1 Imwi tjekwenyu, makamu edu, moziba kuti mukumba kwedu akuzoba suli; 2 ✝nekene takatabhakhwa zwakayipa kakale tatukwa kuFiliphi, seziba kwenyu, takaba netjilopa muNdzimu wedu kuti timubudze ndebo mbuya yeNdzimu nekene kwaka kuna kunyanyayidziwa kukulu. 3 Tjikumbilo tjedu atjitobva muyemula kusakatambunuka kene kwehambgwa, kene yedza mutjebela; 4 koga sekwatakabvumiwa neNdzimu kuti tigagwebgwe sumikila ndebo mbuya, ndizo tolebeleka, tisingahanhise banhu, koga tihanhisa Ndzimu iye unoholesesa mimoyo yedu. 5 Moziba kuti atizotongohingisa matama anozipilila kene matama anosumbika pupa, Ndzimu unsupi wedu. 6 Takatisingahake gudzo linobva kubanhu, kene kumuli kene kubamwe, 7 nenguba tingaba takamulemesela nezwatakahaka kumuli sebapositoli baKhirisitu. Koga takaba banyolonyolo* kumuli, samme belela bana babo. 8 Ndizo ke, ngobe timuda, takatazwipila mukobela kusi ndebo mbuya yeNdzimu yoga, koga kose nebutjilo gwedu, ngobe timuda kwazo. 9 Ngobe mokumbula hinga nepawuka kwedu, makamu, takahinga siku nesikati, kuyetila kuti tisibe ntolo kuna kene yani wenyu nelubaka tisumikila ndebo mbuya yeNdzimu kumuli.

10 Mubasupi, neNdzimu unsupi bo, kuti takabe takayengemala kakale takalulama tjini kakale tisingawanike nlandu kumuli imwi bagalimoyo. 11 Kana moziba kuti umwe newumwe wenyu takawumbhata nezila tate yabanobhata bana babo, 12 takamukumbila tikamukulumbidza, kakale tikamutetedza kuti mutjile butjilo gwakafanila Ndzimu, iye unomudanila mubumambo gugwe nemugudzo lile.

13 Toboka Ndzimu tjoselele, ngobe pamakawamutjila dama leNdzimu lamakawha naswi, amuzoliwamutjila sedama linobva mubanhu, koga makaliwamutjila sekwalili iko ntja, dama leNdzimu, linohinga mumuli imwi bagalimoyo. 14 ✝Kana imwi makamu, makatodza makubungano ebagalimoyo beNdzimu muna Khirisitu Yesu, amuJudiya; ngobe makadziyidziwa nebanhu behango yenyu, sayibo bo bakadziyidziwa nemaJuta, 15 akabulaya He Yesu kose nebalebesambeli, naswi bo akatidziyidza kwazo. Ndzimu atohanha nekwawo kakale anonyanyayidza banhu bose 16 ngetidzibisa lebeleka neBataya kuyetila kuti batjidziwe. Ngethama ikoku banohhadza tjilizanyo tjematjinyo abo abanogala bethama. Buhongola gweNdzimu gwatjidzina gukabahhila.

17 Koga, makamu angu, saku takapalalana namwi kwelubaka gufutshwanana, munyama kusi munkumbulo, taka timuhuba kwazo tikagwisa tjose kuti timubone, 18 ngobe taka tihaka hha kumuli, imi Phawuli, ndakayedza kanjinji, koga Satane akatidzibila. 19 Mulebeswa lose, ini galabgwe kwedu kene hanha kwedu kene tjiyala tjedu tjezwikudza mbeli kwaHe wedu Yesu pakubuya kukwe? Akuta imwi? 20 Lebeswa, imwi ndimwi gudzo ledu nehanha kwedu!