1 Kubva kuna Phawuli naSilivenasi naThimothi,

Kugubungano lebagalimoyo likuThesalonika laNdzimu Tate bedu naHe Yesu Khirisitu.

2 Ngoni nekunyalala kunobva kunaNdzimu Tate bedu naHe Yesu Khirisitu ngakube kumuli.

3 Takafanila boka Ndzimu lubaka gose nekwenyu makamu, sekwakafanila, ngobe bugalimoyo gwenyu gokula kwazo kwazo, neludo gwamunago kuwumwe newumwe gowanda. 4 Ndizo ke iswi tozwiloba fuba nekwenyu mumakubungano eNdzimu, nentha yewhilidzila kwenyu nebugalimoyo gwenyu mukudziyidziwa kwenyu nemanikanyiwa kwenyu kwamunosimidzila muli mukuli.

5 Ikoku busupi gupatjena gwetonga kweNdzimu kwakalulama, kuyetila kuti mukobagwa sebakafanila bumambo gweNdzimu, gunoba igo kakale gwamunodziyilila. 6 Ndzimu wakalulama. unowhobgwilizila nemagwadzo kuna ibabo banomugwadzisa 7 nemupa nyaluluka imwi munodziyidziwa, netipa bo nyaluluka iswi. Ipapo He Yesu paanowhozumbunugwa ebva kudzimu enabatumwa babe banamasimba kwazo alimumoto unopfuta, 8 ebgwilizila nelanga ibabo basingazibe Ndzimu, basingawhilile ndebo mbuya yaHe wedu Yesu. 9 Banowhopiwa langiwa kwepaladziwa kusingapele nethubukanyiwa nebuyapo gwaHe kose negudzo lemasimba awe, 10 muna ilelo hhuba laanowhohha ewhokudziwa mubayengemali babe, netjenamiwa nabo bose bakagalamoyo, ngobe busupi gwedu gwatakaleba kumuli gwakagagwamoyo.

11 Nentha yayikoku togala timutembezelela, kuti Ndzimu wedu amuthame mube bakafanila dana kukwe, kakale kuti ngemasimba awe ahhadzise kose yemula kwenyu thama tjibuya nen'hingo webugalimoyo, 12 kuyetila kuti zina laHe wedu Yesu likudziwe mumuli, namwi bo mukudziwe muwunli, kuyendidzana nengoni dzeNdzimu wedu nekwaHe Yesu Khirisitu.