjakasumbikika tjisingowhozibgwa. 3 Ndizo ke kose kwamaleba muhhalima kowhowhakala masikati, kwamanyebezela mun’umba yamukati kowhokalakatiwa pehhugwi kwedzin’umba."

4 "Ndomubudza, bakwinya bangu, musihle banobulaya mbili, hule kwayikoko kusina tjimwe tjabangathama. 5 Koga ndowhomuluma zebe kuti wamakafanila hla ndiyani. Ihlani iye unoti abulaya, akaba nemasimba etola nhu akawumposela kugehena; ee, ndomubudza, muwunhle!"

6 "Bontiintii zwihanu azwitotengesewa nemapeni mabili? Koga, akuna tjimwe tjazo tjinokanganika mbeli kweNdzimu. 7 Ngentha yeni, kene iwo mavudzi emiholo yenyu akabagwa. Musihle, muna tjilemela kupinda bontiintii zwinjinji."

8 "Ndomubudza, wose nhu unondibvuma mbeli kwebanhu, Nkololo wenhu unowhumbvuma bo mbeli kwebatumwa beNdzimu; 9 Koga unondilamba mbeli kwebanhu unowholambiwa bo mbeli kwebatumwa beNdzimu."

10 "Umwe newumwe unoleba dama linotuka Nkololo wenhu unowhoyetigwa mazwibhatigwa; koga umwe newumwe unoleba etuka Meya Yakayengemala atowhoyetigwa mazwibhatigwa."

11 "Hapa bemuyendesa kumasinagogu nekubatongi nekubutungamili, musidziyidzike kuti mowhohandula mutini kene kuti mowholebani; 12 ngobe Meya Yakayengemala inowhomudiya mulubaka igogo kuti mulebe mutini."

13 Umwe mugubungano wakati kuwunli, "Ndhiyi, budzani nkulu wangu kuti akobane nhaka nami."

14 Akawun’handula eti, "Yenlumewe, ndiyani wakandiyeta kuti ndibentongi nenkobi pehhugwi kwenyu?" 15 Akati kubali, "Whililani, mutjenjelele tjiba; ngobe butjilo gwenhu aguneni nekuti una fumwa njinji kungapani."

16 Akababudza tjifananidzo, eti, "Minda yewumwe nlume wakafuma yakaba nezwidlo zwinjinji; 17 akakumbula munkumbulo uwe akati, ‘Ngono nditetjini, nekuti andina matula ebiga zwidlo zwangu?’ 18 Eba eti, ‘Ndowhothama ndijali. Ndowhokolomola matula angu ose, ndikabaka amwe makulukulu; hapa ndajalo ndikotjibiga zwidlo zwangu nenhundu dzangu. 19 Ndikotjiti mumeya yangu, Meya, unafumwa njinji inolizana makole manjinji; nyebunuka, udle, un’we, uhanhisise.’ 20 Koga Ndzimu wakati kuwunli, ‘Iwe tjilengwe! busiku gwanasi meya iyo inohakika kubva kukuli; ngono zwinhu zose izwezwi zwawabaakanya, zowhobe zwani?’ "

21 "Wakajalo ke nhu unozwikubunganyila fumwa, iye asakafuma kuNdzimu."

22 Wakati kubadiyiwa babe, "Ndizo ke ndomubudza, musizwimanikanye nekwebutjilo gwenyu, kuti mowhodlani, kene nekwemibili yenyu muti towhombalani. 23 Ngobe Butjilo gopinda zodliwa, nembili unopinda zwiyambalo. 24 Kumbulani makungubo*. Haatodzwala kene kowha, haana tjidandale kene dula, koga Ndzimu unowapa zodliwa. Tjenyu ke tjilemela tjingapani kupinda tjenyunyi! 25 Ndiyani wenyu angapamhidzila bulefu gwebutjilo gugwe ngekuzwimanikanya? 26 Hapa musingatubule thama tjinhu tjilelulelu sayitjetji, mozwimanikanyilani nekumwe kose? 27 Bonani maluba, kuti anokula tjini; haatohinga kene pfuma zwiyambalo; koga ke ndomubudza, kene naSolomoni mugudzo lile lose waka esakambala selin’ompela lawo. 28 Koga hapa Ndzimu embadza buhwa gwehango nayeyi zila gunoti nasi gumuminda gutjila mangwana guposegwa mutjibeso, unowhomumbadza kungapani imwi, banhu bana bugalimoyo gutukununu!

29 "Musihake kuti mowhodlani kene kuti mowhon’wani, nayiyo mikumbulo yenyu isibe nekudziyidzika. 30 Ngobe njudzi dzose dzehango dzozwihaka zwinhu izwezwi; Tate benyu banoziba kuti mozwihaka. 31 Koga ke, imwi hakani bumambo gwabo, izwezwi zwinhu zowhobazwenyu bo."

32 "Musihle, imwi mhwizi homanana, ngobe whuda kwaTate benyu kuti bamupe bumambo. 33 Tengesani zwinhu zwenyu, mupe bahayi; muzwiwanile whomo dzisingahakale, dzefumwa yekudzimu isingame, kusina mbava ingasedzela, kene ntjenje ungapaladza. 34 Ngobe pana fumwa iyo, ndipo moyo uwo pawunowhogala uliko bo."

