1 Aleɛ hyenle bieko na ye nɔsolɛ nu, mɔɔ ɛnee akee Ɛnwomenlelielɛ Kenle ne ɛpɛ nu la, Male mɔɔ vi Magedala nee Salome nee Male, Gyemise ɔ nli ne, hɔtotɔle funli ɛziezielɛ nwo ninyɛne mɔɔ le kɛ alufuanlɛ mɔ la.

2 Na aleɛbahye ne ala, mɔɔ ɛnee sɛnzɛne ne ɛtɛtudule bɔbɔ la, bɛvale bɛhɔle sɛka ne azo. 3 Na bɛlua adenle nu bɛkɔ la, ɛnee bɛlɛdwenle kɛ bɛkɛzi bɛkɛyɛ na bɛahundo bolɛ totohyia ne bɛavi sɛka ne anloa la.

4 Mɔɔ akee bɛdwule ɛkɛ ne la, bɛnleanle anwuma na bɛnwunle kɛ bɛye bolɛ ne mɔɔ ɛnee yɛ ɛnlomboɛ kpole kpalɛ la dɛbadɛba, na ɔ nyunlu adenle ne la ɛkɛ ne wienyi! 5 Ɔti bɛhɔle sɛka ne anu na bɛnwunle kɛ kpavolɛ bie mɔɔ wula tɛladeɛ fufule nwohyee la de fema zo ɛkɛ ne. Ɛzulolɛ hanle mraalɛ ne mɔ totohyia, 6 na anwumabɔvolɛ ne zele bɛ kɛ, "Bɛmmamaa ɔyɛ bɛ azibɛnwo. Tɛ Gyisɛse, Nazalɛtenli ne mɔɔ bɛbɔle ye meanubaka nu la a bɛkpondɛ ye la ɔ? Ɔnle ɛke! Yedwazo yera ngoane nu bieko! Bɛnlea, ɛke a bɛziele ye a, na ɛleka mɔɔ ɛnee ɔla la ɛne. 7 Ɛhye ati akee bɛhɔ na bɛhɔze ye ɛdoavolɛma ne mɔ mɔɔ Pita boka nwo la, kɛ Gyisɛse ɛlɛdumua bɛ nyunlu wɔ Galeli. Bɛbanwu ye wɔ ɛkɛ ne, kɛmɔ ɔhanle ɔhilele bɛ kolaa na yeawu la!"

8 Mraalɛ ne mɔ vi sɛka ne anu nriandinle, na anwowozolɛ nee ɛzulolɛ totohyia hanle bɛ, mɔɔ bɛangola tendɛ a.

9 Molɛ aleɛbahye a Gyisɛse vi ewule nu dwazole a, yɛɛ sonla mɔɔ lumuale nwunle ye noko la a le Male Magedala raalɛ ne mɔɔ ɔdule awozonle nsuu ne ɔvile ye nu la. 10,11 Ɔhɔdole ɛdoavolɛma ne mɔ kɛ alɔbɔlɛ ɛbubu bɛ bɔkɔɔ zɛ, na monle ɛbia bɛ takaa na ɔzele bɛ kɛ yenwu Gyisɛse, kɛ ɔde ngoane nu! Noko akee bɛanlie ye bɛanli.

12 Ɛhye mɔ anzi wɔ kenle ko zɔhane ala, Gyisɛse yele ɔ nwo hilele menli nwiɔ bie mɔɔ ɛnee vi Gyɛlusalɛm lua aze ɛlɛkɔ namule bie azo la, na kɛmɔ ɛnee yehakyi ɔ nwo la ati, bɛannwu ye sonla holɛ. 13 Nzinlii mɔɔ bɛnwunle ye sonla holɛ ko la, bɛvale ɛnriandinle bɛziale bɛhɔle Gyɛlusalɛm bɛhɔbɔle menli mɔɔ ɛha la noko amaneɛ, noko akee awie ko biala bɔbɔ anlie bɛ anli.

14 Nzinlii, eza ɔyele ɔ nwo ɔhilele ɛdoavolɛma bulu nee ko ne wɔ melɛ mɔɔ ɛnee bɛde aleɛ nwo la. Ɔhwile bɛ nyunlu wɔ bɛ kpolerazulɛ nee diedi mɔɔ bɛnlɛ ye la anwo bɔbɔ kɛ bɛanlie menli mɔɔ bɛnwu ye kɛ yedwazo yevi ewule nu la bɛanli la.

15 Na akee ɔzele bɛ kɛ, "Ɔwɔ kɛ bɛkɔ aleɛabo kosooti na bɛkɔka Edwɛkpa ne bɛkile awie biala wɔ ɛleka biala. 16 Na bɛdabɛ mɔɔ bɛkɛlie bɛkɛli na bɛkɛzɔne bɛ la, bɛbalie bɛ ngoane. Na bɛdabɛ mɔɔ bɛkɛkpo kɛ bɛkɛlie bɛkɛli la, bɛbabua bɛ fɔlɛ.

17 "Na bɛdabɛ mɔɔ bɛbalie bɛali la, bava me tumi adudu awozonle, na eza bɛadendɛ wɔ aneɛ aneɛ ngakyile nu. 18 Bɛbahola bɛazɔ nwɔlɛ nu bɔbɔ mɔɔ bɛngola bɛ ka a, yɛɛ saa bɛno debie biala mɔɔ ayidane wɔ nu bɔbɔ la a, ɔnrɛyɛ bɛ ɛhwee; na eza noko bɛbahola bɛava bɛ sa bɛagua wuliravolɛma anwo zo amaa bɛade kpɔkɛ."

19 Mɔɔ Awulae Gyisɛse wiele tendɛ kile bɛ la, bɛvale ye bɛhɔle Anwuma belemgbunli maanle ne anu, na ɔhɔdɛnlanle Nana Nyamenle asa fema zo.

20 Na ɛdoavolɛma ne mɔ hɔle ɛleka biala hɔhanle Edwɛkpa ne, na Awulae noko nee bɛ yɛle gyima ne, na ɔzile bɛ edwɛkɛ ne pi wɔ nwanwane gyima mɔɔ vindele bɛ edwɛkɛ ne anzi wɔ ye tumi nu la.