1 ✝Koga ngekwelubaka nezwibaka, makamu, akuneni kuti mukwaligwe nekwako. 2 ✝Ngobe imwi tjekwenyu moziba ntja kuti hhuba laHe lowhoswika sembava busiku. 3 ✝Hapa banhu betjati, "Kuna kunyalala nedzibilika," tjinyolotjo kolomoka kowhobaswikila, segwadza kunohhila wetjikadzi weetshibama kakale akuna kwabanowhotihhila. 4 Koga imwi makamu amuta muhhalima, ilelo hhuba alingadze likamukaabadza sembava. 5 Ngobe moseni mubana betjedza, bana bemasikati; atita bebusiku kene behhalima. 6 Ndizo ke iswi ngatisibhakhwe newhope, sekunota bamwe, koga ngatimuseni meho tibe nekuzwibhata. 7 Ngobe banoyizela banoyizela busiku, nebanolaladza banolaladza busiku. 8 ✝Koga saku tili bemasikati, atibeni nekuzwibhata, timbale bugalimoyo neludo kuli tjidzibili tjepafuba, negalabgwe kwetjidziwa kuli whuntshi yetjidzibili tjen'holo. 9 Ngobe Ndzimu azotihalila kuti tiwigwe nebuhongola, koga wakatihala kuti tiwamutjile tjidziwa muzina laHe wedu Yesu Khirisitu, 10 iye wakatifila kuyetila kuti kene titjila kene takafa tigale naye. 11 Ndizo ke, kulumbidzanani kakale mubakane, sekwamunothama.

12 Tomukumbila, makamu, kuti mulemekedze ibabo banohinga zwakalema pakati kwenyu kakale bali ibo banomutungamila kakale bemulaya muzina laHe, 13 mubakudze kwazo neludo ngentha yen'hingo wabo. Ngakube nekunyalala pakati kwenyu.

14 Kakale tomukulumbidza, makamu, kuti mutjemele basingahake hinga banodzungayila, musimise basina tjilopa, mubhatshe banyolonyolo, mube nemoyonlefu kubanhu bose. 15 Mube nelebeswa kuti akuna unobgwilizila tjibi netjibi, koga muzwipile gala muyetilana tjakanaka umwe kuwumwe, nekubanhu bose.

16 Hanhani gose lubaka, 17 tembezelani tjoselele, 18 bokani mutjimwe netjimwe tjimo; ngobe ikoku ndiko kuda kweNdzimu muna Khirisitu Yesu nekwenyu.

19 Musitshambidzile Meya, 20 musilingile pasi bulebesambeli, 21 koga holesesani tjimwe netjimwe; mubhatilile muna tjakalulama, 22 muthubukane nezwibi zose.

23 Kadzene Ndzimu wekunyalala iye tjekukwe angamuyengemadza ngekuhhele; kakale kadzene meya yenyu nenkumbulo wenyu nembili wenyu kungatjengetedzeka kuli kubuya kusingawanike nlandu pakubuya kwaHe wedu Yesu Khirisitu. 24 Iye unomudana unogalikamoyo, kakale unowhokuthama.

25 Makamu, mutitembezelele bo.

26 Mulebelese makamu ose neputa* kwakayengemala.

27 Ndomulaya muzina laHe kuti lukwalo igogu gubaligwe bagalimoyo bose.

28 Ngoni dzaHe wedu Yesu Khirisitu ngadzibe namwi.