35 "Nhunji dzenyu ngadzigale dzakasungwa, nezwivoneko zwenyu ngazwigale zwipfuta, 36 muthame sebanhu bakalindila he wabo ebva kunzano wepiza bukwe, kuti bawuhhulile tjinyolotjo paanokokodza. 37 Bakakombolegwa balanda banowhowanikwa nahe wabo bakalindila, pabanobuya; lebeswa ndoti kumuli, unowhombala akabagadza pasi, akabapakulila zodliwa. 38 Bakakombolegwa balanda ibabo hapa he wabo angabuya pakati kwebusiku kene koyedza, akawana bakajalo! 39 Koga zibani whoku, kuti kadzene mweni wenzi waka eziba kuti mbava yaka iwhohha gupi lubaka, waka asingowhosiya nzi uwe kukhwibiwa. 40 Namwi bo galani makazwilulamisa; ngobe Nkololo wenhu unowhohha mulubaka gwamusingakumbulile."

41 Phethiro wakati kuwunli, "He tjifananidzo itjetji motjileba kutili kene moleba kubanhu bose?"

42 He wakati, "Ndiwupi ke mbhati wakatjenjela unogalikabgwe, unowhoyi nahe uwe alinge bahingi benzi, kuti abape zodliwa mulubaka gwakafanila? 43 Wakakombolegwa iwhoyo nlanda unowhowanika nahe uwe ethama sayikoku pahanduka kukwe. 44 Lebeswa, ndoti kumuli, unowhowunthama mbhati wezwinhu zose zwaanazo. 45 Koga hapa iwhoyo nlanda angati tjemumoyo, ‘He wangu wanonoka handuka,’ ekotangisa loba balandalume nebalandakadzi, kakale edla en’wa elaladza, 46 he wenlanda iwhoyo unowhohha muhhuba nlanda iwhoyo laasingakumbulile nemulubaka gwaasingazibe, unowhowunloba zwinogwadza, akawunghadza nebasingagalemoyo."

47 "Iwhoyo nlanda waka eziba kuda kwahe uwe, koga akasalulamila kene yeta sekuda kukwe, unowhowamutjila lobgwa kukulu. 48 Koga iye waka asingazibe, akayeta kwakafanila lobgwa, unowhowamutjila lobgwa kuhomanana. Umwe newumwe wakapiwa kunjinji, kohakika kunjinji kuwunli; nhu banhu wabanopa kunjinji, banowhohaka bo kunjinji kuwunli."

49 "Ndakahhila kuwhoposela moto muhango; ndoyemula kuti dzene wawopfuta! 50 Ndina bvubikiwa kwandakafanila bvubikiwa nako; ndowha ndakamanikana tjose kudza kunoyetikala. 51 Mokumbula kuti ndahha ndihhisa kunyalala muhango? Akuzojalo, ndomubudza, koga ke ndakahhila whopalalanya; 52 nekuti kubva ngwenuwali mun’umba in’ompela banhu bahanu banowhobe bakapalalana, batatu begwisana nebabili nebabili begwisana nebatatu; 53 banowhothubukana, tate banogwisana nenkololo wabo, nkololo egwisana natatayi, mayi begwisana nenkololokadzi, nkololokadzi egwisana namayi, mezwale begwisana nenlongo, nlongo egwisana namezwale."

54 Wakati kubunga lebanhu, "Hapa mubona gole limilika kunongina hhuba, tjinyolotjo moti, ‘Kohha masusu’; kubva kuyetika. 55 Hapa mubona mhepo inobva kuburwa ihhuhhudza, moti, ‘Kowhopisa kwazo’; kubva kuyetika. 56 Imwi batjengeli! Moziba lingika kwehango nehhuhhugwi; koga ngentha yeni musingatubule pedzisisa lubaka igogu?"

57 "Ngentha yeni musingazwibonele kuti tjakalulama nditjipi? 58 Utjayenda newunokutilika nlandu kuntongi, yedza kuti mubve mayipedza muli muzila, ngobe angakukwebela kuntongi, ntongi akakuyendesa kugombgwa, likokusa mujele. 59 Ndokubudza, awutowhobhuda udza ulipa loso lebupelo."

4 Kuna mbili un’ompela neMeya in’ompela, sayikoku bo namwi makadanigwa mukugalabgwe kun’ompela pamakadan’wa,

22 ✝Bafumakadzi, muzwitebamise kubalume benyu, sekwamunothama kuna He. 23 Ngobe nlume un’holo wemfumakadzi saKhirisitu ali n’holo wegubungano, mbili uwe, kakale iye tjekukwe ndiye Ntjidzi wawo.

15 Bvumilani kunyalala kwaKhirisitu kulawule mumimoyo yenyu, ngobe makadanigwa mumbili un’ompela, kakale galani muboka.

16 Ndizo ke atitonyala moyo. Nekutobe mbumbiko yedu yakuhhe ihakala, mbumbiko yedu yamukati inoyetiwa ikaba ntshwa mahhuba ose.

24 Khirisitu tjekukwe wakasenga matjinyo edu mumbili uwe patjileyanyo, kudze kuti tife mumatjinyo titjile mundulamo. Ngemabanga awe makatjidziwa.

2 Ngobe toseni totjinya kanjinji, hapa eliyapo usingaleye muzwilebo zwizwe unoba elinhu wakatambunuka, unotubula dziba mbili uwe wose.