1 Nana Nyamenle le yɛ nriandifeabelɛ nee yɛ anwosesebɛmaavo, ɔle yɛ ndɛndɛ boavolɛ wɔ yɛ ngyianlɛ nu.

1 Ahenle mɔɔ twe bikye Awulae Nyamenle kpondɛ feabelɛ, na Nyamenle Bedevinli ne yɛ ɛlawolɛ keda ɔ nwo zo la, 2 yemɔ yɛɛ baze Nana Nyamenle kɛ, "Ɛle me feabelɛ ɔ nee me bodane; ɛle me Nyamenle, wɔmɔ a me rɛle wɔ wɔ nu a." 3 Ɔbalie wɔ yeavi kpɔvolɛma ngane mɔɔ bɛzuozua kɛ bɛfa bɛazɛkye wɔ, ɔ nee ewule ewule mɔɔ fa bɛ kɔ ewule nu la anu. 4 Ɔbava ɔ ndɛba ne mɔ yeaheda ɛ nwo zo; na wɔ ye boɛnleanlɛ bo yɛɛ ɛbanyia wɔ feabelɛ a; ye diedi kpundii ne bayɛ wɔ sinzavolɛ nee wɔ wowadeɛ.

1 Mekulo wɔ somaa, O Nana Nyamenle! Ɔluakɛ wɔmɔ yɛɛ ɛpepɛ ɛdie me a.

2 Nana Nyamenle le me sinzavolɛ; ɔle me nriandifeabelɛ. Me Nyamenle a sinza me a; me nee ye lua a, dahuu me nwo kɔlɔɔnwo. Ɔsinza me kɛ konle nu wowadeɛ; ɔle kɛ ɛnlankɛ nyinli mɔɔ ye mɛne ɛdwazo wɔ konle nu la. 3 Mesu mefɛlɛ Awulae, na ɔpepɛ ɔdie me ɔfi me kpɔvolɛma asa anu. Nana Nyamenle fɛta ayɛlɛyelɛ amgba!

1 Fa me sie kpalɛ, O Nana Nyamenle, ɔluakɛ wɔ wɔ nu yɛɛ menriandi mebafea a.

1 Nana Nyamenle le me kɛnlaneɛ ɔ nee me ngoanedievolɛ; nwane bieko bɔbɔ a ɔwɔ kɛ mesulo ye a? Awulae le me ɛkɛla ne anwosesebɛmaavo; nwane bɔbɔ a kɛhola kɛgyinla me nyunlu a? 2 Saa atiakunlutanevolɛma, bɔbɔ, me kpɔvolɛma, dwazo me kɔme zo kɛ bɛku me a, bɛ munzule bɔ bɛdabɛ bɛ ti zo. 3 Ɛlɔne ekpunli ekpunli babɔ me nwo mgbɔlɛka ayia ɛdeɛ; noko akee me ahonle ɛnrɛdu ɛlɛ. Me kpɔvolɛma badwazo me nwo zo wɔ konle nu ɛdeɛ, noko akee me diedi zo ɛnrɛde ɛlɛ.

1 Wɔmɔ a mefa me rɛle mewula wɔ nu a, O Nana Nyamenle; mmamaa me nyunlu nyiane gua aze. Die me, ɔluakɛ wɔmɔ ɛle tenlene Nyamenle! 2 Saa mesu mefɛlɛ wɔ a, gua ɛ nzo aze tie me, na die me ndɛndɛ. Yɛ me Bodane kpole, na bɔ me nwo bane fi me kpɔvolɛma asa anu. 3 Ɔluakɛ wɔmɔ yɛɛ ɛle me anyelazo dievolɛ nee me nriandifeabelɛ a; zɔhane ati di me nyunlu na wowa me, kɛmɔ ɛdawɔ wɔbɔ me ɛwɔkɛ la. 4 Ye me fi ɛhane ne mɔɔ me kpɔvolɛma ɛzua me la anu; ɔluakɛ wɔmɔ a ɛle me sinzavolɛ a. 5 Ɛ sa nu a mefa me sunsum mewula a.

Wɔmɔ a wɔlie me ngoane a, O Awulae Nyamenle nɔhalɛdivo.

3 Yɛ Bodane maa me, na bɔ me nwo bane; ɔluakɛ wɔmɔ yɛɛ ɛle me sinzavolɛ, ɔ nee me nriandifeabelɛ a.

8 Ɔle kpalɛ kɛ ɛkɛva ɛ rɛle ɛkɛwula Nana Nyamenle anu, tɛla kɛ ɛkɛva wɔ adwenle ɛkɛzɔ sonla dasanli la. 9 Ɔle kpalɛ kɛ ɛkɛkpondɛ feabelɛ wɔ Nana Nyamenle anu, tɛla kɛ ɛkɛva ɛ rɛle ɛkɛwula arelemgbunli nu la.

5 Me ɛkɛla ɛyɛ koonwu butu Nyamenle anyunlu; ɔluakɛ me anyelazo muala vi ye lɔ. 6 Ɔ ngomekye ala a ɔko ɔmaa me, na ɔdie me ngoane a. Ɔle me feabelɛ; ɔti awie biala ɛnrɛhola ɛnrɛli me nwo zo konim.

7 Me ngoanelielɛ nee me anyunlunyia kpokpoti gyi Nana Nyamenle anwo zo. Me bodane totohyia ɔ nee me feabelɛ, yemɔ a le Nana Nyamenle. 8 Ebiamɔ, bɛva bɛ rɛle bɛwula Nana Nyamenle anu mekɛ biala; bɛva bɛ adesoa muala bɛgua ɔ nwo zo, ɔluakɛ Nyamenle le feabele maa yɛ.

17 O me Nyamenle wɔmɔ mɔɔ ɛle me anwosesebɛ a, mebado edwɛne meaye wɔ ayɛlɛ; ɔluakɛ wɔmɔ Nyamenle yɛɛ ɛle me nriandifeabelɛ a. Nyamenle ne mɔɔ maa menwu ye ɛhulolɛ kpundii ne la.

1 O Awulae, ɛvolɛ pemgbenlamgbe mɔɔ ɛraze ɛhɔ la, wɔmɔ yɛɛ wɔyɛ yɛ nriandifeabelɛ a. 2 Kolaa na bɛabɔ awoka, anzɛɛ kolaa na wɔabɔ ewiade amuala, ɔvi ngoane mɔɔ ɔnlɛ awieleɛ kɔkpula ngoane mɔɔ ɔnlɛ awieleɛ la, ɛnee wɔmɔ ɛle Nyamenle.

9 Nana Nyamenle le feabelɛ maa bɛdabɛ mɔɔ bɛsisi bɛ la, feabelɛ kpalɛ wɔ ɛmianlɛ mekɛ nu. 10 Bɛdabɛ mɔɔ bɛze wɔ anwunvɔnezelɛ ne la, fa bɛ rɛle wula wɔ nu, O Nana Nyamenle; ɔluakɛ wɔmɔ ɛngyakyi awie biala mɔɔ kisa wɔ la adevinli.

7 O Nana Nyamenle, wɔ ɛhulolɛ sonle bolɛ amgba; ɛhye ati a aleɛabo amra nriandi bafea ɛ ndɛba kpole ne abo la.