1 Tjebupelo makamu, sekwatakamudiya kuti makafanila tjila tjini nehanhisa Ndzimu tjini, sekwamunokuthama, tomukumbila kakale tomukuludzila muzina laHe Yesu kuti mukuwaze. 2 Ngobe moziba milayo yatakamupa muzina laHe Yesu. 3 ✝Ngobe ikoku ndiko kuda kweNdzimu, yengemadziwa kwenyu. kuti musithame bupombgwe; 4 ✝kudze umwe newumwe wenyu atjile newaakatolana naye* nezila yakayengemala kakale inolemekedzeka, 5 kusi ngenjemulo mbi dzetjiba, sebataya basingazibe Ndzimu; 6 ngakusibe newunotjinyila kene tjebela gamu lile, muna tjakalingisana nendebo iyeyi, ngobe He unowholanga wose nhu unoyeta matjinyo akajali, sekwatakamubudza kale tikamutjemela. 7 Ngobe Ndzimu azotidanila kuhambgwa, koga kubuyengemali. 8 Ndizo kene yani unolamba matama ihawa, haatolamba nhu koga unolamba Ndzimu, iye unomupa Meya iye Yakayengemala.

9 Akutohakika kuti kube newunomukwalila nekweda makamu, ngobe imwi tjekwenyu makadiyiwa ngeNdzimu kuti mudanane; 10 ilebeswa moda bagalimoyo bose muntunhu wose weMakhedoniya. Koga ke tomukulumbidza, makamu, kuti mukuwaze, 11 ✝ muzwipile tjila butjilo gwakanyalala, mulingisane nezwenyu koga, kakale muhinge nemaboko enyu, sekwatakamulaya, 12 kuyetila kuti zila yamunotjila iyete bakuhhe babe nemazwibhato kumuli, kakale musibe ntolo kuwumwe nhu.

13 Atitoyemula kuti musizibe, makamu, ngekwayibabo bakatjiyizela, kuyetila kuti musibe nebuyendasi sayibabo basina kugalabgwe. 14 ✝Ngobe togalamoyo kuti Yesu wakafa akamuka kakale, ndizo ke togalamoyo kuti Ndzimu unowhobahhisa naYesu ibabo bakatjiyizela begalamoyo muwunli.

15 ✝ Sediya kwaHe, tomubudza kuti iswi bapenyu, basala kudzina He ehha, atitowhobatangela ibabo bakatjiyizela. 16 Ngobe He tjekukwe unowhodeluka ebva kudzimu nedanilila kunamasimba, newhi lentumwa nkulu wekudzimu, nensindo welunyanga weNdzimu. Bakafa begalamoyo kuna Khirisitu banowhomuka kutanga; 17 kukotjiti iswi bapenyu, basala, towhowhapuligwa pehhugwi tikahangana nabo mumakole tihanganidza He mumeya, ndizo towhoba naHe tjoselele. 18 Ndizo simisanani nematama ihawa.